"Turizmin inkişafı baxımından bu sahədə çalışan hər bir personal öz işindən xəbərdar olmalıdır"
Qeyri-neft sektorunun sürətlə inkişafına nail olmaq, rəqabət qabiliyyətini artırmaq Azərbaycan dövlətinin başlıca prinsiplərindən biridir. Qeyri-neft sektorunun inkişafına nail olmaq üçün ölkə başçısı İlham Əliyev dəfələrlə bu məsələyə toxunaraq göstərişlər verib.
Sentyabrın 1-də Prezident İ.Əliyev turizmin inkişafı ilə bağlı əlavə tədbirlər haqqında Sərəncam imzalayıb.
Sərəncamda turizmin inkişafı üçün lazım olacaq bütün detallar nəzərə alınıb.
Adıçəkilən sahənin inkişaf etməsi üçün ölkədə turizm üzrə ilk peşə-ixtisas təhsilinin təşkilinə başlanacaq.
Azərbaycanda Mədəniyyət və Turizm və Təhsil nazirlikləri birgə turizm və rekreasiya zonalarında turizm üzrə ilk peşə-ixtisas təhsili müəssisələri (peşə məktəbləri və peşə liseyləri) yaradacaq. Bu məsələ dövlət başçısının turizmin inkişafı ilə bağlı əlavə tədbirlər haqqında Sərəncamında əks olunub. Sənədə əsasən, yeni peşə-ixtisas təhsil müəssisələri Turizm və Menecment Universitetinin nəzdində təşkil ediləcək. Prezident bu məqsədlə müvafiq torpaq sahəsinin və əmlakın ayrılması ilə bağlı tədbirlərin görülməsi ilə bağlı aidiyyəti dövlət qurumlarına müvafiq tapşırıqlar verib.
Turizm sahəsi üzrə ekspert Çingiz İsmayılov "Bakı-Xəbər"ə açıqlamasında qeyd etdi ki, turizmin inkişafı ilə bağlı ölkə başçısının məlum Sərəncamı bu sahənin dirçəlməsinə səbəb olacaq. Onun sözlərinə görə, turizm sektorunda tək ali təhsilli deyil, eyni zamanda orta təhsilli işçilər də lazımdır: "Bizə hər bir sahədə ixtisaslaşmış mütəxəssislər lazımdır. Məsələn, ofisiantlar üçün xüsusi tədris mərkəzləri olacaq. Ofisiant olmaq istəyənlər həmin mərkəzlərdə bu peşənin sirlərini öyrənəcək. Gəlin etiraf edək ki, ofisiantların əksəriyyəti işə ehtiyacı olan və bu sahədən heç anlayışı olmayanlardır. Xidmət personalı, demək olar ki, savadsızdır. Bu sahədə bilikləri və səriştələri yoxdur. Turizmin inkişafı baxımından bu sahədə çalışan hər bir personal öz işindən xəbərdar olmalıdır. Bunun üçün turizmlə bağlı peşə-ixtisas təhsil müəssisələrinin yaradılması zəruridir".
Həmsöhbətimiz hesab edir ki, müvafiq peşə-ixtisas təhsili müəssisələrinin yaradılması bu sahənin inkişafına təkan verəcək. Bu Sərəncam xüsusi orta təhsilli mütəxəssislərin hazırlanmasında mühüm rol oynayacaq.
Günel CƏLİLOVA
