"Belə sürücülərə dağ yollarında sərnişinləri, turistləri etibar etmək təhlükəlidir"
Daxili İşlər Nazirliyinin Baş Dövlət Yol Polisi İdarəsi respublika ərazisində sərnişindaşıma fəaliyyəti ilə məşğul olan hüquqi və fiziki şəxslərə təkrar müraciət ünvanlayıb.
İdarədən verilən məlumata görə, yay mövsümü ilə əlaqədar ayrı-ayrı regionlara səyahətə çıxan vətəndaşların, eləcə də ölkəmizə istirahətə gələn xarici turistlərin sayı artdığından, yollarda nəqliyyatın hərəkət intensivliyi də yüksəlib. Səfərə çıxanlar fərdi minik avtomobilləri ilə yanaşı, marşrut avtobuslarından, bəzi hallarda isə qeyri-müntəzəm şəkildə sərnişindaşıma fəaliyyəti ilə məşğul olan hüquqi və fiziki şəxslərə məxsus avtobus və mikroavtobuslardan istifadə edir. Lakin qeyri-müntəzəm şəkildə təşkil edilmiş daşımalar zamanı nəqliyyat vasitələrinin texniki vəziyyətinə, sürücülərin reysqabağı tibbi müayinəsinə, onların iş rejiminə riayət etməsinə nəzarət olunmur, nəqliyyat vasitəsinin texniki xarakteristikasının keçdiyi ərazinin relyefinə uyğun olub-olmamasına diqqət yetirilmir ki, bu da yollarda, xüsusilə dağlıq ərazilərdə yol-nəqliyyat hadisələrinin başvermə ehtimalını artırır.
Baş verə biləcək ağır qəzaların qarşısının alınması və təhlükəsizliyin təmin olunması məqsədilə Daxili İşlər Nazirliyinin Baş DYP İdarəsi qeyri-müntəzəm şəkildə sərnişin daşımalarının müasir, təhlükəsizlik elementləri ilə təchiz olunmuş xüsusi avtobuslara malik turizm, yaxud sifarişli sərnişindaşıma xidmətləri göstərən şirkətlər vasitəsilə həyata keçirilməsinə üstünlük verilməsini məqsədəmüvafiq hesab edir, belə xidmətlər ayrı-ayrı şəxslər tərəfindən təklif edildikdə isə onların müşayiət olunması və daşımalarda istifadə olunacaq nəqliyyat vasitəsinin seçilmiş marşrutlara uyğunluğu barədə məlumat əldə edilməsi üçün Baş DYP İdarəsinin 902 "qaynar xətt" telefonuna müraciət olunmasını və ya BDYPİ-nin elektron poçtuna yazılı müraciət göndərilməsini tövsiyə edir.
Sözügedən məsələni dəyərləndirən ekspert İlqar Hüseynli hesab edir ki, marşrut sahibləri bu xəbərdarlıqdan ciddi nəticə çıxarmalıdır: "Çünki burada sərnişinlərin həyatından söhbət gedir. Xeyli sayda avtobus sürücüsü var ki, onların sürücülük vəsiqəsi yoxdur. Belə ki, sərnişindaşıma işi ilə bağlı fəaliyyət göstərən özəl şirkətlər kütləvi şəkildə sürücülük vəsiqəsinə malik olmayan insanları işə götürür. Halbuki, onların əksəriyyətinin yol hərəkəti qaydalarından heç bir məlumatı yoxdur. Belə sürücülərə dağ yollarında sərnişinləri, turistləri etibar etmək təhlükəlidir. Birinci növbətə marşrut sahiblərinin üzərinə böyük məsuliyyət düşür. Çünki sürücüləri onlar işə götürür. Onlar sürücülərin tələblərə cavab verib-verməməsinə diqqət etməlidir. Dünya təcrübəsində sərnişindaşıma ilə məşğul olan şirkətlər sürücüləri işə götürərkən müəyyən qaydalarla onları test etmək üsulu ilə attestasiyadan keçirir. Lakin təəssüf ki, hələlik bizdə bu cür mexanizmlər tətbiq olunmayıb. Bununla yanaşı, qəzaların qarşısını almaq üçün daha ciddi tədbirlər həyata keçirmək lazımdır. Çünki qəzalardan sonra sərnişindaşıma ilə məşğul olan özəl şirkətlər çox zaman məsuliyyətdən kənarda qalır. Ona görə də hər qəzaya görə şirkətlər cərimə olunarsa, onlar öz işlərinə daha məsuliyyətli yanaşar, sürücülərin peşəkarlığının artırılması yönündə işlər görər. Hər kəsə məlumdur ki, ölkədə yol hərəkəti qaydalarını pozan sürücülər üçün cərimələr artırıldıqdan sonra bu cür halların sayı azaldı. İndi bu cərimələr şirkətlər üçün tətbiq edilərsə, çox güman ki, avtobus qəzalarının da sayı azalmış olar.
Vidadi ORDAHALLI
