Həyatda elə insanlar var ki, vətən və el üçün göstərdiyi fədakarlığa görə dərin hörmət qazanır, üzləşdiyi sınaqlar qarşısında iradəsi büdrəmir, nə qədər çətin yaşantılardan keçsə də, ləyaqətini, nikbinliyini qoruya bilir. Onlar öz xeyirxahlığı ilə nəinki çevrəsində olanlara, cəmiyyətin geniş təbəqələrinə örnək olur. Qeyd etdiyim bu cəhətlərin hamısını bir elin, bir nəslin ağsaqqalı zirvəsinə ucalan, Daxili İşlər Nazirliyi Daxili Qoşunlarının Veteranlar Şurasının sədri, Respublika Baş Prokurorluğunun atıcılıq tirinin rəisi, ehtiyatda olan polkovnik-leytenant Murad Mürsəlova aid etmək olar.
1948-ci il sentyabrın 1-də İsmayıllı rayonunun Həftəsov kəndində, zəhmətkeş bir ailədə dünyaya göz açan Murad müəllim şəhərlərdən, ölkələrdən keçən tale yollarında doğma el-obasına sədaqətini, valideynlərinə, müəllimlərinə ehtiramını həmişə uca tutub. Ağsaqqal olaraq gənclərə nəsihətlərində insanın öz soykökünə, milli-mənəvi dəyərlərə bağlılığının vacibliyini xüsusi olaraq vurğulayıb. Onun bu günədək keçdiyi zəngin ömür yolu əslində maraqlı bir tədqiqat mövzusu ola bilər. M.Mürsəlovun bioqrafiyasına nəzər saldıqda qazandığı uğurların təməlində zəhmətsevərliyin, qarşıya qoyulan məqsədlərə çatmaq naminə inadla çalışmağın, yüksək dərəcədə özünə tələbkarlığın dayandığını görmək olar.
O, hərbi xidmətə çağırılana qədər doğma kəndində orta məktəbi, sonra Bakıda axşam məktəbi və texniki-peşə məktəbini bitirib. 1965-ci ildə Türkmənistanın o vaxtkı Krasnovodsk şəhərinə ezam edilərək burada fəaliyyət göstərən neft sənayesi üzrə ixtisaslaşmış texnikumda təhsil alıb. 1967-ci ildə isə Krasnovodsk şəhərindən hərbi xidmətə göndərilib. Hərbi xidməti vətəndən uzaqda - Rusiya Federasiyası Ural vilayətinin Kurqan şəhərində keçib. Burada artilleriya təyinatlı hərbi hissədə hərbi xidmətini baş çavuş rütbəsində başa vurub. Bakıya qayıtdıqdan sonra peşə seçimi ilə bağlı qəti qərarını verir. O, gələcəyini hərbi xidmətdə görür. Özünün dediyinə görə, hərbi xidmətdəki ciddilik, əzmkarlıq, qayda-qanun onun bu qərarı qəbul etməsinə təsir göstərib. Beləliklə, o, Bakı şəhərində yerləşən SSRİ DİN DQ-nin "N" saylı hərbi hissəsində müddətdən artıq hərbi xidmətə qəbul olunub. M.Mürsəlovun hərbçi karyerası yüksələn xətt üzrə inkişaf edib. Bölüyün baş çavuşu, hərbi hissənin geyim xidməti rəisinin köməkçisi, taqım komandiri vəzifələrində işləyib. Tutduğu vəzifələrdə komandanlığın etimadını doğrultması nəticəsində 1976-cı ildə Moskva Ümumittifaq Qiyabi Hüquqşünaslar İnstitutuna təhsil almağa göndərilib. 1982-ci ildə isə o, SSRİ DİN DQ-nin Leninqrad (hazırda Sankt-Peterburq) Ali Hərbi Siyasi Məktəbinə müsabiqədən uğurla keçərək, orada ekstern kurslarını əla qiymətlərlə başa vurub.
M.Mürsəlovun hərbi xidməti həm SSRİ DİN DQ-nin və həm də Azərbaycan Respublikası DİN DQ-nin sıralarında keçib. O, taqım komandiri vəzifəsindən başlayaraq bölük komandirinin müavini, bölük komandiri, tabor komandirinin müavini, qərargah rəisinin baş köməkçisi, qoşun xidmətinin baş zabiti, hərbi hissənin qərargah rəisi, hərbi hissə komandirinin müavini, Daxili Qoşunların Baş İdarəsində döyüş hazırlığı şöbəsinin baş zabiti, təhsil üzrə baş zabit, DQBİ-də Əməliyyat və Döyüş Hazırlığı İdarəsinin rəis müavini vəzifələrinədək yüksəlib. Vətənpərvər və peşəkar zabit kimi şəxsi heyətin təlim-tərbiyəsi işində öz bilik və təcrübəsini əsirgəməyib.
Müstəqil respublikamızın DİN Daxili Qoşunlarının yaradılması və formalaşmasında M.Mürsəlovun da bir zabit kimi xüsusi xidmətləri var. O, Qarabağ müharibəsi veteranıdır, ölümlü-itimli günlərin sarsıntıları onun yaddaşında silinməz iz buraxıb.
M.Mürsəlov respublikamızın ərazisində ictimai asayişin və təhlükəsizliyin qorunması, dövlətçiliyimizə qarşı təxribatların qarşısının alınması yönündə qarşıya qoyulmuş xidməti tapşırıqların yerinə yetirilməsində də müsbət cəhətdən fərqlənib.
Təsadüfi deyil ki, o, "Qüsursuz xidmətə görə" medalının hər üç dərəcəsinə layiq görülüb. Həmçinin hərbi xidmət sahəsinə dair bir sıra digər medallar, döş nişanları ilə təltif edilib. Hərbi xidməti dövründə dəfələrlə DİN rəhbərliyi və DQ komandanlığı tərəfindən mükafatlandırılıb.
M.Mürsəlov həmçinin Azərbaycan Respublikası Silahlı Qüvvələrinin veteranı fəxri adını daşıyır. Hərbi xidmətdən ehtiyata buraxıldıqdan sonra respublika veteran hərəkatına qoşularaq, ictimai işlərdə daim fəallıq göstərir. Bu vacib ictimai missiyaya öz töhfəsini verməsi dürüst vətəndaşlıq mövqeyinin ifadəsidir.
M.Mürsəlov 2008-ci ilin aprel ayından bu günədək Daxili Qoşunların Veteranlar Şurasına rəhbərlik edir. Elə bu təşkilatın yaradıcılarından biri olaraq veteranların təşkilatlanmasında böyük zəhmət sərf edib. O, nəinki DQ-nin veteranları arasında, eləcə də digər veteran təşkilatlarında da hörmət və nüfuza malikdir. Murad müəllimin rəhbərliyi altında DQ-nin Veteranlar Şurası gənclərin hərbi-vətənpərvərlik tərbiyəsi yönündə məqsədyönlü və ardıcıl iş aparır. Veteranların sorağı hərbi hissələr, orta məktəblər, lisey və universitetlərdən gəlir. Veteranlarla keçirilən görüşlər bir daha təsdiq edir ki, ağsaqqal nəsihətinə həmişə ehtiyac var.
M.Mürsəlovun peşəkar hərbçi təcrübəsi Respublika Baş Prokurorluğunun atıcılıq tirinin rəisi kimi fəaliyyətində də onun gərəyi olub. Bu məsul işdə də M.Mürsəlovu fərqləndirən əsas cəhətlər hərbçi nizamı, dəqiqlik, təşkilatçılıq və göstərilən etimadı doğrultmaq əzmidir.
Murad müəllim yaradıcı ruha və parlaq istedada malik insandır. O, "Ərənlər yurdu" kitabının müəllifidir. Kitabda onun müxtəlif illərdə qələmə aldığı şeirlər, silahdaşlarının haqqında ürək sözləri işıq üzü görüb. Kitaba ön söz yazmış professor Məhərrəm Qasımlı onun yaradıcılığını özünəməxsus tərzdə belə dəyərləndirib: "Nurlu, işıqlı duyğular onun şeirlərində göy üzünün aydınlığını xatırladır. Aydınlıq olan yerdə isə hər şey gözəldir...".
M.Mürsəlovun 3 övladı və 4 nəvəsi var. Övlad və nəvələr hər bir valideynin həyat sevincidir. Qızı gizir Günay Sadıqova və qardaşı oğlu kapitan Rasim Mürsəlov hərbçi olaraq onun yolunu davam etdirirlər. Onlar Daxili Qoşunlarda xidmət edirlər. O, övladlarından birinin əlil olmasının acısını yaşasa da, bu gerçəyi Tanrı sınağı kimi qəbul edir. Murad müəllim inanclı insandır. Həyatın hər üzünü görmüş, ancaq ümidsizliyə qapılmayan bir insanı yəqin ki, başqa cür təsəvvür etmək çətin olardı.
Bu həyatda ailənizlə birgə həmişə muradınıza çatasınız, Murad müəllim!
Yalçın Qaya
