Dünya daha bir Beynəlxalq Qadınlar Gününü arxada qoydu. 21-ci əsrdə dünyada hələ də hər gün 840 qadın doğuş zamanı dünyaya göz yumur. Siyasətdə qadınların təmsilçilik səviyyəsi 22 faizdir. Qadınların yarısından çoxu işləmir. İşləyənlər isə kişilərlə eyni işi görmələrinə baxmayaraq, çox az əmək haqqı alır.
Dünyada 3 milyard 600 milyondan çox qadın var. Bu, dünya əhalisinin az qala yarısı deməkdir. Qadınların orta yaşı 30, orta ömürü isə 70 ildir, kişilərə görə dörd il çox...
Qadınların 82 faizi oxuyub yazmağı bacarmır. Dünyada oxuyub yazmağı bacarmayan 1 milyard 64 milyon adamın üçdə ikisi qadınlardır. Bu qadınların da üçdə ikisi Qərb və Cənubi Asiya, Afrika ölkələrində yaşayır...
Dünyada təxminən 32 milyon QİÇS xəstəsi var. Bunların 16 milyonu, yəni yarısı qadındır. Dünya Səhiyyə Təşkilatının məlumatına görə, AIDS dünyada qadın ölümlərinin əsas səbəblərindən biridir.
Təşkilatın 141 ölkədə apardığı araşdırmalara görə, inkişaf etməkdə olan və az inkişaf etmiş ölkələrdə epidemiya xəstəlikləri də qadınlara daha çox təsir edir. Həm xəstəliyə tutulma, həm də ölüm faizi qadınlarda daha yüksəkdir.
2015-ci ildə hər yüz min doğumdan 216-sı ananın doğum zamanı ölümü ilə nəticələnib. Bu da gündə 840 qadının doğuş zamanı ölümü deməkdir. Bunun yarısından çoxu müharibə, qeyri-sabit bölgələrdə baş verib.
Belə bölgələrdə ölüm faizləri kişilərdə daha yüksək olsa da, buralarda qalmaq məcburiyyətində qalan qadınlar da bu vəziyyətdən təsirlənirlər. 2014-cü il ərzində təxminən 59,5 milyon insan müharibə, qarşıdurma və insan hüquqlarının pozulmasına görə öz yurdundan didərgin düşüb, qaçqın həyatı yaşamağa məhkum olub. Onların da 80 faizini qadın və uşaqlar təşkil edir.
Uşaq yaşda evlilik və təcavüz kimi hallar xoşagəlməyən hamiləliklərin artmasına ciddi təsir edib.
Suriyadan qaçan ya da ölkə daxilində yer dəyişdirən təxminən beş yüz min qadın hamilədir və ciddi baxıma ehtiyacı var.
Dünya əhalisinin yarısı qadınlardan ibarətdir, amma siyasətdə qadınların təmsilçilik səviyyəsi 22 faiz təşkil edir. Bu rəqəm 1995-ci ildə 11,3 faiz idi. Parlamentində ən çox qadın olan ölkə Ruandadır. Bu ölkə parlamentinin 63,8 faizi qadınlardan ibarətdir. Dünyanın 193 ölkəsinin 37-də qadınların parlamentdə təmsilçilik səviyyəsi 10 faizdən də aşağıdır. 6 ölkənin parlamentində isə ümumiyyətlə heç qadın yoxdur.
Qadınların rəhbərlik etdiyi nazirliklər isə17 faiz təşkil edir. Bunların böyük əksəriyyəti qadın, ailə və ya təhsil nazirlikləridir.
Hazırda dünyada 11 qadın dövlət başçısı var, 10 qadın da baş nazir postunu tutur...
Qadınların iqtisadi sahədə iştirakı yalnız özləri ya da ailələri üçün deyil, milli və qlobal iqtisadiyyat üçün də böyük əhəmiyyət daşıyır. İqtisadi Əməkdaşlıq və İnkişaf Təşkilatının araşdırmasına görə, qadınların təhsil alıb işə başladığı ölkələrdə, eyni səviyyədə iqtisadi artım da müşahidə edilir. Onların sayəsində, doğuş zamanı yaşanan körpə ölümləri 9,5 faiz azalıb.
Dünyada 2013-cü ildə kişilərin iş həyatında iştirakı 72,2 faiz, qadınların isə 47,1 faiz təşkil edir. Kişilərlə eyni işi görən qadınların maaşları da kişilərin aldığı maaşın 60-75 faizi arasında dəyişir. Bu fərq aradan qaldırılsa, dünya səviyyəsində qadınların aylıq gəliri 17 trilyon dollar arta bilər.
Ödənişli bir işdə işləməyən qadınların böyük bir qismi ev işlərinə cəlb edilir, iqtisadi cəhətdən başqalarından asılı vəziyyətdə yaşayır. Avropada belə qadınların dörddə biri uşaq, yaşlı və ya başqa səbəblərə görə işləmədiyini bildirir, eyni səbəblə işləməyən kişilər isə 3 faiz təşkil edir.
