“Meyit orqanlarının transplantasiyası etik məsələdir”
Dollarla bağlı vəziyyət ölkədə dərman qıtlığına yol açmayacaq. Trend-in məlumatına görə, bunu səhiyyə nazirinin müavini Elsevər Ağayev deyib.
E.Ağayev bildirib ki, bu, hər kəsi narahat edən məsələdir: "Düşünürəm ki, bu məsələ tənzimlənəcək, dərmanlarla bağlı problem yaranmayacaq".
Elsevər Ağayev deyib bildirib ki, təcili yardımların ödənişli olması bu gün Səhiyyə Nazirliyinin gündəmində dayanan məsələ deyil, lakin hərdən təcili yardıma aid olmayan çağırışlar edilir. Nazir müavini bildirib ki, bu cür çağırışlar dövlətə maliyyə vəsaitinə başa gəlir: "Kimisi təzyiqini, yaxud temperaturunu ölçdürmək üçün təcili yardım çağırır. Bu, doğru deyil. Ancaq təcili yardımın ödənişli olması Səhiyyə Nazirliyi gündəmində dayanan məsələ deyil, dövlət səhiyyə xidməti pulsuzdur".
O əlavə edib ki, tibbi sığortaya keçiddən sonra tibb müəssisələrinin, təcili yardımın da haradasa müəyyən hissəsinin gələcəkdə pullu olması mümkün ola bilər, ancaq bu, günün mövsuzu deyil.
Nazir müavini deyib ki, Azərbaycanda meyit orqanlarının transplantasiyası üçün bütün şərait var. O, bildirib ki, bununla bağlı qanunvericilikdə dəyişiklik olmalıdır.
E.Ağayev əlavə edib ki, meyit orqanlarının transplantasiyası həm də etik bir məsələdir: “Bu, bir qədər etik məsələdir. Bunun üçün seminarlar keçirilməli, müzakirələr davam etdirilməlidir. Çünki millətin etik normaları var ki, bunlar nəzərə alınmalıdır. Ona görə də meyitdən orqanların transplantasiyasının həyata keçirilməsi gələcəyin işidir”.
O bildirib ki, bu gün Azərbaycanda xəstəxanalarımızda orqan transplantasiyası əməliyyatları keçirilir: "Regionlarda da bu əməliyyatların həyata keçirilməsi mümkündür. Bu sahə daha da inkişaf etdirilməlidir”.
E.Ağayev Azərbaycanın xarici ölkələrin əczaçılıq şirkətlərinin ölkəmizdə əczaçılıq sənayesinə sərmayə qoymasında maraqlı olduğunu da deyib. Ancaq hər niyyət bunun həyata keçməsi demək deyil. Nazir müavinin sözlərinə görə, Yaponiyadan böyük bir əczaçılıq şirkətini təmsil edən nümayəndə heyəti Azərbaycana gəlmişdi: "Bu məsələ Yaponiya ilə Azərbaycan arasında hökumətlərarası komissiyanın da iclasında müzakirə olunmuşdu. Biz də istərdik ki, onların Azərbaycanda dərman zavodu qurmaq niyyətləri reallaşsın".
O qeyd edib ki, eyni zamanda Rusiya, İran, Almaniya və Türkiyə şirkətlərinin Azərbaycanda dərman zavodları qurmaq üçün niyyətləri var: "Ancaq bunu o zaman həyata keçmiş sayacağıq ki, gəlib zavodun təməlini qoysunlar və işə başlasınlar. Səhiyyənin bu prosesdə işi sonradır. Yəni bu sahədə icazələrdən söhbət gedir”.
E.Ağayev vurğulayıb ki, Azərbaycanda hansı dərmanlara daha çox tələbatın olması barədə İqtisadiyyat Nazirliyinin və dərman zavodu tikmək niyyətində olan şirkətlərin Səhiyyə Nazirliyi ilə məsləhətləşmələri olur: “Biz yalnız məsləhət verə bilərik. Seçim əczaçılıq şirkətlərinindir".
Nazir müavini vurğulayıb ki, Azərbaycanda əczaçılıq sənayesinin inkişafı ilə əlaqədar dövlət başçısının tapşırığı var: "İqtisadiyyat Nazirliyi bu sahədə fəaliyyət göstərir, bu məsələdə Səhiyyə Nazirliyi də köməkliyini göstərir”.
E.Ağayev onu da deyib ki, son zamanlar səhiyyə sahəsində baş verən neqativ halların aradan qaldırılması üçün lazımi tədbirlər görülür. Nazir müavini bildirib ki, səhiyyədə neqativ halların heç biri diqqətdən kənarda qalmır.
E.Ağayev bildirib ki, sözsüz ki, həkimin səhv etməsi ən az olmalıdır: "Lakin son nəticədə həkim də bir insandır. Düşünürəm ki, xəstənin kəsilməli olan ayağının yerinə sağlamın kəsilməsi həkim səhvindən çox onun səhlənkarlığından irəli gəlir. Hər kəs də gördü ki, həmin həkimlər işdən azad olundu. Hətta lazım olduğu təqdirdə gücümüz çatmadığı təqdirdə vətəndaşlara müraciət edirik ki, məhkəmələrə müraciət etsinlər. Belə hallarda cinayət işi açılır və hüquq-mühafizə orqanları tərəfindən bu məsələlər araşdırılır. Söz yox ki, istər ana və uşaq ölümü, istərsə də belə məhdud sayda olan neqativ hallar".
Nazir müavini əlavə edib ki, uşaq və ana ölümlərinin qarşısının alınması üçün də tədbirlər görülür: "Bunun aradan götürülməsi üçün önəmli məsələlərdən biri maddi-texniki bazanın yaxşılaşdırılması, tibb müəssisələrinin müasirləşdirilməsi, kadr hazırlığından ibarətdir. Bu istiqamətdə də daima işlər görülür".
