"Əlil kişi əlil qadınla ailə qurduğu üçün onların övladları da fiziki qüsurlu olaraq dünyaya gəlir"
1 yaşına qədər əlil uşaqların sayı 40 faiz artıb. 2015-ci ildə Səhiyyə Nazirliyinin Uşaq Bərpa Müalicə Mərkəzinə (UBMM) (ilk dəfə müraciət etmiş) 98 xəstə daxil olub. Səhiyyə Nazirliyinin məlumatına görə, 2016-cı ilin ilk 6 ayı ərzində isə bu göstərici 88 xəstə təşkil edib.
2015-ci ilin ilk 6 ayı ərzində UBMM-ə ümumi gəlişlərin (ilk və növbəti gəliş) sayı 19661 təşkil edirdisə, 2016-cı ilin 6 ayı ərzində bu rəqəm 20612-yə çatıb.
Qeyd edək ki, Səhiyyə Nazirliyinin 2014-2020-ci illər üzrə Strateji Planına əsasən, uşaqlıq dövrünə xas olan əlilliyin profilaktikası və müalicəsi sahəsində aparılan işlərə baxmayaraq, UBMM-ə müraciət edən 1 yaşına qədər olan uşaqların sayının əvvəlki ilə nisbətdə 40 % artması müşahidə olunur.
Bildirək ki, mərkəzdə bərpa müalicəsinə ehtiyacı olan 18 yaşına kimi uşaqlar çoxprofilli, yüksək dərəcəli ixtisaslaşdırılmış müalicə kursu keçir. Xəstələr mərkəzə sahə poliklinikaları tərəfindən göndərilir.
UBMM-də müalicə alan uşaqların 40 %-i sinir sistemi xəstəliklərindən, 30 %-i dayaq hərəkət sistemi xəstəliklərindən, 20 %-i yuxarı və aşağı tənəffüs sistemi xəstəliklərindən, 10 %-i müxtəlif xəstəliklərdən əziyyət çəkir.
Uşaqlar arasında əlilliyin artması ölkə ictimaiyyətində narahatlıq doğurur.
Əlil Qadınlar Cəmiyyətinin rəhbəri Məhluqə Rəhimova "Bakı-Xəbər"ə açıqlamasında uşaqlar arasında əlilliyin artmasını təsdiq etdi. Onun sözlərinə görə, hazırda Azərbaycanda 62 min əlil uşaq var: "Bu rəqəm olduqca böyükdür və bu sayın artması gözləniləndir. Uşaqlar arasında əlilliyin artmasının ilkin səbəbi valideynlərlə bağlıdır. Analar hamiləlik dönəmində həkim qəbulunda olmayıb. Onların bətnlərində inkişaf edən döldə hansı problemin olmasından xəbərsiz olublar. Onlar vaxtlı-vaxtında həkim qəbulunda olsalar, uşaqlarımız sağlam doğular. Uşaqlar arasında əlilliyin artması sosial problemdir".
Həmsöhbətimiz onu da əlavə etdi ki, əlil uşaqlara daha çox
rayonlarda rast gəlinir: "Əlil insanların sayının artmasının bir səbəbi də əlillərin cəmiyyətə inteqrasiya edə bilməməsidir. Əlil kişi əlil qadınla ailə qurduğu üçün onların övladları da fiziki qüsurlu olaraq dünyaya gəlir. Beləliklə, əlil uşaqların sayı artır. Ölkəmizdə fiziki imkanları məhdud olan insanlar sağlam insanlarla ünsiyyət qurmaqda çətinlik çəkir. Buna görə də əlil öz əlil yoldaşı ilə ünsiyyət qurur və evlənir. Bu da genetik xəstəliklərin yaranmasına səbəb olur. Onların fiziki imkanları məhdud olmayan insanlarla ailə qurması imkansızdır".
Əlil Qadınlar Cəmiyyəti sədrinin sözlərinə görə, əlil qadınlar hamilə olduğu zaman vaxtlı-vaxtında müayinə olunmur və bir çox hallarda əlil ananın dünyaya gətirdiyi uşaq da fiziki qüsurlu olaraq doğulur: "Qüsurlu insanların vaxtında müayinə olunmaması nəticəsində xəstəliklər yayılır və onların sayında çoxalma müşahidə olunur. Xəstəliyin ana bətnində aşkarlanıb müayinə olunması üçün insanlar vaxtlı-vaxtında müayinə olunmalıdır. Əlillərin əksəriyyəti ailə qurduqdan sonra hamilə olarkən həkim müayinəsindən keçmir və irsi olduğu üçün çox zaman onun dünyaya gətirdiyi uşaq da fiziki qüsurlu olur".
Günel CƏLİLOVA
