Rahət Rafət oğlu İsayev Azərbaycan tarixinin şanlı, şərəfli səhifəsi olan 44 günlük İkinci Qarabağ müharibəsində yağıya qarşı son damla qanına qədər döyüşüb şəhidlik zirvəsinə ucalıb. Vətəninə ürəkdən bağlı olan, onun hər qarışını özünə doğma bilən Rahət 26 dekabr 2000-ci ildə Biləsuvar rayonunun Əliabad kəndində dünyaya göz açıb. Az yaşında elə bir hünər göstərib ki, bu ona əbədiyyət qazandırıb. Vətən, torpaq naminə canını fəda edən zəfər şəhidi torpağa gömülməyib, köç etdiyi yer könüllər olub. Fəqət, Rahət gərəkli, dəyərli bir yaşayıb, Vətən yolunda işıqlı dünyadan çox tez gedib. O, həmişə xalqının nəzərində cavan görünəcək və ömrü gənclərə örnək olacaq.
Ruhunda, qanında Vətən sevgisi dövr eləyən, kənddə hamının sevimlisi olan Rahət 2007-2018-ci illərdə Malik Piriyev adına Əliabad kənd tam orta məktəbini bitirib Sabirabad Dövlət Sosial – İqtisad Kollecinin "Arxiv işi və Karguzarlıq" ixtisasına qəbul olunub. Amma Qarabağımızı işğal altında saxlayan, xalqımıza qarşı törətdiyi vəhşiliyə görə erməni dığalardan intiqam almaq məqsədilə 2019-cu ildə ordu sıralarına getməyə üstünlük verib. Doğma Azərbaycan naminə hər an canından keçməyə hazır olan, son dərəcə mərd, cəsur, ağıllı bir gənc kimi qısa zaman kəsiyində zabitlərin, əsgərlərin hörmətini qazanıb. Eləcə yaşına uyuşmayan təmkini, gözəl davranışı, mənəvi cəhətdən zənginliyi ona komandirlərində böyük inam yaradıb. Hərbi təlimlərdə də bir qayda olaraq fədakarlığı ilə seçilib, xüsusi peşəkarlıq göstərib. Beləcə Rahət əsgərlik zamanı müharibə meydanında yağının başını əzməyə qadir döyüşçütək yetişib.
Qəlbi düşmən tapdağında olan Qarabağımızın azad edilməsi istəyi ilə alışıb-yanan Rahət İsayev 27 sentyabr 2020-ci il tarixindən başlayan 44 günlük haqq savaşımızda yağıya qarşı ilk döyüşə girənlərdən olub. Dığaların kabusuna çevrilməklə müharibə meydanında cəsurluğunu təsdiq edə bilib. Döyüşdən-döyüşə yeni yaşayış məskənləri azad edildikcə igid əsgər daha da ruhlanıb, döyüş şücaətini artırıb. 6 noyabra qədər neçə-neçə odlardan, alovlardan qəhrəmanlıqla keçib. Düşmənin yüksək rütbəli zabitləri daxil olmaqla çox sayda hərbiçisini, döyüş texnikasını məhv edib. Xocavənd istiqamətində gedən döyüşlərdə yağı gülləsinə tuş gəlib.
Son damla qanını Vətən yolunda əsirgəməyən igid döyüşçü Rahət İsayev ölümündən sonra 3-cü dərəcəli "Vətənə xidmətə görə" ordeninə, “Vətən uğrunda”, “Cəsur döyüşçü” və “Xocavəndin azad olunmasına görə” medallarına layiq görülüb. Doğma kənd qəbiristanlığında uyuyan, ölümsüzlüyə qovuşan qəhrəmanın adına burada küçə də vardır.
Zəfər ORUCOĞLU Azərbaycan Jurnalistlər Birliyinin üzvü
