Ailə-məişət zorakılıqlarının, boşanmaların kökündə dayanan ciddi problemlərdən biri də əxlaqsızlıqdır. Trend-in məlumatına görə, bunu Ombudsman Elmira Süleymanova aprelin 13-də Milli Məclisdə (MM) təşkil olunmuş "Ailə institutunun formalaşmasında adət-ənənələrimiz" adlı tədbirdə çıxışı zamanı deyib.
Bunu çox ciddi problem sayan ombudsman ona təəssüfləndiyini də söyləyib.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova isə Omdudsmanın bu fikirləri ilə razılşmayıb: "Elmira xanım, bu fikirlərinizlə insanların ürəyinə qorxu salırsınız. Düzdür, bizdə əxlaqsızlıq yuvaları var. Bunlar dünyanın hər yerində mövcuddur. Amma onlar bizdə o qədər də çox deyil. Həm də müvafiq nazirliklərimiz, eləcə də komitəmiz bunlara qarşı çox ciddi mübarizə aparırlar".
Elmira Süleymanova bildirib ki, Azərbaycanda boşanmaların sayı artmaqdadır.
Azərbaycanda 10 il əvvəl boşanma hadisələrinin cəmiyyət tərəfindən qeyri-adi qarşılandığını deyən E.Süleymanova bu gün boşanma hallarının artmasının əsas səbəblərini bir çox məsələlərlə əlaqələndirib.
Onun sözlərinə görə, boşanmaların əsas səbəvləri erkən və məcburi nikahlar, valideynlərin məsuliyyətsizliyidir.
Erkən və məcburi nikahlara daha çox rayonlarda, xüsusilə kəndlərdə rast gəlindiyini deyən ombudsman bildirib ki, Azərbaycanda qeydiyyata alınmayan nikahların sayı da çoxdur: "Bu da əsasən kəndlərdə və rayonlarda olur. İnsanların intellektual və psixoloji baxımdan uyğunsuzluğu da boşanmalara gətirib çıxaran əsas amillərdəndir. Kimisə zorla ərə verirlər və nəticədə uyğun dilə gələ bilməyərək ümumi fikrə gələ bilmirlər. Ailələrin dağılmasına digər səbəblərdən biri də narkomaniyadır. Eyni zamanda, qumar oyunları da bu qəbildən olan problemlərdəndir. Bizə ərizələrlə müraciət edirlər ki, qumar oyununda qızını uduzan atalar olur. Cinsi zorakılıqlar və bu yolla yoluxan xəstəliklər də bu sıradadır".
E.Süleymanova hesab edir ki, bu gün ailə münasibətlərinin möhkəmlənməsi üçün ilk növbədə ailədə bir-birinə güzəştə getmək hissini tərbiyə etmək lazımdır.
Ombudsman hesab edir ki, ailədə münaqişələrin aradan qaldırılması üçün maarifləndirmə işlərinin aparılması ictimai təşkilatların əsas vəzifələrindən biri olmalıdır.
