Binəqədi rayonunda fəaliyyət göstərən tam orta məktəblər sırasında builki qəbul imtahanlarında yüksək nəticə toplayan, əsaslı şəkildə təmir olunmuş, maddi-texniki bazası gücləndirilmiş, informasiya texnologiyaları yüksək səviyyədə tətbiq olunan tədris ocağının 1 illik fəaliyyəti ilə tanış olmaq üçün 283 nömrəli tam orta mətəbə yollandıq.
Məktəbin girişində cənab Prezident İlham Əliyevin Binəqədi məktəblərinə, təhsilə ayırdığı qayğı və diqqəti əks etdirən lövhələr yaradılmış şərait hesabına təhsildə keyfiyyət dəyişikliklərinin ildən-ilə artırıldığını sübut edirdi. Əsas məqsəd göz qabağındadır: gələcəyimiz olan uşaqları savadlı, bilikli, vətənpərvər gənclər kimi yetişdirmək. Çünki hər bir ölkənin gələcəyi onun hazırladığı gənclərdən asılıdır. Xüsusilə qeyd etmək istərdim ki, 2014-2015-ci tədris ilində qəbul imtahanlarında 47 şagird ali məktəblərə qəbul olunub, bunlardan 7 nəfəri 600-dən yüksək bal toplayıb.
Təhsil Nazirliyinin uğurlu kadr siyasəti nəticəsində cari tədris ilinin sentyabr ayında məktəbə təyinat almış, vətənpərvərliyi, dinamikliyi, təhsilə sonsuz məhəbbəti ilə seçilən məktəbin direktoru Tünzalə Zeynalova ilə söhbətimdə "bu gün 1 il ərzində gördüyümüz işlərə nəzər salanda sevinirəm, sabaha, xoş gələcəyə gedən yollarda qətiyyətli addımlar atan layiqli vətən övladları tərbiyə etdiyimizə görə fəxarət hissi keçirirəm" söylədi.
Bu tədris ilində aparılan silsilə tədbirlər içərisində "dəyirmi masa"lar, İKT-nin tətbiqi ilə müasir dərsə verilən tələblər əsasında qurulan "açıq dərs"lər məktəbdə təlimin keyfiyyətini yüksəldən bir çox amillər kimi diqqəti cəlb edir.
Vətənə, doğulduğu torpağa bağlı olan, xeyriyyəçi, ictimai xadim kimi xalqın yaddaşına həkk olunmuş X.Natəvan, vətənpərvərlik timsalı, yaradıcılığı ilə gənclərimizdə doğma yurda bağlılıq hisslərinin tərbiyəsində əvəzsiz iz qoyan şair M.Müşfiq, ana dilini xalqın varlığının mənəvi pasportu hesab edən B.Vahabzadə yaradıcılığına həsr olunan "dəyirmi masa"lar şagirdləri cəmiyyət üçün layiqli övlad yetişdirən xidmətin nümunəvi göstəricisidir. Azərbaycan dili, ingilis dili, fizika, biologiya, coğrafiya fənləri üzrə hazırlanmış bu qəbildən olan tədbirlər də aktuallığı və elmiliyi ilə fərqlənir.
Bu il Bakı şəhəri məktəbliləri arasında TİKA və "Pətək" İB-in həyata keçirdiyi "Sağlam qida - sağlam nəsil" layihəsi çərçivəsində elan olunmuş "Sağlam həyat tərzi" adlı müsabiqədə Binəqədi rayonu 283 nömrəli tam orta məktəb iki nominasiyada: dekorativ guşə və bədii təqdimat üzrə respublikada 2-ci yerə layiq görülüb.
Qarabağ həqiqətlərini, onun erməni işğalçıları tərəfindən zəbt olunması faktını gənclərə dönə-dönə çatdırmaq məqsədi ilə fərqli layihə və süjet xəttini əhatə edən "Yaralı Şuşam mənim" adlı tədbir genişmiqyaslı təbliğat planı kimi təqdirəlayiq hesab olunmalıdır.
Məktəbin saysız-hesabsız uğurlarında xüsusi vurğulana bilən bir məqam da var: Azərbaycan bölməsində təhsil alan 7-ci sinif şagirdi Məşrik Xədicə rus dili və ədəbiyyat üzrə keçirilən VIII Respublika Olimpiadasında I yerə layiq görülüb. Təbii ki, bu nailiyyətlərin qazanılmasında məktəb rəhbərliyinin və pedaqoji kollektivin böyük əməyi var.
16 aprel 2016-cı ildə məktəb rəhbərliyinin və ümumi məktəbin fəaliyyəti haqqında valideynlərlə anonim sorğu keçirilib. Sorğunun nəticəsi əsaslandırılmış sənəddə təqdirəlayiq hesab edilib.
Məktəbdə qazanılan uğurların əsas səbəbi kollektivin işinə məsuliyyətlə yanaşmasıdır. Dövlət qayğısı, yaradılan şərait, tədris işinə məsuliyyət hissi məktəbdə vəhdət təşkil edir.
Məktəbin vəzifəsi ali təhsil ocaqlarına yalnız kadr hazırlamaq deyil, xalqımız, dövlətimiz, cəmiyyətimiz üçün layiqli vətəndaş yetişdirməkdir. 283 nömrəli tam orta məktəbin kollektivi qazanılan uğurları son hədd hesab etmir, daha yüksək nailiyyətlərə imza atmaq əzmi ilə çalışır. Məktəb rəhbərliyi və kollektiv üzvləri ilə apardığımız söhbətlərdən gəldiyimiz təəssüratlar da bu qənaətimizi qətiləşdirdi.
