Azərbaycanda müalicənin keyfiyyətinin yaxşılaşması, xəstələrin ömrünün uzanması, bu xəstəlikdən ölüm hallarının azalması nəticəsində dializ ilə əhatə edilən xroniki böyrək çatışmazlığı xəstələrinin sayı hər il 20-22 % artır. Trend-in məlumatına görə, bunu M.C.Cavadzadə adına Respublika Klinik Uroloji Xəstəxanasının hemodializ şöbəsinin müdiri Fariz Babayev bu gün keçirilən mətbuat konfransında deyib.
Onun sözlərinə görə, Ümumdünya Səhiyyə Təşkilatının məlumatına əsasən, müxtəlif ölkələrdə 1 milyon əhalidən 800-1000 nəfərində xroniki böyrək çatışmazlığı müşahidə olunur və onlardan 250-650 nəfəri dializ müalicəsi alır.
F.Babayev əlavə edib ki, hazırda dünya əhalisi arasında xroniki böyrək çatışmazlığı və bu səbəbdən dializ müalicəsinə cəlb olunan xəstələrin sayı artır.
Şöbə müdirinin sözlərinə görə, hazırda Azərbaycanda fəaliyyət göstərən 34 hemodializ mərkəzində (onlardan 26-sı regionlarda, 8-i Bakıda) 2 900-dən artıq xəstə dövlət vəsaiti hesabına proqram hemodializ müalicəsi qəbul edir. Hazırda ölkədə 544 hemodializ aparatı xəstələrə xidmət edir.
F.Babayev deyib ki, hazırda Azərbaycanda 3 044 hemodializ xəstəsi var. Xəstələrdən ən cavanının 6, ən yaşlısının isə 84 yaşı var. F.Babayevun sözlərinə görə, bu gün Azərbaycanda 1 milyon əhaliyə 450-500 nəfər böyrək çatışmazlığı xəstəsi düşür ki, onların da təxminən 50-55 %-nin hemodializə ehtiyacı olur.
Şöbə müdiri qeyd edib ki, əhalinin sıxlıq müşahidə olunan regionlarında, xüsusən Azərbaycanın qərb bölgəsində böyrək xəstələrinə daha çox rast gəlinir.
F.Babayevin sözlərinə görə, dünyanın ən aparıcı ölkələrində böyrək xəstələri arasında ölüm göstəricisi 29-35 % -dir. Azərbaycanda isə bu göstərici 22-23 % təşkil edir.
Şöbə müdiri qeyd edib ki, Azərbaycanda bir il ərzində 600-650 xəstə ölümü qeydə alınır. Dünya statistikası rəqəmlərindən daha aşağıdır.
Bu ilin yanvarın 17-də Nazirlər Kabinetinin qərarı ilə Xroniki böyrək çatışmazlığı xəstəlikləri üzrə Dövlət proqramının 2016-2020-ci illəri əhatə edən ikinci mərhələsinin qəbul olunduğunu xatırladan F.Babayev əlavə edib ki, bu proqrama uyğun olaraq respublikaının bütün regionlarında dializ mərkəzlərinin açılması planlaşdırılır.
