Xətai Rayon Polis İdarəsinin əməkdaşları bu dəfə şəhid Allahverdi Xəlilovun adını daşıyan 263 nömrəli orta məktəbdə şagirdlərlə və valideynlərlə görüşə gəlmişdilər.
Təhsil ocağında yaradılan şərait, nizam-intizam diqqətimizdən yayınmadı. Məktəbin direktoru Nəsimi Abbasov bu gün dövlətimizin təhsilə xüsusi önəm verdiyini, elm və təhsil sahəsində islahatların davam etdirildiyini, xüsusi istedada malik şagirdlərə, tələbələrə təqaüdlər ayrıldığını, istənilən xalqın inkişafının təhsillə sıx bağlı olduğunu diqqətimizə çatdıraraq müasir avadanlıqla təchiz edilən yeni təhsil müəssisələrində gələcəyimizi etibar edəcəyimiz gənclərin yetişməsi üçün hər cür şəraitin yaradıldığından razılığını bildirdi.
Məktəb direktoru ötən il məktəbin məzunlarından 6 nəfərinin 650-dən çox bal toplayaraq ölkənin ən aparıcı təhsil müəssisələrinə qəbul olunmasını da sevinc hissilə dedi.
"Tədbirin başlamasına hələ var", - deyən Xətai Rayon Polis İdarəsinin rəisi, polis polkovniki Muradəli Babayev əvvəlcə aşağı sinif şagirdləri ilə görüşmək arzusunda olduğunu bildirdi.
Maraq dolu baxışlarla bizi izləyən birincilərlə ünsiyyət qurmaq üçün idarə rəisi onlara "Kim polis olmaq istəyir",- deyəndə oğlanlarla bərabər qızlar da əllərini qaldırdılar. "Niyə polis olmaq istəyirsiniz" sualına isə ön cərgədə oturan birinci belə cavab verdi:
- Çünki polis bizi qoruyur, bizə yolda kömək edir...
Polis haqqında uşaqlarda obyektiv fikir formalaşdıran müəllimlərimizə "sağ ol" deyib tədbirin keçiriləcəyi akt zalına qalxdıq.
Yuxarı sinif şagirdləri, müəllimlər və valideynlər zalda yerlərini tutmuşdular.
Tədbiri giriş sözü ilə açan N.Abbasov şagirdlərə sağlam həyat tərzinin aşılanmasında, onlar arasında zərərli vərdişlərə, xüsusilə narkotikaya qarşı meylin qarşısının alınmasında ümumtəhsil məktəblərinin pedaqoji kollektivlərinin, xüsusilə psixoloqların qarşısında mühüm və məsul vəzifələrin durduğunu qeyd etdi. Bildirildi ki, dünyanı cənginə alan bəlaya və onunla mübarizəyə qarşı ölkəmizdə də uğurlu mübarizə aparılır. Yəni gündən-günə kürəsəlləşən dünyamızda uşaqlara diqqət və qayğının artırılması valideynlərlə yanaşı, bu gün dövlətimizin də nəzarətindədir. Məhz buna görə də aidiyyəti qurumların cəmiyyəti narahat edən problemlərə diqqət çəkib həyəcan təbili çalmaları, əlbəttə ki, başadüşüləndir.
Məktəb direktoru narkomaniya və pis vərdişlərlə mübarizədə bu gün Azərbaycan Polisinin gələcəyimizi və gəncliyimizi düşünərək atdığı addımları, gördüyü işləri çox yüksək qiymətləndirdi. Məhz keçirilən bu tədbirin də onların təşkilatçılığı ilə baş tutduğunu deyib qonaqları təqdim etdi.
Polis polkovniki Muradəli Babayev şəxsiyyətin inkişaf etdirilməsi üçün zəruri olan keyfiyyətlərin, vərdişlərin formalaşmasında məktəblərin rolunu xüsusi vurğuladı. O qeyd etdi ki, narkomaniya adlı bəladan qurtulmaq, onunla mübarizə aparmaq üçün hər birimiz əl-ələ verməli, səylərimizi birləşdirməliyik. Məktəb, valideyn və polis həmrəyliyi övladlarımızı bu bəlanın girdabına düşməkdən qoruyar.
Qeyd olundu ki, ölkə başçısı cənab İlham Əliyevin "Narkotik vasitələrin və narkomanlığın yayılması ilə mübarizə üzrə Dövlət Proqramının (2013-2018-ci illər) təsdiq edilməsi barədə" Sərəncamı bu sahədə daha böyük işlər görülməsi üçün zəmin yaradıb.
İdarə rəisi gənclərin zərərli vərdişlərdən uzaq olmaları üçün cinayətkarlıqla ciddi mübarizə aparan, asayişin keşiyində ayıq-sayıq duran, sabitliyi qoruyan polisin də bu bəla ilə mübarizədə öncüllər sırasında olduğunu, gələcəyimiz olan uşaqları qorumaq naminə bundan sonra da daha ciddi mübarizə aparacaqlarını bildirdi.
Tədbirdə Respublika Narkoloji Mərkəzin Stasionar Şöbə müdiri Afət Məmmədovanın, Səhiyyə Nazirliyinin QİÇS-lə Mübarizə Mərkəzinin həkimi Dilşad Mahmudovanın və digərlərinin çıxışları şagirdlərin marağına səbəb oldu.
