Azərbaycan Səhiyyə Nazirliyi "Les Laboratories Servier” şirkətinin "Fuzafungin” tərkibli dərman vasitələrinin, o cümlədən "Bioparox” dərman vasitəsinin dövlət qeydiyyatı ləğv olunması və aptek şəbəkələrindən çıxarılması barədə qərar qəbul edib.
Səhiyyə Nazirliyinin mətbuat xidmətindən Trend-ə verilən məlumata görə, son günlər Azərbaycan Respublikası Səhiyyə Nazirliyi Analitik Ekspertiza Mərkəzinin rəsmi internet saytında (www.pharma.az) "Bioparox” dərman vasitəsinin dövlət qeydiyyatının ləğv edilməsi barədə məlumat yerləşdirildikdən sonra kütləvi informasiya vasitələrində, sosial şəbəkələrdə, əhali arasında əsası olmayan, mahiyyəti bilinmədən müxtəlif doğru olmayan məlumatlar yayılmışdır. Bununla əlaqədar olaraq, əhalinin məlumatlandırılması məqsədilə açıqlama zəruriyyətini ifadə edərək Səhiyyə Nazirliyi bildirir ki, sözügedən dərman vasitəsinin rəsmi distribyuteri olan "Les Laboratories Servier” şirkəti tərəfindən "Bioparox” dərman vasitəsinin idxal olunduğu bütün dövlətlərin səlahiyyətli orqanlarına müraciət ünvanlanmışdır.
Müraciətdə göstərilir ki, Avropa Dərman Agentliyinin (European Medicines Agency) Famakonəzarət Risk Qiymətləndirilməsi Komitəsi tərəfindən Macarıstanın "EGİS Pharmaceutical PLC” şirkətinin istehsalı olan "Bioparox” burun və ağız boşluğuna inhalyasiya üçün sprey, flakonda 10 ml №1 dərman vasitəsinin istifadəsi zamanı yüksək risk, ciddi allergik reaksiyalar aşkar olunmuşdur və bəzi ölkələrdə hətta ölümlə nəticələnmişdir. Qeyd edək ki, "Bioparox” dərman vasitəsi Azərbaycanda DV 15-00640 qeydiyyat vəsiqəsi ilə dövlət qeydiyyatına alınmışdır.
Azərbaycan Respublikası Nazirlər Kabinetinin 13 iyul 2007-ci il tarixli 108 nömrəli Qərarı ilə təsdiq edilmiş "Dərman vasitələrinin dövlət qeydiyyatı və reyestrinin aparılması Qaydaları”nın 13.1.4-cü və 13.1.6-cı maddələrinə görə qeydiyyata alınmış dərman vasitəsinin insanların həyatına və sağlamlığına təhlükə yaratdığı barədə səlahiyyətli orqanların qərarı olduqda və dövlət qeydiyyatından sonrakı dövrdə ciddi kənar təsirlər aşkar edildikdə Səhiyyə Nazirliyi dərman vasitəsinin dövlət qeydiyyatını ləğv edir.
Səhiyyə Nazirliyi Farmakoloji və Farmakopeya Ekspert Şurasının 16 nömrəli İclas Protokolu ilə qərara alınmışdır ki, "Les Laboratories Servier” şirkətinin "Fuzafungin” tərkibli dərman vasitələrinin, o cümlədən "Bioparox” dərman vasitəsinin dövlət qeydiyyatı ləğv olunsun və aptek şəbəkələrindən çıxarılsın. Səhiyyə Nazirliyinin Sərəncamına əsasən dərman vasitəsinin dövlət qeydiyyatı ləğv edilmişdir. Prosesin məntiqi davamı olaraq, Səhiyyə Nazirliyi Analitik Ekspertiza Mərkəzinin əmri əsasında bütün topdansatış və pərakəndə əczaçılıq müəssisələrinə sözügedən dərman vasitəsinin geri çağırılması barədə xəbərdarlıq məktubu göndərilmiş, dərman vasitəsinin qeydiyyatı ləğv edilərək "Dərman vasitələrinin reyestri”ndən çıxarılmış və bu barədə Mərkəzin rəsmi internet saytında (www.pharma.az) məlumat yerləşdirilmişdir.
Əlavə olaraq qeyd edək ki, istehsalçı şirkət tərəfindən "Bioparox” dərman vasitəsinin istehsalı dayandırılmış və qalan seriyaları satışdan çıxarılmışdır.
