"Bu məsələyə ciddi nəzarət etmək lazımdır"
Ali təhsil müəssisələrinin boş qalan plan yerlərinə yenidən əlavə yerləşdirilmə aparılmayacaq. Tələbə Qəbulu üzrə Dövlət Komissiyasından verilən məlumatda bildirilir ki, 2016/2017-ci tədris ili üçün respublikanın ali təhsil müəssisələrinə yerləşdirmə üzrə I mərhələdən sonra plan yerləri 82 % dolmuşdu. 15-19 avqust tarixlərində boş qalan yerlərə yenidən müsabiqə keçirildi və plan yerləri 83.31 % doldu. Beləliklə, ali məktəblərin plan yerlərinin 16,69 %-i boş qalıb.
TQDK-nın mətbuat xitmətinin rəhbəri Xanlar Xanlarzadə boş yerlərin taleyi ilə bağlı bildirib ki, qurumun vəzifəsi, sadəcə, qəbul prosesini həyata keçirmək və nəzarəti təmin etməkdir: "Biz, sadəcə, tələbə qəbulunu həyata keçiririk. TQDK müsabiqə elan edir və müəyyən yerlər dolur. Boş qalan yerlər üçün də sonradan qəbul keçirilir. Məsələn, bu il avqustun 15-dən 19-na kimi növbəti qəbul aparılıb və 553 nəfər tələbə olmağa şans qazanıb. Hazırda bu ayın 31-nə kimi həmin abituriyentlərin qeydiyyatı aparılır. 6 mindən çox boş yer qalsa da, artıq biz öz vəzifəmizi tamamlayırıq və boş yerlər üçün növbəti qəbul olmayacaq".
Maraqlıdır, 16 faizdən çox yer boş qaldığı halda, niyə əlavə qəbul keçirilmir? Sözügedən məsələni şərh edən təhsil üzrə ekspert Kamran Əsədov bunu bir sıra amillərlə əlaqələndirir: "Bu il ali məktəblərə qəbul olunanların sayı son 8 ildə ən aşağı səviyyəyə enib. 2003-2008-ci illərdə abituriyentlərin sayı 66 faizə kimi artıb. Ancaq təəssüflər olsun ki, 2008-ci ildən bu günə kimi isə bu rəqəm aşağı düşərək 20 faizlik bir azalma müşahidə olunur. 2008-2009-cu tədris ilində ali məktəblərə 120 min abituriyent sənəd verirdisə, bu il bu rəqəm 85 minə qədər düşüb. Hazırda ölkədə 43 təhsil mərkəzi var. Ən çox tələbə qəbul onunan universitet BDU-dur, 4798 plan yeri dolub. Ancaq özəl universitetlərdə boş qalan yerlərin sayı 50 faizə yaxındır. "Odlar Yurdu", "Avrasiya", "Təfəkkür" universitetlərində plan yerləri heç 50 faiz də dola bilmədi. Ən aşağı faiz isə "Odlar Yurdu" universitetindədir. 600 plan yerə 68 qeydiyyat aparılıb. Hər il boş qalan yerlər artır. Buna baxmayaraq, qəbul komissiyası plan yerlərinin sayını hər ötən il bir az da artırır. Bu məsələyə ciddi nəzarət etmək lazımdır. Əmək bazarında ehtiyac olan ixtisaslara qəbul planını artırmaq məqsədəuyğundur, nəinki müəllim və s. Təhsil Nazirliyinin bu il müəllimlər üçün keçirdiyi imtahanda 31 mindən çox işsiz müəllim iştirak edib. Halbuki, plan yerinin sayı 3000 idi. Bu o deməkdir ki, yaxın bir neçə il üçün müəllimlik tələbatını ödəyir".
Vidadi ORDAHALLI
