İndi dağlar diyarı Lerikin öz kəndindən rayon mərkəzinə getmək çox çətindir. Birinci səbəb də marşrut avtobusun yoxluğudur. Buna görə vacib işdən ötrü mərkəzə, eləcə də ətraf kəndlərə getmək üçün camaat məcbur qalıb kənar sürücülərə müraciət edir. Onlar isə 2 manatlıq yol üçün hər sərnişindən 10 manat istəyir. Üstəlik, nadir hallarda tapılan maşın dolmamış yola düşmür. Kənd camaatının bu qədər pulu verməyə imkanı olmur, odur ki, rayon mərkəzinə gedib-gəlmək ən ağır problemdir.
Demək olar ki, rayonun əksər kəndindən mərkəzə avtobus işləmir. Dörd kəndi birləşdirən Daster ərazisində də vəziyyət belədir. Halbuki, sovet vaxtı rayonun kəndlərinə 26 avtobus marşrutu açılmışdı. Quruluş dağılan kimi həmin marşrutlar da bağlandı. Bununla da mərkəzlə kəndin əlaqəsi pozuldu, vəziyyət indiyə kimi də davam edir. Marşrut olmadığı üçün rayon mərkəzinə getmək olmur, ölüm ayağında gedəndə də özəl maşın sahibləri bundan istifadə edərək adamların başına oyun açır. Bütün rayon vəziyyəti bilir. Qaldı ki, işi yoluna qoymaq, adamları əziyyətdən çixarmağa, bu heç kimi düşündürmür. Vəziyyətdən çıxmaqdan ötrü rayon mərkəzində yeni avtovağzal tikməyi bəhanə gətirirlər. Amma xalqı üçün azca ürəyi yanan məmur olsa, vəziyyətdən çıxmaq çətin deyil. Elə bil rayon rəhbərləri üçün bu ərazidə adam yaşamır. Həm də rayon mərkəzinə getməkdən ötrü istifadə olunan Piran-Hamarat kənd yolu olduqca yararsız haldadır. Məlumat üçün deyim ki, bu məsafə rayon mərkəzinə gedən 60 kilometr yolun 18 kilometrini təşkil edir və özündə dörd ərazini birləşdirir. Burada 46 kənd olmaqla 15 min əhali yaşayır. Sovet vaxtı, təqribən 30 il bundan əvvəl Piran-Hamarat kənd yolunun 8 kilometrinə asfalt döşənib. Hazırda yol boyunca sıralanan gölməçələr insan həyatı üçün hər an təhlükə yaradır.
Bir də işin qəribəliyi ondadır ki, uzun illərdir Piran-Hamarat yolunda təmir-bərpa işlərinin aparıldığı deyilir. Yol isə, rahat olmaq əvəzinə, get-gedə dağılır. Prezident İlham Əliyev deyir ki, gördüyümüz bütün işlərin mahiyyəti və məqsədi ondan ibarətdir daha da güclü dövlət, xalqımız üçün daha da yaxşı şərait yaradaq ki, Azərbaycan xalqı rifah içində, təhlükəsizlik şəraitində yaşasın və inkişaf etsin. Təəssüf ki, rayonun başda duranları buna əməl etmir, boş vəd verməklə həm xalqı, həm də bütün fəaliyyət boyu xalqının maraqlarını hər şeydən üstün tutan ölkə başçısinı aldadırlar. Halbuki! Lerik rəhbərlərı başa düşməlidir ki, müstəqilliyini 25 il öncə bərpa etmiş Azərbaycan cənab İlham Əliyevin apardığı düzgün siyasət sayəsində öz uğurları ilə dünya ölkələrinə meydan oxuyur. Belə bir ölkədə yalanla xalqın başını qatmaq olmaz. Ölkənin inkişafına mane olanlar, özündən başqa heç kimi düşünməyən, iş bacarmayan səriştəsiz rəhbərlər gec-tez xalq qarşısında cavab verəcək.
Bəli, Azərbaycan Prezidenti İlham Əliyevin rəhbərliyi altında hərtərəfli sürətli inkişaf yolundadır, gündən-günə qüdrətlənir. Bütün bunlara görə hər bir azərbaycanlı sevinir, böyük qürur hissi keçirir. Xalq indi öz Prezidentinə ürəkdən bağlanıb. Ölkəmiz çox güclüdür, bütün sahələrdə burada inkişaf var. Xalq indi rahat işləyir, gözəl həyat sürür. Bütün bunlar olan yerdə Lerik rayonunun əksər kəndində marşrut, yol problemi üzündən yaşlı adamlar gedib bankomatdan öz pensiya pullarını vaxtında çıxara bilmir. Kaş bəzi məmurların ucbatindan Lerik rayonundakı belə qüsurlar olmayaydı. Axı həlli asan olan belə problemlər bugünkü çiçəklənən respublikamızın gözəlliyinə xələl gətirir.
Zəfər ORUCOĞLU, Azərbaycan Jurnalistlər Birliyinin üzvü, "Qızıl qələm", "Xalqın nüfuzlu ziyalısı" mükafatçısı (Lerik)
