"Burunun estetik əməliyyatlarına üz tutanlar arasında yetkinlik yaşına yenicə çatanlar az deyil"
İnsanlar həmişə gözəl görünməyə çalışır, xüsusən də qadınlar. Gözəllik isə qurban tələb edir. Müasir dövrümüzdə bu qurban estetik əməliyyat masasına uzanmaq sayılır desək, yanılmarıq. Təəssüf ki, heç də bütün estetik əməliyyatlar uğurlu olmur. Ölkəmizdə uğursuz, eləcə də ölümlə nəticələnən plastik cərrahiyyə əməliyyatları dəfələrlə baş verib və bunun səbəbləri hər zaman müzakirə mövzusu olub.
Son zamanlar estetik əməliyyat üçün təkcə dolğun yaşda olan qadınlar deyil, yeniyetmə qızlar da müraciət edir. Hətta elə ailələr var ki, onlar öz istəyi ilə məktəbdə oxuyan qızını estetik əməliyyata göndərir. Valideynlər qızını rinoplastika əməliyyatına göndərir. Təəssüf ki, bəzən yeniyetmə qızların estetik əməliyyatı heç də uğurla başa çatmır. Elə bu günlərdə 17 yaşlı Aygül Orucovanın estetik əməliyyatdan sonra dünyasını dəyişməsi xəbəri yayıldı. O, burnundan estetik əməliyyat edilən zaman narkozdan ayılmayıb. Bu kimi hadisələrin sayı artmağa başlayıb. Estetik əməliyyatların yaşı azalır. Hətta 12-13 yaşında olan qızlar belə estetik əməliyyat üçün cərrahlara müraciət edir.
Ekspertlərin bildirdiyinə görə, yeniyetmə qızların estetik əməliyyata müraciət etməsi düzgün deyil. Çünki bu cür əməliyyatların nəticələri heç də həmişə müsbət olmur. Uşaq və yeniyetmələr inkişaf dövrünü tamamlamamış bunu etdirəndə təhlükə risqi də böyük olur.
Plastik cərrah Abduləli Əliyev "Bakı-Xəbər"ə açıqlamasında qeyd etdi ki, burunun estetik əməliyyatlarına üz tutanların arasında yetkinlik yaşına yenicə çatanlar da az deyil: "Yetkinlik yaşına çatmayanların rinoplastikaya müraciət etməsi olduqca təhlükəlidir. Erkən yaşdan burunun estetik əməliyyat olunması ciddi fəsad verə bilər. Çünki yeniyetməlik dövründə hələ digər orqanlarla yanaşı, burunun da formalaşması tam başa çatmır. Bu proses 18 yaşdan sonra yekunlaşır".
Həmsöhbətimiz qeyd etdi ki, çox erkən yaşda rinoplastik əməliyyat keçirən burunda gələcəkdə hər hansı problemin yaranacağı qaçılmazdır. Burun tam formalaşmadığından, getdikcə deformasiyaya uğraya bilər. Bu zaman nəfəsalmada çətinliklərin yaranması, müxtəlif tənəffüs problemlərinin ortaya çıxması gözləniləndir. Ona görə də burun çəpəri əməliyyatlarının tibbi göstərişi xaric, erkən yaşda burunun estetik əməliyyat edilməsi düzgün deyil: "18 yaşa çatmamış rinoplastik əməliyyat edilirsə, həkim həmin şəxsin orqanizminin tam formalaşmasına əmin olmalıdır. Orqanizm tam formalaşmayıbsa, o zaman estetik əməliyyat olunması düzgün deyil".
Günel CƏLİLOVA
