Səhər saatlarında İmişli rayonunda zəlzələ baş verib. Trend-ə Respublika Seysmoloji Xidmət Mərkəzindən verilən məlumata görə, yeraltı təkanlar yerli vaxtla saat 08:46:36-da qeydə alınıb. Zəlzələ yaxın ərazilərdə 4 bala kimi hiss olunub.
İmişlidə baş verən zəlzələ Goranboyda ciddi hiss olunub. Bu barədə Trend-ə açıqlamasında Goranboy rayon İcra Hakimiyyəti başçısının birinci müavini Elçin Cahangirov məlumat verib.
İcra başçısının müavini bildirib ki, rayon ərazisində hiss olunan titrəyişlərdən sonra dərhal komissiya yaradılıb: "Təxminən səhər saat 8:45 radələrində rayon ərazisində zəlzələ ciddi hiss olundu. Təkanlar təxminən 8-10 saniyə davam etdi. Dərhal hadisə ilə bağlı komissiya yaradıldı və rayonun bütün ərazilərindəki ev və obyektlərə baxış keçirildi. Xoşbəxtlikdən nə rayonda, nə kəndlərdəki ev və obyektlərdə heç bir zədə qeydə alınmayıb".
E.Cahangirov bildirib ki, hadisə nəticəsində sakinlər arasında narahatçılıq hiss edilsə də, əhali arasında aparılan danışıqlardan sonra vəziyyət sabitləşib.
Qeyd edək ki, zəlzələ yaxın ərazilərdə, o cümlədən Mingəçevir, Gəncə, Göranboy, Qəbələ və Şəkidə də hiss olunub.
İmişlidə baş vermiş zəlzələ ilə bağlı həm İmişlidə, həm də zəlzələnin hiss olunduğu ətraf rayonlarda əhalinin narahatlığına heç bir əsas yoxdur. Bunu Trend-ə Respublika Seysmoloji Xidmət Mərkəzinin direktoru Qurban Yetirmişli deyib.
O bildirib ki, səhər saatlarında baş vermiş əsas təkanda enerji boşalması baş verib: "Əsas təkandan sonra iki-üç dəfə afterşoklar qeydə alınıb və gün ərzində də zəif afterşokların baş verməsi davam edəcək. Əsas təkanda enerji boşalması artıq baş verib. Zəlzələnin maqnitudası 5,6 bal gücündə olub. Həmin ərazidə də tarixən baş verən zəlzələlər bundan güclü olmayıb. Sadəcə bəxtimiz onda gətirib ki, zəlzələ 25 km dərinlikdə baş verib və ona görə də zəlzələnin fəsadları azdır. Yəni qorxulu bir şey yoxdur, əhalinin narahatlığına heç bir əsas yoxdur”.
İmişlidə baş vermiş yeraltı təkanlar İran ərazisində də hiss olunub. Trend İRNN-yə istinadən məlumat verir ki, İranın Parsabad şəhərində 1 nəfər aldığı xəsarətlərdən dünyasını dəyişib.
Bakı-Novorossiysk boru kəməri ilə neft ötürülməsi hazırda səhər saatlarında Azərbaycanda baş vermiş zəlzələdən sonra yoxlamalar aparılması məqsədilə dayandırılıb. Bu barədə RİA Novosti-yə "Transneft"in başçısının müşaviri İqor Demin deyib.
SOCAR-dan isə bildiriblər ki, Bakı-Novorossiysk boru kəməri ilə neft ötürülməsi əvvəlki rejimdə davam etdirilir. Şirkətdən bildiriblər ki, avqust ayı üzrə cədvələ uyğun neft tədarükünə səhər saatlarında başlanılıb: "Bizə tədarükün dayandırılması barədə məlumat daxil olmayıb. Ola bilər ki, hansısa mərhələdə müvəqqəti fasilə yarana bilər, lakin hazırda planlı şəkildə tədarük davam edir, boru kəməri işləyir və "Tarnsneft"dən hər hansı müraciət bizə daxil olmayıb".
