"Avtomobili idarə edənlərin sürücülük mədəniyyəti artmalıdır"
"Bu ilin 6 ayı ərzində yol hərəkəti qaydalarının pozulması nəticəsində 40,2 milyon manat məbləğində cərimələrin tətbiq edilməsi barədə məlumat həqiqəti əks etdirir. Məlumat üçün əlavə olaraq onu da deyə bilərəm ki, 8 ay ərzində isə respublika üzrə 2 100 000 yol hərəkəti qaydası əleyhinə olan inzibati xəta aşkarlanaraq sənədləşdirilib. Bu inzibati xətalara görə 58,5 milyon manat məbləğində cərimələr tətbiq edilib".
Bunu mətbuata açıqlamasında Daxili İşlər Nazirliyinin mətbuat xidmətinin rəis müavini Ehsan Zahidov deyib. Onun sözlərinə görə, qayda pozuntularının 65 faizi məhz foto-video qeydiyyat funksiyasına malik olan xüsusi texniki vasitələr tərəfindən tərtib edilən elektron protokollar olub: "Təəssüf ki, bəzən belə uğurlu nəticələri gözdən salmağa, DYP-nin fəaliyyətini qərəzli şərh etməyə və bununla da cəmiyyətdə guya çaşqınlıq yarada biləcəklərini düşünənlərə də rast gəlirik. Məsələn, bəzi "hüquq müdafiəçiləri" ayrı-ayrı sosial şəbəkələrdə sözügedən məlumatda qeyd edilən rəqəmə - 40,2 milyon manata istinad edərək yol polisinin bu qədər qayda pozuntusu aşkar etməsi nəticəsində tətbiq edilən cərimələrin guya dövlət büdcəsinin doldurulmasına hesablanması barədə əsassız və cəfəng iddia irəli sürüblər. Əvvəla hər kəsə aydındır ki, 40, yaxud 50 milyon manat respublikanın bugünkü büdcəsində olduqca kiçik rəqəmdir. İkincisi, dünyanın inkişaf etmiş bütün dövlətlərində olduğu kimi, ölkəmizdə də nəqliyyatın hərəkətinə həm də foto-video qeydiyyat funksiyasına malik ən müasir xüsusi texniki vasitələrin köməyi ilə nəzarət olunur. İnzibati xətaların əksəriyyəti də məhz bu qurğular vasitəsilə aşkarlanır və real vaxt rejimində elektron sənəd formasında tərtib edilir".
Ümumilikdə ötən 8 ayda yol hərəkəti qaydalarının pozulmasına görə 58,5 milyon manat məbləğində cərimələrin tətbiq edilməsinin əhəmiyyətini ekspertlər necə dəyərləndirir?
Sözügedən məsələni dəyərləndirən "Təhlükəsiz Yol" Alyansının koordinatoru Şahin Camalov buna müsbət prizmadan yanaşdı: "Bütün ölkələrdə olduğu kimi, Azərbaycanda da yol hərəkətinin pozulmasına görə qanuna müvafiq olaraq cərimələr tətbiq olunur. Bunun əhəmiyyəti ondan ibarətdir ki, sürücü pozuntuya görə cərimələnəcəyini bilib avtomobili daha ehtiyatla sürür. Belə olmasa, yollarda xaos olar, kim necə gəldi avtomobil sürər. Nəticədə qəzalar artar. Bu da, öz növbəsində, qəzalarda ölən və yaralananların sayının artmasına öz təsirini göstərə bilər. O baxımdan cərimələr olmalıdır ki, bu cür xoşagəlməz hadisələr baş verməsin. Yaxud da belə halların sayı minimuma ensin. Bütün bunlarla yanaşı, təkcə cərimələr yetərli deyil. Sürücülər arasında maarifləndirmə işi gücləndirilməlidir. Avtomobili idarə edənlərin sürücülük mədəniyyəti artmalıdır. Onlarla mütəmadi olaraq iş aparılmalıdır. Yalnız o zaman neqativ halların azalması baş verə bilər".
Vidadi ORDAHALLI
