"Uşaqlarda görmə qabiliyyətinin zəifləməsi onların günün çox hissəsini qapalı məkanlarda keçirməsi ilə əlaqədardır"
Bir az müşahidə etmək kifayətdir ki, eynəkli uşaqların sayının günü-gündən artdığını görək. Xəstəliklərmi uşaqlaşır, yoxsa valideynlərin diqqət etmədiyi məqamlar bu sayı artırır?
Açıqlanın rəsmi məlumatlarda uşaqlar arasında göz xəstəliklərinin sayının artdığı qeyd olunur.
Azərbaycanda ötən il ərzində yaşı 18-dək olan 800 mindən artıq uşağa ilk dəfə müxtəlif xəstəliklər üzrə diaqnoz qoyulub.
Dövlət Statistika Komitəsinin məlumatında qeyd olunur ki, uşaqların əksəriyyətində-396 138 nəfərində tənəffüs orqanları xəstəlikləri olub.
İlk dəfə qoyulmuş diaqnozla xəstə kimi qeydiyyata alınan uşaqların 71 507 nəfərində infeksion və parazitar xəstəliklər qeydə alınıb.
Uşaqların 63 751 nəfərində həzm sisteminin, 39 532-də sinir sistemi, 36 866-da qan xəstəlikləri, qanyaradıcı orqanların xəstəlikləri və immun mexanizmin prosesə cəlb olunması ilə gedən ayrı-ayrı pozuntular müşahidə edilib.
Uşaqlar arasında göz və gözün əlavə aparatının xəstəlikləri də çox rast gəlinən xəstəliklərdəndir. Ümumiyyətlə, göz xəstəlikləri diaqnozu qoyulmuş uşaqların sayı 2010-cu illə müqayisədə artıb. 2015-ci ildə belə uşaqların sayı 2014-cü illə müqayisədə az olsa da, ötənilki göstərici yenə də 2010-cu ildəki sayı üstələyib. 2010-cu ildə ilk dəfə göz və gözün əlavə aparatının xəstəlikləri diaqnozu qoyulmuş uşaqların sayı 20 773 olduğu halda, 2014-cü ildə onların sayı 34 176 nəfər, 2015-ci ildə isə 31 823 nəfər olub.
2010-cu ildə 18 yaşadək uşaqların hər 10 000 nəfəri arasında ilk dəfə göz və gözün əlavə aparatının xəstəlikləri diaqnozu qoyulmuş uşaqların sayı 81,4 nəfər olduğu halda, 2014-cü ildə bu rəqəm 133,7 nəfər, 2015-ci ildə 123,5 nəfər olub.
Uşaqlar arasında göz xəstəliklərinin artması böyük narahatlıq doğurur.
Göz həkimi Aynur Əliyeva bizimlə söhbətində bildirdi ki, uşaqlar arasında göz xəstəliklərinin artmasının müxtəlif səbəbləri var: "Əsas səbəblərdən biri uşaqların elektron cihazlara marağının artmasıdır. Günün əsas hissəsini kompyuter və ya mobil telefon qarşısında keçirən uşaqların görmə qabiliyyəti zəifləyir. Təəssüf ki, bəzi valideynlər uşaqlarının elektron cihazlardan mütəmadi istifadə etməsinə göz yumur".
Həmsöhbətimiz digər səbəb kimi uşaqların vaxtının əsas hissəsini qapalı məkanlarda keçirməsini göstərdi. Onun sözlərinə görə, uşaqların qapalı məkanlarda çox olması onların gözünün inkişafdan qalmasına səbəb olur: "Yəni uşaqlar gözün baxa biləcəyi uzaqlıqda dalğaları qəbul etməlidir".
Günel CƏLİLOVA
