İlin sonunadək Hadrut qəsəbəsinə 79 ailənin, Qırmızı Bazar qəsəbəsinə 117 ailənin, Sos kəndinə isə 85 ailənin köçürülməsi nəzərdə tutulub.
Trend xəbər verir ki, bu sözləri Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov Ağdam şəhərində jurnalistlərə açıqlamasında deyib.
O bildirib ki, Ağdam, Füzuli və Xocavənd rayonlarında bərpa quruculuq işləri sürətlə davam edir:
"Bu yaxınlarda Prezident İlham Əliyevin Xocavənd və Füzuli rayonlarına növbəti səfəri baş tutmuşdur. Füzuli rayonunda Qaraxanbəyli kəndinin təməli qoyulub. Xocavənd rayonunda artıq ilk əhali qrupunun köçürülməsinə başlanılıb. Hadrut və Qırmızı Bazar qəsəbələrində 10, Sos kəndində isə 10 ailə ilk bərpa olunmuş yaşayışla təmin edilib. Ümumilikdə ilin sonunadək Hadrut qəsəbəsinə 79, Qırmızı Bazar qəsəbəsinə 117, Sos kəndinə isə 85 ailənin köçürülməsi nəzərdə tutulub. Bu kənd və qəsəbələrdən başqa, Xocavənd şəhəri və ətraf kəndlərində ümumilikdə 1552 ailənin köçü planlaşdırılır. Sözsüz ki, köç prosesi gələn il də davam etdiriləcək və rəqəmin artma ehtimalı böyükdür".
