"Statistik rəqəmlər son illərdə Azərbaycanda narkomaniyanın və narkocinayətkarlığın vəziyyəti və dinamikasında artımın müşahidə olunduğunu göstərir”. APA-nın məlumatına görə, bu, Ədliyyə Nazirliyi Məhkəmə Ekspertizası Mərkəzinin hesabatında öz əksini tapıb.
Hesabatda qeyd edilib ki, respublikada narkomaniya və narkobiznesin yayılmasına qarşı görülən qətiyyətli tədbirlərə baxmayaraq, bu sahədə əməliyyat şəraiti, mövcud kriminogen durum hələ də mürəkkəb olaraq qalmaqdadır. Sənəddə bu sahədəki vəziyyət təhlil edilərkən 2005 və 2012-ci illər üzrə statistik məlumatların müqayisəsinə də yer ayrılıb. Hesabatda qeyd olunur ki, 2005-ci ildə narkotik təsir altında cəmi 7 cinayət hadisəsi qeydə alındığı halda, 2012-ci ildə narkotik təsir altında törədilən cinayətlərin sayı 21,5 dəfə artaraq 150 olub. 2005-ci ildə Azərbaycanda narkotik vasitələrin qeyri-qanuni dövriyyəsi ilə bağlı 2014 cinayət törədildiyi halda, 2012-ci ildə bu növ cinayətlərin sayı 2559-a çatıb.
Müsadirə olunmuş narkotik vasitələrin və psixotrop maddələrin həcmi də müqayisə edilir. 2005-ci ildə 245 kq narkotik vasitə və psixotrop maddə, o cümlədən 35 kq tiryək, 13,4 kq heroin, 150 kq marixuana, 38,5 kq həşiş və həşiş yağı müsadirə edilib. 33,1 kq narkotik vasitə və psixotrop maddənin qaçaqmalçılıq yolu ilə daxil olmasının qarşısı alınıb. Həmin ildə 497,2 kq narkotik vasitələr hazırlamaq üçün xammal olan yaşıl kütlə halında çətənə aşkar edilərək məhv edilib. 2005-ci illə müqayisədə 2012-ci ildə müsadirə edilən narkotik vasitələrin və psixotrop maddələrin həcmi xeyli artıb. 2012-ci ildə 808,6 kq (2005-ci illə müqayisədə 3,3 dəfə artım) narkotik vasitə və psixotrop maddə müsadirə edilib, müsadirə edilən narkotik vasitələrdən 90,9 kq tiryək (2,6 dəfə), 84,9 kq heroin (6,3 dəfə artıq), 312 kq marixuana(2 dəfə), 50,6 kq həşiş və həşiş yağı (1,3 dəfə) olmuşdur. Bu ildə 2936,4 kq (5,9 dəfə) narkotik vasitələr hazırlamaq üçün xammal şəklində olan çətənə yaşıl kütlə şəklində məhv edilib.
