"Virus xəstəliklərinin kəskin hal almasının əsas səbəbi kifayət qədər vitamin qəbul edilməməsidir"
Ötən il Azərbaycanda 397 777 nəfərin qrip və yuxarı tənəffüs yollarının kəskin infeksiyasına yoluxması halı qeydə alınıb. Dövlət Statistika Komitəsinin statistik göstəricilərinə əsasən, ötən il 14 306 nəfərdə ümumi kəskin bağırsaq infeksiyaları, 329 nəfərdə viruslu hepatitlər, 11 645 nəfərdə suçiçəyi, 329 nəfərdə salmonelyoz infeksiyaları, 311 nəfərdə qoturluq, 9 nəfərdə qarayara, 341 nəfərdə bruselyoz, 168 nəfərdə skarlatin qeydə alınıb.
Statistik məlumatlara görə, qeyd edilən bütün xəstəliklər üzrə xəstələnmə hallarının sayı 2014-cü ilə nisbətən azalsa da, qoturluq və bruselyozla xəstələnmə halları artıb.
2014-cü ildə 225, 2015-ci ildə 311 nəfərdə qoturluğa yoluxma halı, 2014-cü ildə 337, 2015-ci ildə isə 341 nəfərdə bruselyozla xəstələnmə halı qeydə alınıb.
Kəskin infeksion xəstəliklərin artması barədə fikir bildirən professor, həkim-ekspert Adil Qeybulla "Bakı-Xəbər"ə açıqlamasında qeyd etdi ki, virus xəstəliklərinin kəskin hal almasının əsas səbəbi kifayət qədər vitamin qəbul edilməməsidir: "İnfeksion xəstəliklər arasında virus xəstəlikləri də mühüm rol oynayır. Həm fəsil dəyişməsi, həm immun sisteminin zəifləməsi və eyni zamanda orqanizmin kifayət qədər vitamin qəbul etməməsi virus xəstəliklərinin artmasına səbəb olur. Adətən bu vaxtlar virus xəstəliklərinin artan vaxtıdır. Çünki fəsil dəyişkənliyi olur və orqanizmdə müxtəlif proseslər baş verir".
A.Qeybullanın sözlərinə görə, bəzən bütün infeksion xəstəlikləri qriplə səhv salırlar. Əslində isə bu, qrip deyil: "Yuxarı tənəffüs yollarında xeyli mikroblar var ki, bu vaxt onlar fəallaşaraq qripə bənzər xəstəliklərin yayılmasına səbəb olur. Xəstəliyin əlamətləri qripə bənzədiyi üçün bəzən buna el arasında qrip deyirlər və kifayət qədər məsuliyyətli yanaşmırlar. Bu, yuxarı tənəffüs yollarında fəallaşan infeksiyalardır ki, qripə bənzər əlamətlərlə özünü büruzə verir. Bunun qarşısını almaq üçün yaz və yay fəslində daha çox tərkibi vitaminlərlə zəngin olan qidaların qəbul edilməsi vacibdir".
Həmsöhbətimiz onu da diqqətə çatdırdı ki, virus xəstəlikləri orqanizmdə müxtəlif ağırlıqda fəsadlara gətirib çıxara bilər: "Son zamanlar viruslar kəskin şəkildə yayılıb. Bu həm böyüklər, həm də kiçik yaşlı uşaqlar üçün aktualdır. İmmun sisteminin dəyişməsi orqanizmin həssaslığını daha da artırır. Ona görə də yaydan payıza və qışdan yaza keçərkən virusların inkişafı üçün əlverişli şərait yaranır. Bu zaman orqanizm çox zəif olur və xəstəliyə daha davamsız olur. Ona görə həm antivirus dərmanlardan, həm də tərkibində vitaminlər olan qidalardan və meyvə şirələrindən istifadə etmək lazımdır. Kimin bədənində hansı xəstəlik varsa, onun üstünə daha çox düşməlidir. Çünki bu viruslar adətən xəstə orqanlara daha çox ziyan vurur. Bu cür viruslar orqanizmdə fəsadlar törədir və əsasən insanın ağ ciyərini zədələyir. Öncədən qarşısı alınmazsa, kiçik yaşlı uşaqların boğazında müxtəlif xəstəliklər törəyə bilər. Adətən bu virusların qarşısını almaq mümkün olmur. Çünki onlar hava-damcı vasitəsilə ətrafa yoluxur. Bunun qarşısını isə yalnız orqanizmin immun sistemini gücləndirməklə almaq olar. Virusa yoluxduqdan sonra isə xəstəliyin əleyhinə dərman və iynə qəbulu vacibdir. Xüsusilə immun sistemini möhkəmləndirən dərmanların qəbulu çox vacibdir. Lakin dərman vasitələri ilə yanaşı, bu virusların müalicəsində təbii vasitələrdən istifadə olunması da orqanizmə xeyli faydalıdır. Bəzən antibiotiklərdən istifadənin faydasının olmadığını və onların təhlükəli olduğunu deyirlər. Virusa yoluxmuş şəxsin temperaturu 3 gündən artıq davam edərsə, antibiotiklərdən mütləq istifadə etmək lazımdır. Bu xüsusilə yuxarı tənəffüs yollarında və ağ ciyərlərdə fəsadların qarşısının alınması üçün çox vacibdir".
Günel CƏLİLOVA
