"Həkimlərin bir qismi Türkiyə və Avropa ölkələrində rezidentura keçərək ölkəyə qayıtmaq istəmir"
Məlumatlara görə, tibb işçilərinin sayı azalır. Söhbət həm həkim, həm də tibb personalından gedir. Dövlət Statistika Komitəsi (DSK) səhiyyə ilə bağlı statistik məlumatları açıqlayıb. Məlumatlara əsasən, 2015-ci ildə Azərbaycanda həkimlərin sayı 298 nəfər azalıb. Səhiyyə Nazirliyi bu tendensiyanı səhiyyə sistemindəki islahatlarla izah edir.
2016-cı il yanvarın 1-nə olan vəziyyətə görə, ölkənin özəl və dövlət xəstəxanalarında 32 458 həkim işləyib. Ölkənin hər 10 min sakininə 33,9 həkim düşür, bu, 2014-cü illə müqayisədə 0,7 həkim azdır.
DSK-nın məlumatına görə, 2015-ci ildə ixtisas həkimlərinin sayı azalıb: terapevt - 105, cərrah və pediator - hərəsindən 147, ginekoloq - 29, okulist - 4, psixoloq - 11 və s.
Bu ilin əvvəlinə Azərbaycanda orta tibb personalının sayı 54,9 min nəfər idi, bu da bir il əvvəldən 1200 nəfər azdır. 2015-ci ildə ölkədə 7 xəstəxana bağlanıb və 2016-cı ilin əvvəlinə onların sayı 559 olub. Xəstəxanalarda 44,9 min çarpayı var, bu da 2014-cü ildən 1500 çarpayı azdır. Ötən il 4 yeni ambulator-poliklinika müəssisəsi (1750) açılıb, bir qadın məsləhətxanası (137) və bir uşaq poliklinikası bağlanıb.
Mövzu barədə fikir bildirən tibb sahəsi üzrə ekspert, professor Adil Qeybulla qeyd etdi ki, tibb işçilərinin sayının azalması düzgün məlumatdır: "İlk olaraq deyim ki, Tibb Universitetinə tələbələrin qəbulu azalıb.
Biz artıq Qərb təbabətinin standartlarına keçmişik. 6 illik baza təhsilindən sonra rezidentura təhsilinə keçmək tələb olunur. Rezidentura artıq həkimlik fəaliyyətinə tam yiyələnmək deməkdir. Rezidentura təhsili 4-5 il müddətində davam edir. 6 illik baza və rezidentura təhsilinə görə gənclər həkimlik ixtisasına yiyələnmək istəmir".
A.Qeybulla onu da diqqətə çatdırdı ki, həkimlərin bir qismi Türkiyə və Avropa ölkələrində rezidentura keçərək ölkəyə qayıtmaq istəmir: "Bəzi həkimlərimiz xarici ölkələrdə çalışıb oranın tibb sahəsi üzrə məşğul olmağa üstünlük verir. Həmçinin, həkimlik ixtisasından imtina edənlər də az deyil".
Professorun sözlərinə görə, artıq neçə ildir həkimlik sahəsində boşluq hiss olunur.
Günel CƏLİLOVA
