Bakı Dövlət Universiteti (BDU), Gənclər və İdman Nazirliyi, Dördüncü Sənaye İnqilabının Təhlili və Koordinasiya Mərkəzi (4SİM), “BDU könüllüləri” təşkilatı, Süni İntellekt Azərbaycan Platforması və Dünya Azərbaycanlıları Gənclər Təşkilatının birgə təşkilatçılığı ilə BDU-da Süni intellekt etikası üzrə I Gənclər Forumu keçirilir.
Baki-xeber.com xəbər verir ki, forumda açılış nitqi ilə çıxış edən BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev bildirib ki, hazırda təhsil, elm, səhiyyə, iqtisadiyyat, media, incəsənət və s. kimi sahələrdə süni intellekt əsaslı tətbiqlər sürətlə genişlənir. Süni intellekt bu sahələrin inkişafına töhfə verməklə yanaşı, insan hüquqları və vətəndaş azadlıqları ilə bağlı məsələlərdə bəzən etik problemlərə də səbəb olur. Buna görə də süni intellektin etikası problemi günümüzün aktual məsələsidir: “Azərbaycanda bu istiqamətdə ilk təşəbbüs Bakı Dövlət Universiteti tərəfindən qaldırılıb. Süni intellekt etikasının akademik müstəvidə araşdırılması üçün BDU-da Süni intellekt etikası kafedrası yaradılıb. Bu kafedranın yaranması və formalaşdırılması istiqamətində işin aparılmasında Beynəlxalq Türk Akademiyası dəstək göstərəcək. Artıq bu ildən BDU-nun magistratura pilləsində təhsil alan bütün tələbələrə “Süni intellekt etikası” fənni tədris edilir. İnanırıq ki, bu istiqamətdə aparılan dövlət siyasəti daha da təkmilləşdiriləcək və süni intellektin etikası məsələsi də müvafiq qanunvericilikdə öz əksini tapacaq”.
Milli Məclisin deputatı Naqif Həmzəyev hazırda süni intellektin əksər hallarda düzgün istifadə edilmədiyinə diqqəti çəkib. O qeyd edib ki, günün tələbinə çevrilən süni intellekt daha çox alət kimi istifadə edilməlidir, onun birbaşa vasitə və ya mənbə kimi istifadəsi yanlışdır: “Bu gün sosial şəbəkələrdə süni intellekt vasitəsilə yaradılan audiovizual kontentlər müxtəlif müzakirələrə səbəb olur ki, bu da mənfi tendensiyalar doğurmaqdadır. Bu, həm də onun etikasının öyrənilməsi , aktual məsələ kimi araşdırılmasını tələb edir. Düşünürəm ki, gənclərimizin təşəbbüsü ilə keçirilən bu forum faydalı olacaq”.
4SİM-in icraçı direktorunun müavini Soltan Bayramov bəşəriyyətin texnoloji dəyişikliklərə sürətlə məruz qaldığı dövrdən keçdiyini və bunun iqtisadi yüksəlişin əsas hərəkətverici qüvvəsi olduğunu qeyd edib. XXI əsrdə bu rola süni intellekt sahiblənib və bütün sahələrə sirayət edib: “Dünya İqtisadi Forumunun “Gələcəyin əmək bazarı hesabatı”nda göstərilir ki, süni intellekt əmək bazarının məhsuldarlığını artırır. Bu, qarşıdakı illərdə ənənəvi peşələrin sıradan çıxmasına və yeni ixtisasların meydana gəlməsinə səbəb olacaq. Əmək bazarında yeni bacarıqlar əldə etmək isə rəqabətə davamlılığın əsas formuluna çevrilib. Bütün bunlar nəzərə alınaraq, ölkə başçısının Sərəncamı ilə Azərbaycanın növbəti üç il üçün “Süni intellekt Strategiyası” qəbul edilib. İqtisadiyyat Nazirliyi və 4SİM tərəfindən də qanunvericiliyin təkmilləşdirilməsi istiqamətində işlər aparılır. Ölkə vətəndaşlarının süni intellekt və data elmi sahəsində məlumatlılığının artırılması üçün Milli Proqram həyata keçirilir. Bakı Dövlət Universitetinin 1600-dən çox tələbəsi və 120-dən artıq müəllimi Milli Proqramdan yararlanıb və sertifikat əldə edib. Süni intellekt dövründə əmək bazarının əsas iştirakçısı olan gəncləri inkişaf etdirmək bu yoldakı əsas missiyamızdır”.
Daha sonra çıxış edən Gənclər və İdman Nazirliyi yanında İctimai Şuranın sədr müavini Ramin Həbibzadə, Süni İntellekt Azərbaycan Platformasının idarə heyətinin sədri Nərmin Həbibzadə və Dünya Azərbaycanlıları Gənclər Təşkilatının baş katibi Nazrin Süleymanova ölkəmizdə süni intellekt etikası mövzusunda ilk dəfə keçirilən forumun böyük əhəmiyyətə malik olduğunu bildiriblər.
Forum öz işini “Süni intellektin gələcək nəsillərə təsir imkanları, problemlər və fürsətlər” və “Süni intellekt etikası və gənclərin rifahı: süni intellekt dövründə təhsil, karyera və qlobal standartlar” mövzuları üzrə panel sessiyalarla davam etdirib. Günel CƏLİLOVA
