"Sentyabr ayı bitənə qədər bütün məktəblərdə şagirdlərin hər biri dərsliklərlə təmin olunur"
Yeni tədris ilinin başlamasına sayılı günlər qalmasına baxmayaraq, bəzi valideynlər övladının oxuyacağı dərslikləri hələ də ala bilməyib. Bəllidir ki, artıq neçə ildir dərsliklər şagirdlərə məktəblər tərəfində pulsuz olaraq verilir. Qaydaya əsasən, tədris müəssisəsində neçə məktəbli təhsil alacaqsa, onların hər birinə bütün dərsliklər verilməlidir. Artıq əksər məktəblərdə şagirdlərə dərsliklər paylanıb. Ancaq bəzi məktəblərdə övladı təhsil alan valideynlər bildirir ki, dərsliklər verilməyib. Valideynlərə məktəb tərəfindən bildirilib ki, dərsliklərin sayı azdır, gətirilərsə, uşaqlara paylanacaq.
Məsələ ilə bağlı təhsil eksperti Rafiq İsmayıla müraciət etdik. O, "Bakı-Xəbər"ə açıqlamasında qeyd etdi ki, məktəblərdə dərslik çatışmazlığı problemi hər il yaşanır: "Bunun məlum səbəbləri var. Belə ki, dərs başlamazdan öncə şagirdlərin bir qismi başqa məktəbə köçürülür. Belə olan halda, bir məktəbdə tədris alması nəzərdə tutulan şagirdlərin kitabları artıq olur. Hansı məktəbə ki, uşaq çox köçürülüb, orada dərslik çatışmazlığı yaşanır. Ancaq bu çatışmazlıq uzun müddət yaşanmır. Hansı məktəbdə dərslik problemi varsa, tədris müəssisəsinin məsul işçiləri Təhsil Nazirliyinə məlum məsələ ilə bağlı müraciət edir. Beləliklə, müəyyən müddət ərzində məktəbin dərslik problemi həll olunur".
Həmsöhbətimizin sözlərinə görə, tək yuxarı siniflərdə deyil, analoji problem birincilərdə də yaşanır: "Birinci siniflərdə belə vəziyyət müşahidə olunur. Sentyabr ayı bitənə qədər bütün şagirdlər dərsliklə təmin olunur".
R.İsmayıl bildirdi ki, əvvəllər kitabları valideynlər alırdı: "Hər ailənin büdcəsi imkan vermirdi ki, o, uşağının bütün dərsliyini tam olaraq alsın. Ancaq indi belə bir problem yoxdur. Orta məktəblərdə təhsil alan bütün şagirdlərə kitablar dövlət tərəfindən verilir. Beş gün gec və ya tez bütün məktəblilər dərsliklə təmin olunur. Yetər ki, uşaqlar həmin kitablarda qeyd olunanları öyrənsin".
Günel CƏLİLOVA
