"Din adı altında Azərbaycan dövlətçiliyinə yarana biləcək hər hansı bir təhlükənin vaxtında zərərsizləşdirilməsi baxımından zəruri addımdır"
Azərbaycanda ibadətgahlardan kənarda və ictimai yerlərdə dini şüarların səsləndirilməsi, dini atributların və dini bayraqların nümayişi qadağan olunur. Bununla məşğul olan əcnəbilər maliyyə sanksiyası tətbiq olunmaqla ölkədən deportasiya ediləcək.
Bununla bağlı Azərbaycan Prezidentinin təqdimatı ilə İnzibati Xətalar Məcəlləsinə yeni 516.0.3 maddəsi təklif olunur. Yeni maddəyə görə, ibadətgahlardan kənarda, ictimai yerlərdə dini şüarların və digər dini atributların (şəxsin üstündə gəzdirdiyi dini atributlar istisna olmaqla) nümayiş etdirilməsi, dini bayraqların ibadətgahların, dini mərkəz və idarələrin qapalı yerlərindən kənar yerləşdirilməsi qadağan olunur. Bu qadağalar pozulduğu təqdirdə vətəndaşlar 2000 manatdan 2500 manata qədər, vəzifəli şəxslər 8000 manatdan 9000 manata qədər, hüquqi şəxslər isə 20 000 manatdan 25 000 manata qədər cərimə olunacaq. Əcnəbilər və vətəndaşlığı olmayan şəxslər 2000 manatdan 2500 manata qədər cərimə edilməklə, Azərbaycan ərazisindən inzibati qaydada çıxarılacaq.
Layihə Milli Məclisə təqdim olunub və parlamentin növbəti iclasında müzakirəyə çıxarılacaq.
Məlum layihə barədə fikir bildirən şərqşünas Seyid Camal Əzimbəyli "Bakı-Xəbər"ə açıqlamasında qeyd etdi ki, dini dəyərlərin yeganə təəssübkeşi Azərbaycan dövlətidir: "Bu gün ölkə başçısının təşəbbüsünü birmənalı olaraq təqdir edirəm. Biz dünyəvi ölkə olsaq da, milli kimliyimizlə bərabər dini kimliyimizlə vəhdət tanıyır. Amma etiraf etmək lazımdır ki, bizim dini kimliyimizdən, duyğularımızdan istismar etmək istəyənlər var. Onların bir qismi milli dönüklərdir, qalanları isə əcnəbilərdir. Kimsə dindən və ya onun atributlarından istifadə edib ölkəmizə qarşı xoşagəlməz hərəkət edərsə, onlar qanun qarşısında cavab verməli olacaq.
Düşünürəm ki, Azərbaycanda din adı altında yad düşüncələrdən istifadənin qarşısı alınacaq. Beləliklə, gənclər həmin qrupların üzvü olmayacaq".
Həmsöhbətimizin sözlərinə görə, qardaş Türkiyədə baş vermiş hadisələr bir daha sübut etdi ki, din adından istifadə edənlər insanların şüuruna, düşüncəsinə, həyat tərzinə daxil olaraq dövlətin içərisinə daxil olublar.
S.C.Əzimbəyli bildirdi ki, din adı altında yarana biləcək hansısa təhlükənin qarşısını almaq üçün belə bir addım atmaq lazımdır: "Din adı altında Azərbaycan dövlətçiliyinə yarana biləcək hər hansı bir təhlükənin vaxtında zərərsizləşdirilməsi baxımından zəruri addımdır".
Günel CƏLİLOVA
