Çingiz Hüseynov: "Çimərlik turizmini inkişaf etdirmək üçün sanitar-gigiyenik vəziyyətə xüsusi nəzarət olunmalıdır"
Hazırda ölkəmizdə turizm sahəsinin inkişaf etdirilməsi əsas prioritet məsələlərdən biridir. Ölkə başçısı İlham Əliyev bir neçə gün öncə turizmin inkişafı ilə bağlı Sərəncam imzalayıb. Həmin Sərəncamda çimərlik turizminin inkişaf etdirilməsinə də yer ayrılıb.
Sərəncama əsasən, Mədəniyyət və Turizm Nazirliyinə İqtisadiyyat Nazirliyi və Əmlak Məsələləri Dövlət Komitəsi ilə birlikdə Xəzər dənizinin (gölünün) Azərbaycan Respublikasına mənsub olan bölməsindən turizm məqsədləri üçün daha səmərəli istifadə etməklə çimərlik turizminin inkişafına dair təkliflərini hazırlayıb üç ay müddətində Azərbaycan Prezidentinə təqdim etmək tapşırılıb.
Maraqlıdır, çimərlik turizminin inkişaf etməsi üçün hansı təkliflər irəli sürülə bilər?
Azərbaycan Sağlamlıq və Termal Turizmə Dəstək Assosiasiyasının sədri, turizm sahəsi üzrə ekspert Ruslan Quliyev "Bakı-Xəbər"ə açıqlamasında qeyd etdi ki, turizmin inkişaf etdirilməsi üçün ölkə başçısı İlham Əliyevin məlum Sərəncamı təqdirəlayiqdir: "Turizmlə bağlı müəyyən standartların tətbiq olunmasına ehtiyac var. Çimərliklərdə bir neçə qayda var ki, onların tətbiq olunmasına ehtiyac var. Əsas istiqamətlər təhlükəsizlik, sonra suyun təmizliyi və turistlərin məlumatlandırılmasıdır. Xatırladım ki, sovet dönəmində yalnız Baltikyanı respublikalar üçün mavi bayraq mövcud olub. Mavi bayraq dünya əmtəə keyfiyyəti nişanı sayılır. Zənnimcə, Azərbaycanda da mavi bayraq standartının tətbiq olunmasına ehtiyac var".
Həmsöhbətimizin sözlərinə görə, turistlərin istirahəti, təhlükəsizliyi və sağlamlığı nəzərə alınmalıdır.
R.Quliyev xüsusi olaraq vurğuladı ki, çimərliyə giriş pulsuz olmalıdır: "Çimərlikdə əlavə xidmətlər olarsa, bu, kommersiya şərtlərinə uyğun şəkildə aparılmalıdır".
Turizm sahəsi üzrə ekspert Çingiz Hüseynov qəzetimizə açıqlamasında qeyd etdi ki, çimərlik turizmini inkişaf etdirmək üçün ilk növbədə sanitar-gigiyenik və xidmət qaydalarına əməl olunmalıdır: "Çimərliklərin ayrı-ayrı sahibkarlar tərəfindən hasara alınmasının qarşısı alınmalıdır. Həmçinin, çimərliklərdə əhalinin oturacaqlardan və digər lazım olan əşyalardan istifadəsi üçün 10-20 manat dəyərində pul tələb olunmasının da qarşısı alınmalıdır.
Turistlərin rahatlığı üçün bütün çimərliklərdə geyim üçün xüsusi kabinalar olmalıdır. Çimərliklər zibillənir. Bunun səbəbi isə zibil qutusunun olmamasıdır. Çimərliklərin sanitar-gigiyenik vəziyyətinə xüsusi nəzarət olunmalıdır.
Bəllidir ki, bu gün bəzi çimərliklərin ərazisinə çirkab sular axıdılır. Hansısa ərazinin kanalizasiya xətti birbaşa sahilə yönləndirilib. Kanalizasiya borusu sahil xəttindən ən azı 400 metr aralıdan suya axıdılmalıdır. Təəssüf ki, boru ilə sahil xəttinin arasında 2 metr məsafə belə yoxdur. Çirkab sular dənizdə sahilə yaxın sahədə cəmləşir. Belə olan təqdirdə müxtəlif növ mədə-bağırsaq və infeksion xəstəliklər yaranır".
Günel CƏLİLOVA
