"Orada qəbul olunan qərarların bütün nazirlik, komitə və müəssisələrdə həyata keçirilməsi vacib olmalıdır"
Azərbaycan turizmin inkişafı üçün çox əlverişli təbii şəraiti olan ölkələrdən biridir. Bu səbəbdən bizdə turizmin inkişaf perspektivləri bütün səviyyələrdə kifayət qədər yüksək qiymətləndirilir. Ölkə iqtisadiyyatının neftdən asılılığını aradan qaldırmaq yolunda hökumətin götürdüyü kursa uyğun olaraq, qeyri-neft sektorunun əsas istiqamətlərindən biri kimi, turizmə dövlət səviyyəsində diqqət getdikcə artırılır. İndi qarşıya bu sahəni real sektorun ən aparıcı istiqamətlərindən birinə çevirmək vəzifələri qoyulur.
Bu günlərdə tanınmış iqtisadçı Fikrət Yusifov belə bir təkliflə çıxış edib ki, sırf ayrıca turizm nazirliyinin yaradılmasına ehtiyac var: "Hansısa bir dövlət ölkədə turizmin inkişafına xüsusi önəm verib sahənin qaldırılmasında öz sözünü daha yaxından demək istəyirsə, onda o xüsusi olaraq turizm nazirliyi və ya bunun analoqu olan başqa müstəqil bir qurum yaradır. Hesab edirəm ki, məsələnin Azərbaycan üçün bugünkü aktuallığını nəzərə alıb dövlətin və ilk növbədə ölkə Prezidentinin məsələ ilə bağlı müəyyən etdiyi proqramların daha uğurla reallaşdırıla bilməsi üçün bizdə müstəqil turizm nazirliyinin yaradılmasına ehtiyac var. Dünyanın 40-dan artıq ölkəsi turizm məsələlərində dövlət tənzimlənməsini məhz belə müstəqil qurumlar vasitəsilə həyata keçirir. Bu vacib bir məsələdir. Biz ümumdaxili məhsulumuzda turizm sektorunun payının yaxın perspektivdə ən azından ümumdünya göstəricisinə - yəni 10 faizə yaxınlaşmasını hədəfləyiriksə, onda belə seçim daha düzgün olardı".
Maraqlıdır, belə bir qurum yaradılsa, bu, ölkədə turizmin inkişaf perspektivlərinə necə təsir edəcək? Məsələyə münasibət bildirən turizm sahəsi üzrə ekspert Bahadur Bilalov buna bir qədər fərqli prizmadan yanaşdı: "Turizmin inkişaf etdiyi bir sıra ölkələrdə sözügedən qurum mədəniyyətlə bir yerdədir. Türkiyədə, Misirdə və digər bir sıra ölkələrdə bu belədir. Bu da təsadüfi deyil. Ona görə ki, bir qayda olaraq, turizm və mədəniyyətlə bağlı abidələr qarşılıqlı fəaliyyət dairəsindədir. Çünki mədəniyyət, tarixi abidələrsiz turizm yoxdur. Bu nöqteyi-nəzərdən hesab edirəm ki, Azərbaycanda turizmin inkişafı naminə bütün nazirliklərin koordinasiyasını həyata keçirən turizm şurası yaradılmalıdır. Dəfələrlə bu təklifi vermişəm. Ümumiyyətlə, turizm fəaliyyəti bir çox nazirliklərlə qarşılıqlı uzlaşmanı zəruri edir. Bu baxımdan hesab edirəm ki, Azərbaycanda mövcud qaydanı, dünya praktikasını qoyub bununla bağlı ayrıca qurumun yaradılmasına ehtiyac yoxdur. Hesab edirəm ki, ölkədə turizmin inkişafı naminə təcili olaraq turizm şurası yaradılmalıdır. Şuraya Mədəniyyət və Turizm Nazirliyi başçılıq etməlidir. Digər əlaqədar nazirlik, komitə rəhbərlərinin birinci müavinləri həmin şuraya daxil olmalıdır. Ölkə turizminin inkişafı naminə ayda bir dəfədən gec olmayaraq, həmin şuranın iclası toplanmalıdır. Orada qəbul olunan qərarların bütün nazirlik, komitə və müəssisələrdə həyata keçirilməsi vacib olmalıdır. O zaman Azərbaycanda turizmin inkişafında real nəticə ortaya qoymaq olar".
Vidadi ORDAHALLI
