Ağcabədidə qanunsuz fəaliyyət göstərən heyvan kəsimi yerlərində yararsız ətlər aşkar edilib. Kənd Təsərrüfatı Nazirliyi yanında Dövlət Baytarlıq Nəzarəti Xidmətindən Trend-ə verilən məlumata görə, mayın 8-da Dövlət Xidməti insan sağlamlığı və qida təhlükəsizliyi ilə əlaqədar olaraq aparılan tədbirlər çərçivəsində Ağcabədi rayonunun Aşağı Avşar kəndində məlumat əsasında reyd keçirib. Reyd zamanı Aşağı Avşar kəndi ərazisində qeyri-qanuni fəaliyyət göstərən 4 ədəd: kənd sakinləri Şamil Məzahir oğlu Rüstəmova, Pənah Əvəz oğlu Mamedova, Cəmil Yunis oğlu İsmayılova və Taleh İbad oğlu Məhərrəmova məxsus heyvan kəsimi yerləri müəyyən edilib.
Qanunsuz fəaliyyət göstərən Şamil Məzahir oğlu Rüstəmova məxsus heyvan kəsimi yerində mənşəyinə və sağlamlığına dair heç bir müşahidəedici sənədi olmayan, xarici görünüşü, orqonoleptik göstəriciləri şübhə doğuran, baytarlıq müayinəsindən keçməyən 1 baş iribuynuzlu və 2 baş xırdabuynuzlu heyvan cəmdəyi aşkar edilib.
Heyvan cəmdəklərindən müayinə üçün nümunələr götürülərək Respublika Baytarlıq Laboratoriyasına göndərilib. Laboratoriyada aparılan müayinələr zamanı 2 nümunə xırdabuynuzlu heyvan ətində bakterioloji çirklənmə (BÇQB, stafilakokkus, aureus) aşkar olunub. Biokimyəvi müayinələr zamanı isə 2 nümunə xırdabuynuzlu heyvan ətinin keyfiyyətsiz və baytarıq-sanitariya cəhətdən qida üçün yararsız olması müəyyən edilib.
Laboratoriya müayinələrinin nəticəsinə uyğun qəbul edilmiş qərara uyğun olaraq, Ağcabədi rayonunun Aşağı Avşar kəndində aşkarlanan yararsız xırdabuynuzlu heyvan cəmdəkləri baytarlıq-sanitariya tələblərinə uyğun olaraq zərərsizləşdirilib.
