"Təəssüf ki, bəzi qadınlar hamiləliyin nə qədər risqli olduğunu nəzərə almayıb qadın məsləhətxanalarına getmir"
Körpələrin sağlam dünyaya gəlişi üçün hamilə qadınlar vaxtlı-vaxtında qadın məsləhətxanalarında həkim müayinəsində olmalıdır. Ancaq təəssüf ki, bəzi qadınlar buna əməl etməyərək nəinki qadın məsləhətxanasına, heç həkim qəbuluna belə getmir. Nəticədə dünyaya gələn uşaqların səhhətində problem yaranır. Eyni zamanda, ananın da vəziyyəti ağır olur. Doğuş zamanı uşağın travma almasının səbəbi kimi ananın vaxtında qadın məsləhətxanasına müraciət etməməsi göstərilir.
Bildirək ki, bir neçə gün öncə Bakıda 3 nömrəli qadın məsləhətxanasında antenatal xidmətin təşkilinə həsr edilmiş tədbir keçirilib. Qadın məsləhətxanasının baş həkimi Aygün Budaqova bildirib ki, bütün qadın məsləhətxanalarında hamilələrin vaxtında aşkar olunması, körpələrin sağlam dünyaya gəlməsi üçün böyük işlər görülür: "Bəzi hallarda hamilələri qadın məsləhətxanalarına cəlb etməkdə müəyyən çətinliklər var. Hamilələr qadın məsləhətxanasında olarkən onların özləri, bətnində inkişaf edən körpələri tam müayinə olunur, onların inkişafına nəzarət olunur. Buna görə də hamilələrin qadın məsləhətxanasına gəlməsi çox vacibdir".
Hamilə qadınların qadın məsləhətxanalarına nə səbəbdən getməməsini aydınlaşdırmaq məqsədilə həkim-ginekoloq Pərvanə Mustafayevaya müraciət etdik. O bizimlə söhbətində bildirdi ki, hamilə qadınlar qadın məsləhətxanalarına mütləq müraciət etməlidir: "İlk növbədə hamilə qadın pasport qeydiyyatında olduğu ərazi üzrə qadın məsləhətxanasında qeydiyyata düşməlidir. Orada onun üçün açılan qeydiyyat kartında hamiləliyin gedişi üzrə tələb olunan bütün göstəricilər, laborator və digər müayinələrin nəticələri qeyd olunur.
Hamilə qadının qadın məsləhətxanasına ilk müraciəti zamanı onun həqiqətən hamilə olması və hamiləlik üçün risq faktorlarının aşkar edilməsi üzrə həkim müayinəsi aparılır.
Hamilə qadın hamiləliyin 1-ci yarısında qadın məsləhətxanasına ayda 1 dəfədən az olmamaqla, 20 həftəlik hamiləlikdən sonra ayda 2 dəfə, hamiləliyin 32-ci həftəsindən etibarən isə ayda 3-4 dəfə olmaqla müayinəyə gəlməlidir. Hər bir belə gəliş zamanı mama-ginekoloji müayinədən əlavə, hamilə qadının çəkisi, arterial təzyiqi ölçülür, şişkinliklərin olub-olmamasına diqqət yetirilir. Hamiləlik üçün risq faktorlarının erkən dövrlərdə aşkar edilməsi, hamiləliyin gedişindəki pozğunluqların vaxtında müəyyən edilməsi ana və uşağın həyatının qorunması, doğuşun normal keçməsi və doğuşdan sonra uşağın normal inkişafını təmin etməyə xidmət edir. Ancaq təəssüf ki, bəzi qadınlar hamiləliyin nə qədər risqli olduğunu nəzərə almayıb qadın məsləhətxanalarına getmir. Ana və uşaq ölümlərinin səbəbinin kökündə elə hamilə qadınların qadın məsləhətxanalarına getməməsi dayanır. Elə qadın var ki, ona hamilə olmaq qadağandır. Amma qadın hamilə olur və qadın məsləhətxanasına getmədiyi üçün səhhətində baş verənlərdən xəbərsiz olur. Nəticədə isə ana dünyasını dəyişir. Bu kimi hadisələrin baş verməməsi üçün hamilə qadınlar mütləq qadın müsləhətxanalarına getməlidir".
Həmsöhbətimiz hamilə qadınların qadın məsləhətxanalarına getməməsinin digər səbəbi kimi analizlərin qiymətinin baha olmasını göstərdi: "Elə ailələr var ki, onun analiz verməyə imkanı yoxdur. Analizlərin qiyməti hər kəsə bəllidir. Rayon qeydiyyatı üzrə qadın məsləhətxanaları pulsuz olarsa, hamilələr mütləq orada qeydiyyatdan keçər".
Günel CƏLİLOVA
