Anar Məmmədov: "Əksər hallarda məktəbli qızlar ailəli kişilərlə cinsi münasibətdə olur"
Məktəbli qızlar arasında abort hallarının sayının artdığı qeyd olunur. Abortlarla bağlı yayılmış son statistik rəqəmlərdə bildirilir ki, ötən il aborta gedənlərdən 50 nəfəri 15-17 yaşarası yeniyetmə, 1485 nəfəri isə 18-19 yaşarası qızlardır.
Aborta gedənlər arasında məktəbli qızların olması faktını Ailə, Qadın və Uşaq Problemləri üzrə Dövlət Komitəsi də təsdiqləyir. Komitənin İnformasiya və analitik araşdırmalar şöbəsinin baş məsləhətçisi Aynur Veysəlova mətbuata açıqlamasında bildirib ki, burada ilk növbədə məsuliyyət valideynin üzərinə düşür. Onun sözlərinə görə, ötən il 15-17 yaş arasında 50 qızın aborta getməsi müşahidə edilmişdisə, 2014-cü ildə isə bu rəqəm 88 olub: "Əvvəlki illə müqayisədə azalma var. Burada əsas məsuliyyət valideynin üzərinə düşür. Belə ki, valideyn uşağının təhsilinə, sağlamlığına, onun maraq dairəsi və əlavə məşğul olduğu məsələlərə, dostlarına nəzarət etməli, onu düzgün istiqamətləndirməlidir. Təəssüflər olsun ki, bir çox hallarda bunun əksinə rast gəlinir. Bu da xoşagəlməz hallarla nəticələnir. Valideynlər, azyaşlı qızlar özləri bu addımların uğursuz olduğunu dərk etsinlər. Yanlış dini təsəvvürlərin, stereotiplərin, adət-ənənələrin aradan qaldırılması üçün eyni zamanda KİV-in və vətəndaş cəmiyyətinin bu sahədə fəaliyyəti gücləndirilməlidir".
Məktəbli qızlar arasında abort faktının qeydə alınması ekspertləri də narahat edir.
"Vəfa" Sosial İctimai Birliyinin rəhbəri Fatimə Hacıbəyli "Bakı-Xəbər"ə açıqlamasında qeyd etdi ki, 15-17 yaşlı qızların hamilə qalması faktı təəssüf doğurur: "Bu yaşda olan qızların hamilə qalmasının müxtəlif səbəbləri ola bilər. O səbəblərdən biri qızların aldadılaraq seksual münasibətdə olmasıdır. Hamilə olmasından xəbər tutan qız ilk olaraq münasibətdə olduğu şəxsə vəziyyətini bildirir. Ancaq qarşı tərəf ata olmağa hazır olmadığını deyir və ya qızdan ümumiyyətlə imtina edir. Belə olan halda, çarəsiz vəziyyətdə qalan qız aborta üz tutur.
Digər səbəb isə yeniyetmə qızların zorlanmasıdır. Zorlanmaya məruz qalan qızlar hamilə olduğunu öyrənincə ilk olaraq abort haqqında düşünür".
Həmsöhbətimiz hesab edir ki, yeniyetmə qızlar arasında erkən cinsi münasibətlərə meylin artması bu kimi problemlərin yaranmasına səbəb olur. Onun sözlərinə görə, bunun kökündə virtual dünya dayanır: "15-17 yaşlı qızlar internet vasitəsilə oğlanla tanış olur. Onunla uzun müddət internet vasitəsilə danışdıqdan sonra görüşməyə qərar verirlər və bu cür xoşagəlməz hallar yaranır. Xatırlayırsınızsa, bu günə qədər neçə-neçö yeniyetmə qız internet vasitəsilə tanış olduğu oğlana görə ailəsini tərk edərək Bakıya qaçıb".
F.Hacıbəylinin fikrincə, qızlar arasında erkən cinsi münasibətin qarşısını almaq üçün orta məktəb və KİV-in üzərinə böyük iş düşür.
Sosioloq Anar Məmmədov bizimlə söhbətində qeyd etdi ki, məktəbli qızların hamilə qalmasının günahkarı valideynlərdir: "Valideynlər qızları ilə mütəmadi olaraq ünsiyyətdə olsa, onlar qızının nə yaşadıqlarından xəbərdar olar. Burada məsuliyyət tək ananın üzərinə düşmür. Eyni zamanda, ata da qızlarına nəvaziş göstərməkdən qaçmamalıdır. Bəzi qızlar ailə sevgisindən, ata nəvazişindən uzaq olduğu üçün sevgini başqa kişidə axtarır. Fərqi yoxdur, o kişi subay da ola bilər, evli də. Qız ailəsindən duymadığı sevgini başqa şəxsdə tapdığı üçün ona tək ürəyini deyil, eyni zamanda, cinsi münasibətdə olmağa da razılıq verir. Əksər hallarda məktəbli qızlar ailəli kişilərlə cinsi münasibətdə olur. Bu fakt son vaxtlar artıb. Subay qızlar ailəli kişilərə meyl edir. Təbii, ailəli kişi istəməz ki, məktəbli bir qızdan övladı olsun. Qız da ailəsinin təpkisindən qorxaraq çarəni abortda görür. Yenə deyirəm ki, valideynlər tək qızların deyil, oğlanların da tərbiyəsi ilə ciddi məşğul olsun və onlarla birgə vaxt keçirsin".
Günel CƏLİLOVA
