"Kommunal məsələlərin həlli üzrə iş isə müvafiq rayon icra hakimiyyətlərinə tapşırılmalı, Təhsil Nazirliyinin büdcəsi kommunal məsələlərə sərf olunmamalıdır"
Xəbər verildiyi kimi, Azərbaycanda "Məktəbəqədər təhsil haqqında" yeni qanun layihəsi Milli Məclisin payız sessiyasında müzakirəyə çıxarılacaq. Bu barədə Milli Məclisin Elm və təhsil komitəsinin sədr müavini Bəxtiyar Əliyev mediaya açıqlamasında bildirib.
Onun sözlərinə görə, qanun layihəsi üzərində Təhsil Nazirliyi, ekspertlərlə birgə ciddi iş aparılır: "Qanun layihəsinin ilkin variantı artıq hazırdır. Yəqin ki, ilkin variant Elm və təhsil komitəsinin iclasında müzakirə olunduqdan sonra Milli Məclisin payız sessiyasının gündəliyinə çıxarılacaq".
B.Əliyevin dediyinə görə, Təhsil Nazirliyi tərəfindən həyata keçirilən islahatlar nəticəsində məktəbəqədər hazırlıq üçün çox münbit şərait yaranıb: "2013-cü ildə təhsilin inkişafı ilə bağlı Milli Strategiya təsdiq edilmişdi. Sənəddə əsas istiqamətlərdən biri də məktəbəqədər təhsil məsələsi idi. Bu gün Təhsil Nazirliyi bu sahədə böyük işlər görüb. Ona görə də qanunvericilik bazasının daha da möhkəmləndirilməsi üçün belə bir qanunun işlənməsinə ehtiyac var idi".
Ekspertlər hesab edir ki, Milli Məclisin payız sessiyasında "Məktəbəqədər təhsil haqqında" yeni qanun layihəsi nəzərdən keçirilərkən bağçaların yenidən Təhsil Nazirliyinə verilməsi məsələsi də müzakirə olunacaq. Onların fikrincə, bağçalar təhsil müəcsisəsi sayıldığı üçün yenidən Təhsil Nazirliyinin tabeliyinə verilməlidir.
Təhsil eksperti Məlahət Mürşüdlü "Bakı-Xəbər"ə açıqlamasında qeyd etdi ki, məktəbəqədər təhsil müəssisələrinin Təhsil Nazirliyinə verilməsinin tərəfdarıdır. Amma kommunal məsələlərin həlli üzrə iş isə müvafiq rayon icra hakimiyyətlərinə tapşırılmalıdır: "Pedaqoji keyfiyyət baxımından təminat məsələlərinin həlli Təhsil Nazirliyinə həvalə olunmalıdır. Məsələn, bağça müdirinin və ya tərbiyəçilərin təyinatı, onların səviyyəsinin artırılması işi adıçəkilən nazirliyə tapşırılmalıdır. Kadrların peşəkarlıq səviyyəsinin artırılması baxımından bu məsələyə yenidən baxılmalıdır. Təlim-tərbiyənin keyfiyyətinin artırılması üçün bağçalar Təhsil Nazirliyinin ixtiyarına verilərsə, bu sahədə irəliləyişlər müşahidə olunar. Ancaq bağçaların təmiri və ya müasir avadanlıqlarla təmin olunması məsələsini isə yerli icra orqanları həyata keçirməlidir. Təhsil Nazirliyinin büdcəsi kommunal məsələlərə sərf olunmamalıdır".
Günel CƏLİLOVA
