"Hansısa ərazidə olan piyada zolağının rəngi silinibsə, vətəndaşlar bu məsələ ilə məşğul olan müvafiq idarələrə dərhal müraciət etməlidir"
Piyadaların rahatlığı üçün şəhər yollarında yeraltı və yerüstü keçidlər var. Piyada onun üçün nəzərdə tutulan piyada keçidindən istifadə etmirsə, cərimələnir.
Bu gün şəhərlərimizin əksər küçələrində piyada zolaqları da mövcuddur. Piyadalar həm öz təhlükəsizliyi, həm də cərimələnməmək üçün həmin zolaqlardan istifadə edir.
Hazırda paytaxtın bəzi küçələrində olan piyada zolaqlarının rəngi solub və görünməz vəziyyətdədir. Belə olan halda, həm həmin yoldan istifadə edən sürücülər və həm də piyadalar əziyyət çəkir. Sürücü yolda piyada zolağının olduğunu görməyib qəza hadisəsi törədə bilər. Piyada isə həmin qəza hadisəsində zədələnə bilər və ya həyatını itirər.
Məsələ ilə bağlı fikir bildirən ekspert Azər Allahverənov "Bakı-Xəbər"ə açıqlamasında qeyd etdi ki, piyada zolaqlarının rəngi mütəmadi yenilənməlidir: "Eyni yoldan mütəmadi istifadə edən sürücülər piyada zolağının hansı istiqamətdə olmasını bilir. Həmçinin, gündəlik eyni yoldan istifadə edən piyada da hansı ərazidə piyada keçidinin olmasından xəbərdardır".
Ekspertin sözlərinə görə, rəngi silinən piyada zolağında hər hansı bir xoşagəlməz hadisənin baş verməsi mümkündür: "Hansısa nəqliyyat vasitəsi piyada zolağını görməyib qəza hadisəsi törədirsə və həmin hadisədə piyada xəsarət alırsa, o zaman aidiyyəti qurumlar hadisəni dəqiqliklə araşdırmalıdır. Araşdırma zamanı piyada zolağının rənginin silinməsi aşkar olunarsa, sürücünün həmin keçiddən xəbərsiz olmasını sübut etmək olduqca çətin məsələdir".
Piyada zolaqlarının vaxtında rənglənməməsinə gəlincə, A.Allahverənov qeyd etdi ki, bu məsələyə aidiyyəti qurumlar nəzarət etməlidir: "Bu işdə məsuliyyət təkcə müvafiq qurum işçilərinin deyil, eyni zamanda, vətəndaşların da üzərinə düşür. Hansısa ərazidə olan piyada zolağının rəngi silinibsə, vətəndaşlar bu məsələ ilə məşğul olan müvafiq idarələrə dərhal müraciət etməlidir.
Həmsöhbətimiz qeyd etdi ki, təhsil müəssisələrinin qarşısında olan piyada zolaqları tədris ili başlanmazdan öncə rənglənir.
Günel CƏLİLOVA
