"Uşaqların nevroloji xəstəliklərdən əziyyət çəkməsi səbəblərindən biri də məktəb-təhsil, eyni zamanda, ailə-cəmiyyət arasında münasibətlərinin diskomfort olmasıdır"
Səhiyyə Nazirliyinin məlumatına əsasən, nevroloji xəstəliklərdən əziyyət çəkən uşaqların sayı artıb. Statistik rəqəmlərə əsasən, bu ilin 6 ayı ərzində 11 mindən çox uşaq məhz nevroloji xəstəliklərdən qeydiyyata düşüb.
Uşaqlar arasında adıçəkilən xəstəliklərin nə səbəbdən yayıldığını öyrənmək məqsədilə pediatr Aysel Zeynalovaya müraciət etdik. O bizimlə söhbətində qeyd etdi ki, uşaqların nevroloji xəstəliklərdən əziyyət çəkməsinin müxtəlif səbəbləri ola bilər: "İlk növbədə qadın hamiləlik zamanı müəyyən sıxıntı və əsəb keçirir. Bu kimi hallar uşağa təsir edir. Nəticədə uşaq travma ilə doğulur".
Həmsöhbətimizin sözlərinə görə, uşaqların adıçəkilən xəstəliklərdən əziyyət çəkməsi səbəblərindən biri də müasir dövrdə texnoloji inkişafla uşaqların məktəb-təhsil, eyni zamanda, ailə-cəmiyyət arasında münasibətlərinin diskomfort olmasıdır: "Daha doğrusu, bu, münasibətlərin uyğunlaşdırılmaması ilə bağlı olan məsələdir. Müəyyən münasibətlərin lazımi səviyyədə qurulmaması ilə əlaqədar olaraq görürsən ki, uşaqlarda nevroloji proseslər inkişaf etməyə başlayır. Sadalanan faktorlar arasında müəyyən dövlət proqramına əsasən uyğunluq yaradılarsa, uşaqlar arasında nevroloji xəstəliklər bu qədər çox olmaz. Yəni müasir texnoloji proseslərin inkişafı üzündən görürsən ki, uşaqlar hansısa kompyuter oyunlarına həddən artıq aludə olur. Bu da uşaqların aqressivləşməsinə gətirib çıxarır. Nəticə etibarilə bu onlarda nevroloji xəstəliklərin yaranmasına zəmin yaradır. Ona görə də sözügedən xəstəliyin uşaqlar arasında yayılmasını əsasən bu amillərlə əlaqələndirirəm".
Həmsöhbətimiz onu da əlavə etdi ki, nevroloji problem daha çox 1 yaşına qədər olan uşaqlarda özünü büruzə verir: "Uşağın gecələr yatmayıb sürətli ağlaması kimi hallar onun sinir sisteminin normal olmamasından xəbər verir. Həmçinin uşağın tez-tez diksinməsi, əllərini qıcaması da körpənin əsəbi olduğunun göstəricisidir. Bu halda, valideyn təcili olaraq nevropatoloqa müraciət etməlidir".
Günel CƏLİLOVA
