Azərbaycanda cinayət törədən qadınların sayında artım var. Trend-in məlumatına görə, bu barədə bu gün jurnalistlərə açıqlamasında Ədliyyə Nazirliyinin Penitensiar Xidmətinin rəisi vəzifəsini icra edən, ədliyyə general-mayoru Hüseyn Əlixanov deyib.
H.Əlixanov deyib ki, qadın məhkumların sayında ötən illərdə azalma halları olsa da, son bir ildə onların sayında artım var: "Son bir ildə qadınların cinayət törətmə halları artmaqdadır. Həmin qadınlar əsasən dələduzluq və insan alveri ilə bağlı cinayət hadisələri törədiblər".
Hüseyn Əlixanov deyib ki, Azərbaycanda tamah məqsədilə törədilən cinayətlərin sayında da artım var. O bildirib ki, əslində son illərdə məhkumların sayı stabil qalsa da, bu il qismən artıb: "Əsasən dələduzluq, quldurluq, soyğunçuluq cinayətləri törədənlərin sayı artıb. Yəni, əsasən tamah məqsədilə törədilən cinayətlərin sayında artım var. Bu isə təcridxanadan azad olunan məhkumların azadlıqda iş tapmaması ilə əlaqədardır".
Onun sözlərinə görə, Azərbaycanda 6 min nəfərə yaxın məhkum işlə təmin olunub. Bu, ümumi götürdükdə məhkumların dörddə biri deməkdir.
