Çöpçülük hələ də "tibb sahəsi", gəlir mənbəyi, həm də hepatit virusunun əsas yayılma mənbələrindən biri kimi...

Tarix: 26.05.2016 / 00:41
Bölmə: Sosial

Rasif Bağırov: "Hepatit virusunun geniş yayıldığı indiki dövrdə çöpçülərin yanına xəstə aparmaq çox təhlükəlidir"

Aysel Zeynalova: "Çöpçüyə fanatik münasibəti olan valideynlər var"

Sirr deyil ki, körpə uşağı olan valideynlərin üz tutduğu insanlardan biri çöpçüdür. Bəzən olur ki, uşaqda qızdırma, qarın ağrısı, nəfəsalmada problem olan kimi bir çox valideyn çöpçüyə üz tutur. Çöpçü isə üfürərək uşağın burnundan müxtəlif meyvə qabığı, tumu, kiçik sümük qırığı belə çıxarır. Hətta bəzən qəpik çıxaran çöpçülər belə olur.
Valideynlər isə əksər hallarda çöpçülərin daimi müştərisinə çevrilir. Nəticə olaraq bu gün çöpçülərin qazancı kifayət qədər yaxşıdır.
Çöpçülərin uşağın boğazında necə və hansı yolla çöp çıxarmasının şəxsən şahidi olmuşam. Doğmalarımın qonşuluğunda çöpçü Pakizə adlı qadın yaşayırdı. O qadının evinə gün ərzində 3 qadın uşağını gətirirdi ki, bəs onun uşağındı çöp qalıb. Bir gün bu prosesi izləmək üçün çöpçü qadının evinə getdim. Qohumlarımıza qonşu olduğundan, məni qəbul etdi və göz vuraraq dedi ki, bax gör bu iş əslində necə olur. Pakizə xalanın yanına gələn valideyn narahat halda dedi ki, bəs onun uşağının boğazında çöp qalıb. Çöpçü uşağın ağzına baxaraq dedi ki, bu dəqiqə o çöpü çıxardaram. Pakizə xala dedi ki, əlimi yuyum, gəlib uşağın boğazına rahat baxım. Qayıdandan sonra bir əli ilə uşağın boğazını basdı və o an körpə ağlamağa başladı, daha sonra çöpçü ağzını uşağın ağzına dayayaraq üfürdü və günəbaxan tumunu əlinə alıb valideynə uzatdı ki, uşağın boğazında qalan tum imiş... Bunlar çöpçüyə müəyyən məbləğdə pul verərək evdən ayrıldılar. Daha sonra çöpçüdən uşağın boğazında çöpün necə qala bilməsini soruşdum. O mənə cavabında dedi ki, uşağın boğazı gəlir və o heç nə yeyə bilmir. Valideyn elə bilir ki, boğazında nəsə qalıb: "Belə müştərilərin gələcəyini bildiyimiz üçün daim tədarüklü olmalıyıq. Evdə mövsümə aid olan meyvələrin dənələrini, tumlarını, dilimlənmiş ət, qoz, fındıq və kağız qırıntılarını hazır saxlayırıq. Birdən müştəri gələndə tez əlimizi yumaq adı ilə onların yanından ayrılıb dilin altına bu sadaladıqlarımdan birini qoyuram. Daha sonra uşağın boğazını basıram. Bəllidir ki, boğazı gələn istənilən adamın boğazı basılsa, o qismən rahatlayır. Boğazı basandan sonra ağzımı uşağın ağzına dayayıb üfürürəm. Üfürən zaman dilimin altında saxladığım qırıntını çıxarıb valideynə göstərirəm ki, bax, uşağın boğazında bu qalıb. Uşaqların sakitləşməsinin səbəbi isə boğazın basılması ilə bağlıdır".
Bu gün onlarla belə çöpçü var. Təəssüf ki, bu gün valideynlərin, demək olar ki, bir qismi çöpçüyə inanır və övladlarını həkimə deyil, tibbi savadı olmayan çöpçüyə aparır.
Pediator Aysel Zeynalova bizimlə söhbətində bildirdi ki, təbabətdə yuxarı tənəffüs yollarının yad cisimləri deyilən anlayış var: "Burun-udlaqda xırda ciblər var və buraya yad cisimlər düşə bilər. Onu tibbi yolla xaric edirlər. Bu, həkimin əlində təxminən bir dəqiqəlik işdir".
Həmsöhbətimizin sözlərinə görə, çöpçüyə fanatik münasibəti olan valideynlər var: "Belə valideynlər uşağın qarnı ağrıyanda belə çöpçüyə qaçır. Deyirlər ki, çöpünü çıxarandan sonra uşağın qızdırması düşdü, qarın ağrısı kəsdi. Yad cisim düşdüyü xırda ciblərdə mütləq iltihabi proses yaratmalıdır ki, qızdırma qalxsın. Çöpçü də tutaq ki, yad cismi üfürüb çıxardı. Amma o yeri müalicə etmədiyinə görə iltihab orada qalır. Qızdırma yaradan səbəb iltihabdırsa, gərək iltihab müalicə edilsin. Bir sözlə, tibbi baxımdan bunun izahı yoxdur. Bu, mistik, mifik bir şeydir".
Pediatr onu da əlavə etdi ki, çöpçülərin ağız boşluğunun infeksiyalarından təmiz olması barədə valideynlər necə əmin ola bilər: "Onlar infeksiyanı birbaşa uşağın ağzına, ya da burnuna ötürür. Buna görə çöpçüdən çıxanda uşağın vəziyyətinin ağırlaşması mümkündür. Çünki çöpçünün sayəsində uşağın orqanizminə əlavə infeksiya düşür, əlavə müdaxilə olunur".
Tibb sahəsi üzrə mütəxəssis Rasif Bağırov çöpçülüyün heç bir elmi əsası olmadığını bildirdi: "Hepatit virusunun geniş yayıldığı indiki dövrdə çöpçülərin yanına xəstə aparmaq çox təhlükəlidir. Çöpçülər çox asanlıqla belə şəxslərə müxtəlif xəstəliklər yeridə bilər, çünki çöpçülərin istifadə etdiyi alətlərin harada, necə sterilizə olunması sual altındadır. Bu işlə məşğul olanların əksəriyyəti təhsili olmayan, avam insanlar olur. Buna görə də məsləhət görərdim ki, insanlar bu cür aldatma üsullarından istifadə etməsin. Ölkədə kifayət qədər qulaq-burun-boğaz həkimi var ki, bunlar müxtəlif müasir texnika ilə, alətlərlə, kameralarla, qırtlağa, boğazın bütün ətrafına baxmaq, müalicə etmək, oradakı yad cisimləri görmək, lazım olarsa, çıxarmaq imkanlarına malikdir. Ona görə də çöpçülərə müraciət etmək qətiyyən düzgün deyil. Onlar heç əlcəkdən də istifadə etmir. Adi suda yuduğu əlləri ilə birbaşa xəstənin boğazına müdaxilə edirlər. İnsan boğazı isə hər cür infeksiyalara həssasdır".
Günel CƏLİLOVA

DİGƏR XƏBƏRLƏR

Tarix: 01.10.2026 / 16:19

Nazir Vilayət Eyvazov MDB-nin DİN Şurasının iclasında iştirak edib - FOTO

Tarix: 01.10.2026 / 15:39

Əbədiyyət günəşinə dönən Vətən sevdalıları...

Tarix: 01.10.2026 / 14:56

“Universitetdən qovulmağımın qarşısını Mir Cəlal Paşayev aldı” – Nizami Təhməzov

Tarix: 01.10.2026 / 11:00

Kürdəmirdə toyda zəhərlənənlərin sayı 91-ə çatdı - AQTA araşdırmalara başladı...

Tarix: 01.10.2026 / 00:25

Kürdəmirdə toyda kütləvi zəhərlənmə - 30 nəfər xəstəxanaya müraciət etdi...

Tarix: 30.09.2026 / 21:47

Kolleclərə qəbul planı da, tələbə marağı da azalıb...

Tarix: 30.09.2026 / 17:34

“Nar” “AiNar” rəqəmsal köməkçisini istifadəyə verdi

Tarix: 30.09.2026 / 14:35

DİN-in Mərkəzi avtobus zolaqlarına daxil olan sürücülərə müraciət etdi - VİDEO

Tarix: 30.09.2026 / 12:50

Cəlilabadda kütləvi zəhərlənmə - araşdırma aparılır...

Tarix: 30.09.2026 / 12:06

"Bələdiyyələr 300-500 min evdən əmlak vergisi toplaya bilmir" - Siyavuş Novruzov

Tarix: 30.09.2026 / 11:10

Faiq Ələkbərlinin “Türk xalqları fəlsəfəsi tarixi (Qədim dövr)” əsəri haqqında fəlsəfi düşüncələr

Tarix: 29.09.2026 / 20:25

Daxili işlər naziri Şəkidə vətəndaş qəbulu və sıra baxışı keçirəcək

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 28.09.2026 / 22:22

Xüsusi şərtlərlə pensiya alan qulluqçuların pulları azala bilər...

Tarix: 28.09.2026 / 20:57

Azərbaycandakı Kürmük məbədinə Gürcüstan patriarxlığının iddiası... Real tarix...

Tarix: 28.09.2026 / 14:57

Dövlət qulluğuna qəbulun mürəkkəbləşdirilməsi ciddi suallar doğurdu...

Azərbaycanın regional və beynəlxalq əməkdaşlığında hərbi tərəfdaşlığın rolu sürətlə artır