Qayda-qanuna hörmət edən vətəndaş həmişə, hər yerdə haqlıdır. Bu, birmənalı olaraq belədir. Ola bilər ki, hardasa qanunun "ayağı büdrəsin", ancaq "Haqq nəzilər, üzülməz",-deyiblər.
İnsanlarımızın konstitusion haqlarının qorunması, üzləşdikləri problemlərin qısa zaman kəsiyində aradan qaldırılması üçün aparılan islahatlar onu deməyə əsas verir ki, dövlətimizin əsas hədəfi insanlarımızın rifah halının yüksəlməsi, azad, firavan bir mühitdə yaşamalarını təmin etməkdir. Bu məqsədlə bütün dövlət orqanları səfərbər olunub.
Polis qanun keşikçisidir. Elə vətəndaşlarla da ən çox ünsiyyətdə olan xidmət sahəsi daxili işlər orqanlarıdır. Bu gün polis-vətəndaş münasibətlərinin müsbət məcraya yönəlməsi ölkəmizdə cinayətkarlıqla ciddi mübarizəyə də öz təsirini göstərib. Belə ki, aşkar və qeyri-aşkar şəraitdə törədilən cinayətlərin üstünün açılmasında vətəndaş fəallığı nəzərə çarpır. Məktəblərdə, müxtəlif dövlət qurumlarında əsrin bəlasına çevrilən narkomaniyanın fəsadları müzakirə olunur, polisin işinə dəstək vermək üçün hər kəs vətəndaş yanğısı ilə üzərinə düşən öhdəliyi yerinə yetirmək istəyir. Dövlətin və millətin taleyini düşünənlərin polislə birgəlik nümayiş etdirmələri bəzi qüvvələrin "kefinə soğan doğrasa da", reallıq budur ki, müstəqil dövlətimizin bel sütunlarından sayılan daxili işlər orqanlarının hər bir qurumunda vətəndaşa xidmət, vətəndaş məmnunluğu prioritet təşkil edir.
Bu gün hər bir hərəkəti dərhal müzakirə mövzusu olan yol polisi haqqında danışmaq üçün etdiyim bəzi müşahidələri sizlərlə bölüşmək istəyirəm. Bəli, iş olan yerdə nöqsan qaçılmazdır. Ölkəmizdə on adamdan səkkizinin maşınının olması yol polisi ilə vətəndaşların hər gün, hər saat üzləşməsinə dəlalət edir. Bəs, bəzi vətəndaşlar nə üçün yol polisindən narazıdırlar? Yazımın əvvəlində yazmışdım ki, qayda-qanuna hörmət edən vətəndaş heç nədən qorxmur. Amma dərd burasındadır ki, qanunu çeynəmək istəyən, qaydalara riayət etməyənlər elə qara-qışqırıq salırlar ki, adamın matı-qutu quruyur. Burda yaxşı deyiblər: "Oğru elə bağırdı ki, doğrunun bağrı yarıldı"...
Sürət həddini aşan, avtomobili içkili idarə edən, neçə-neçə insanın ölümünə yol açanları müdafiə edən bəzi media qurumlarının "canıyananlığı"nın səbəbini anlamaq mümkün deyil. Dəfələrlə şahidi olmuşam: yazıblar ki, polis təqib etdi sürücü qəza törətdi. Məncə, ağlı başında, düşüncəli və əlbəttə ki, qanundan xəbəri olan biri bunu yazmaz. Baş alıb gedən yol qəzalarının qarşısını hamılıqla almalıyıq və bu işdə yol polisi tərəfindən aparılan təbliğat-təşviqat işinə dəstək verməliyik. Baş verən yol-nəqliyyat hadisələrinin, xüsusən də piyada ölümləri ilə müşahidə olunan qəzaların baş verməsi sürücülərlə piyadalar arasındakı qarşılıqlı nizamsızlığın nəticəsidir. Bu il ərzində ölkədə avtomobilləşmə prosesi bir o qədər sürətli getməsə də, qəzaların sayı yenə də artır. Təbii ki, bu problemin həlli istiqamətində gərəkli addımlar atılır.
Təəssüflər olsun ki, tətbiq edilən cərimələr də piyada məsuliyyətsizliyinin qarşısını almaqda acizdir. Vətəndaşlar yeraltı və yerüstü keçidlərdən istifadə etməməklə qəza şəraiti yaradırlar. Yol polisi tərəfindən cərimə olunduqda isə özlərinin haqlı olduğunu sübut etmək üçün müxtəlif yollara əl atırlar.
Bəli, Bakı kimi böyük meqapolisdə mənzil başına çatmaq elə də asan deyil. Və heç bir şey əsas vermir ki, biz qanunu pozub istəyimizə çataq.
Dəfələrlə polislə cərimələnən vətəndaş arasında qarşıdurmanın şahidi olmuşam və bir vətəndaş kimi müdaxilə etdikdə görmüşəm ki, polis haqlıdır, istəyi və tələbi qanunlara riayət etməkdir.
Qanunvericilik bazası mükəmməl formada hazırlanıb. Yol infrastrukturu və yol polislərinin işi ən müasir satandartlara uyğun şəkildə qurulub. Vətəndaşlardan isə bircə şey tələb olunur: qanuna hörmət etmək, ona və onu qoruyana saymazlıq etməmək. Qanuna hörmət isə qanunu öyrənməkdən, qanunları bilməkdən keçir.
Hafiz Hacxalıl
