"Orta məktəblərdə təhsil alan şagirdlərin dinlə bağlı məlumatının olması üçün dini biliklər tədris olunmalıdır"
"Azərbaycanın orta məktəblərində dinlə bağlı biliklər geniş şəkildə tədris ediləcək". Bunu Bakıda keçirilən "Dini radikalizm və xurafat: Bir medalın iki üzü" mövzusunda konfransda çıxışı zamanı Dini Qurumlarla İş üzrə Dövlət Komitəsinin sədr müavini Gündüz İsmayılov bildirib. O deyib ki, hazırda Dini Qurumlarla İş üzrə Dövlət Komitəsi Təhsil Nazirliyi ilə "Həyat bilgisi" dərsliyi üzərində işləyir: "Hesab edirik ki, orta məktəblərdə dinin, şəriətin tədrisindən söhbət gedə bilməz. Ancaq dinlə bağlı biliklərin genişləndirilməsinə ehtiyac var. Yaxın vaxtlarda cəmiyyət orta məktəblərdə "Həyat bilgisi" dərsliyində dinlə bağlı bilgilərin genişləndirilməsinin şahidi olacaq".
Məsələ ilə bağlı fikir bildirən ilahiyyətçı-alim Seyid Camal Əzimbəyli "Bakı-Xəbər"ə açıqlamasında qeyd etdi ki, orta məktəblərdə təhsil alan şagirdlərin dinlə bağlı məlumatının olması üçün dini biliklər tədris olunmalıdır: "Mən dəfələrlə elə sizin qəzet vasitəsilə bu məsələyə toxunmuşam. Hər zaman bildirmişəm ki, Azərbaycanın dini mühitinə yeni nəfəs gətirmək üçün, ölkədə din-dövlət münasibətlərinin daha da möhkəmlənməsi üçün uşaqların dinlə bağlı maarifləndirilməsi vacibdir. Dini Qurumlarla İş üzrə Dövlət Komitəsinin son illər sürətlə apardığı maarifləndirmə işləri bu kimi məsələlərə dəstəkdir".
S.C.Əzimbəyli qeyd etdi ki, Azərbaycanda din dövlətdən ayrı olsa da, tolerant ölkəyik: "Onu da deyim ki, Azərbaycanın tolerant ölkə olduğunu nəzərə alıb sui-istifadə edənlər də olub. Onların zərərsizləşdirilməsi istiqamətində gənclərimizin ideoloji baxımdan dini dəyərləri bilməsi, mərhəmət və elmi dini mənimsəməsi olduqca vacibdir".
Həmsöhbətimiz hesab edir ki, gələcəyimiz sayılan uşaqların dini yöndə maarifləndirilməsi lazımdır: "Dövlətin mənbəyi xalqdır. Və xalqın da gələcəyi uşaqlardır. O baxımdan uşaqlarımızın dinlə bağlı maarifləndirilməsi lazımdır. Məktəblərdə tək islam dini deyil, digər dinlərlə də bağlı məlumatlar uşaqlara aşılana bilər".
Günel CƏLİLOVA
