Bəzi yerli saytlarda 46 nömrəli məktəblə bağlı çox köhnə olduğu ilk baxışdan görsənən xoşagəlməz xəbərlər və foto yayılıb. Yazırlar ki, məktəbin binasının damında şagirdlər gəzişir, eyni zamanda da rəqs edir. Mətbuatda yer alan yanlış xəbər və qərəzli foto 46 saylı Tam Orta Məktəbin rəhbərliyinin narazılığına səbəb olub.
Məktəbin direktoru, tanınmış ziyalı Sevinc Budaqova "Bakı-Xəbər"ə açıqlamasında təqdim edilən fotonun və yazının tamamilə əssasız olduğunu qeyd etdi:"Bəzi saytlar da bir-birini təkrar edərək yalan, dəqiqləşdirilməmiş foto və informasiya yayırlar. Bir foto yayıblar ki, guya şagirdlər məktəbin damında rəqs edirlər. Qeyd edim ki, 2003-cü ildə məktəbin damı o qədər də yaxşı vəziyyətdə deyildi, bu şəkildə o dövrə aiddir. Şəkil də görünür o dövrdə heç bizə aidiyyatı olmayan şəxslər tərəfindən çəkilib. Bizim məktəbin binası dam örtüyü də daxil olmaqla təmir edilib. Birinci dəfə 2005-2006-cı ildə İslam İnkişaf Bankının maliyyə vəsaiti ilə məktəbin binası təmir edilib. 2014-cü ildə cənab Prezidentin sərəncamı ilə yenidən 46 saylı məktəbdə əsaslı təmir işləri aparılıb və ötən il cənab Prezidentin şəxsən iştirakı ilə tam təmirdən sonra məktəbin açılışı olub, cənab Prezident bütün kollektivimizə uğurlar diləyib. Yayılan foto isə məktəbimizin indiki real mənzərəsini əks etdirmir. On il əvvələ aid olan fotonu hansısa pis məqsədlərlə və qərəzli şəkildə dövriyyəyə buraxanlar öncədən gəlib bina ilə tanış olaydılar. Görərdilər ki, məktəbin indiki dam örtüyü həmin o saxta fotodakından tam fərqlidi. Məktəbin indiki dam örtüyü tam metal şifer olduğu üçün onun üstünə çıxmaq heç mümkün belə deyil. Mən bilmirəm ki, o şəkil Bakıda hansı binaya aiddir? Ancaq əmin olun ki, bizim məktəbin binası ilə o fotonun heç bir əlaqəsi yoxdur".
S.Budaqova onu da əlavə etdi ki, məktəbin binası yüksək səviyyədə təmir edilib və heç bir şagird məktəbdə nəzarətsiz deyil.
İradə SARIYEVA
