"Hesab edirəm ki, sözügedən təklif məqsədəuyğundur"
Bakı Nəqliyyat Agentliyi tərəfindən hazırlanan Bakının Vahid Nəqliyyat Konsepsiyası bu ayın sonuna qədər təqdim edilə bilər. Agentliyin İctimaiyyətlə əlaqələr şöbəsinin müdiri Nuridə Allahyarova mətbuata açıqlamasında bildirib ki, Konsepsiya artıq hazırdır: "Konsepsiyanın təsdiqi məsələsi qalıb, o da yəqin ki, yaxın vaxtlarda həllini tapacaq. Sentyabr ayının sonuna qədər konsepsiyanın ictimaiyyətə və aidiyyəti qurumlara təqdim edilməsi gözlənir".
Bundan əvvəl N.Allahyarova qeyd edib ki, konsepsiyada yol hərəkəti, sərnişindaşıma ilə bağlı qanunvericilikdən irəli gələn bütün məsələlər öz əksini tapıb.
Bununla yanaşı, N.Allahyarova bildirib ki, Bakıda yollarda sıxlığın qarşısını almaq üçün Bakı Nəqliyyat Agentliyi pik saatlarda vətəndaşların işdən çıxma vaxtının bir qədər fərqli edilməsi ilə bağlı müfaviq qurumlara təkliflər göndərib: "İş vaxtları həm saat 08:00-dan 17:00-a qədər, həm də saat 09:00-dan 18:00-a qədər müəyyən edilsin. Bu iki variantın hər ikisinin tətbiq olunması saat 18:00-da hamının eyni vaxtda işdən çıxması probleminin həllinə və tıxacın qarşısının alınmasına yardımçı olar. Nəqliyyat sistemi ilə bağlı bütün bu və digər məsələlər konsepsiyada öz əksini tapıb".
Həqiqətən də vətəndaşların eyni vaxtda işdən çıxması tıxacların yaranmasına səbəb olur ki, bu da, öz növbəsində, digər problemlərin yaranmasına birbaşa təsir göstərir. Bu zaman sərnişinlər saatlarla yollarda vaxt itirir, əsəbləri gərilir, qəza risqi və s. problemlər yaranır. Bu baxımdan iş saatı ilə bağlı təklifləri ekspertlər necə dəyərləndirir?
Sözügedən məsələ ilə bağlı fikirlərini "Bakı-Xəbər"lə bölüşən "Təhlükəsiz Yol" Alyansının koordinatoru Şahin Camalov, prinsipcə, bu təklifi dəstəklədiyini bildirdi: "Hesab edirəm ki, sözügedən təklif məqsədəuyğundur. Ona görə ki, Bakı şəhərində nəqliyyatın sıxlığı hər kəsə aydındır. Xüsusilə pik saatlarda yaranan tıxaclar bu sahədə müəyyən tədbirlərin görülməsi zərurətini ortaya qoyur. Bunlardan biri də dövlət müəssisələrində iş vaxtının dəyişdirilməsidir. Nəzərə alsaq ki, Bakı şəhərində daha çox dövlət idarə və müəssisəsi yerləşir, o zaman dövlət qurumları üçün bu məcburi olmalıdır. Çünki həmin qurumların şəhərin mərkəzində yerləşməsi və xidməti avtomobillərin olması daha çox tıxacın yaranmasına öz təsirini göstərir. Ona görə də bu yaxşı təklifdir. Buna əlavə olaraq onu qeyd etmək istəyirəm ki, bu, dövlət qurumları üçün məcburi olsa, daha yaxşı olar. Bütün bunlar nəticə etibarilə tıxacların azalmasına öz müsbət təsirini göstərəcək".
Vidadi ORDAHALLI
