"Səbrsizlik, mənzil başına tez çatmaq istəyi nəticədə ötmə əməliyyatının pozulmasına səbəb olur"
Daxili İşlər Nazirliyinin Baş Dövlət Yol Polisi İdarəsi ölkə ərazisində baş verən yol-nəqliyyat hadisələrinin səbəblərini açıqlayıb. Məlumata görə, ötən 8 ay ərzində respublika üzrə qeydə alınmış yol-nəqliyyat hadisələrinin 39,5 %-i (527 hadisə, 193 ölüm, 579 yaralı) ötmə və qarşıdan gələn nəqliyyatın yoluna çıxma, 22,8 %-i (304 hadisə, 132 ölüm, 282 yaralı) nəqliyyat vasitələrinin yüksək sürətlə idarə olunması, 12,3 %-i (164 hadisə, 39 ölüm, 202 yaralı) yolayrıclarını keçmə qaydalarının pozulması, 1,9 %-i (26 hadisə, 12 ölüm, 28 yaralı) nəqliyyat vasitələrinin sərxoş vəziyyətdə idarə olunması səbəbindən baş verib.
Yol-nəqliyyat hadisələrinin 40,4 %-ni (539) piyadaların vurulması təşkil etmiş, nəticədə 195 piyada həlak olub, 394-ü yaralanıb. Respublika üzrə qeydə alınmış yol-nəqliyyat hadisələri nəticəsində 35 uşaq və yeniyetmə həlak olub, 124 nəfər yaralanıb.
Qeyd edək ki, ötən ilin 8 ayı ərzində Azərbaycanda 1331 yol-nəqliyyat hadisəsi qeydə alınıb və nəticədə 490 nəfər həlak olub, 1409 nəfər yaralanıb.
Statistikadan görünən odur ki, qəzaların çoxu ötmə və qarşıdan gələn nəqliyyatın yoluna çıxma nəticəsində baş verir. Ümumilikdə yol qəzaları zaman-zaman müzakirə mövzusu olub. Qəzalar bəzən bir adam, bəzən bir ailə, bəzən də bir neçə ailənin bədbəxtliyinə gətirib çıxarır. Ani diqqətsizlik böyük bir qəzanın baş verməsinə səbəb olur. Qəzadan heç kim sığortalanmayıb. Ehtiyatsızlıq, nəqliyyat vasitəsinin nasazlığı və bu kimi amillər qəza hallarını qaçılmaz edir. Belə hadisələrdə dünyasını dəyişən kim, ömürlük yatağa, əlil arabasına məhkum olan kim. Qəza risqini önləmək üçün görülən tədbirlər də bəzən lazımi effekt vermir. Bu məsələdə əsas məsuliyyət isə nəqliyyat sahibinin üzərinə düşür. Sürücülər ötmə qaydalarına riayət etsə, bu qədər çox qəza baş verməz. Avtomobil qəzalarını şərh edən "Təhlükəsiz Yol" Alyansının koordinatoru Şahin Camalovun sözlərinə görə, sürücülərin ötmə qaydalarına əməl etməməsi halları digər qayda pozuntularına nisbətən əvvəllər də çox olub: "Təəssüflər olsun ki, bir sıra sürücülər bunun məsuliyyətinin fərqində olmur. Səbrsizlik, mənzil başına tez çatmaq istəyi nəticədə ötmə əməliyyatının pozulmasına səbəb olur. Yaxud da yaranan tıxaca görə görürsən ki, sürücü qarşıdakı yola çıxır. Bütün bunlar, istər-istəməz, qəzaların artma sayına öz təsirini göstərir. Müşahidələr göstərir ki, aparılan müəyyən profilaktik işlər nəticəsində əvvəlki illərə baxanda belə neqativ hallar nisbətən azalıb. Ancaq, istənilən halda, sürücü məsuliyyətindən çox şey asılıdır. Etiraf etmək lazımdır ki, son illər yolların təmir-tikintisi üzrə xeyli işlər görülüb. Yeni yollar salınıb. Əvvəlki yollar təmir edilib. Yüksək hərəkət üçün şərait yaradılıb. Ancaq sürücü hazırlığı, yol hərəkəti mədəniyyəti, yol hərəkəti təhlükəsizliyinə dair qaydalara məsuliyyətlə yanaşmada problemlər var. Bir sıra sürücülər buna ciddi riayət etmək istəmir. Necə gəldi avtomobili idarə edir. Nəticədə ağır yol-nəqliyyat hadisəsi baş verir. Bunu etiraf etmək lazımdır. Yol-nəqliyyat hadisələrinin artmasına səbəb olan başlıca amil məhz budur. Ona görə də əsas olan məsələ insan amilidir. Yol hərəkətini təşkil edən də, yollarda qayda pozub adam öldürən də insandır".
Vidadi ORDAHALLI
