Sonsuzluğa görə artan boşanmalara çarə tapılacaqmı?

Tarix: 05.02.2015 / 00:33
Bölmə: Sosial

Nailə Hüseynova: «Sonsuzluq problemilə üzləşənlər öncə peşəkar həkimə müraciət etməli və bunun səbəblərini öyrənməlidir»

Bahar Qafarova: «Övladı olmayan cütlüklər boşanmaya üstünlük verir»

Əli İsaoğlu: «Boşanma üçün müraciət edəndə çox az adam sonsuzluğa görə ayrıldığını dilə gətirir»

Kamil Baxşəliyev: «Kişilər sonsuzluq problemi, cinsi xəstəliklər barədə həkimlə məsləhətləşməyi özlərinə sığışdırmır»

Ailə hər bir toplum üçün müqəddəs məfhumdur. Ancaq müasir dövrdə qurulan ailələrdən çox boşanmalar haqqında eşidirik. Ölkəmizdə də son bir neçə ildə qurulan ailələrin sayında azalma, boşanmaların sayında isə artım var. Bəs günbəgün artmaqda davam edən boşanmalara səbəb olan amillər nələrdir?

Aparılan araşdırmalara görə, boşanmaya səbəb olan amillərdən biri də sonsuzluqdur.

Dövlət Statistika Komitəsinin yaydığı məlumata görə, uşaqsız ailələrdə boşanma hallarının sayı 2009-cu ildə 4634, 2010-cu ildə 5527, 2011-ci ildə 7368, 2012-ci ildə 7575, 2013-cü ildə isə 7972 olub.

Uşaqlı ailələrdə isə boşanma hallarının sayı 2009-cu ildə 3150, 2010-cu ildə 3534, 2011-ci ildə 3379, 2012-ci ildə 3512, 2013-cü ildə 3758 olub. Son illərdə uşaqlı ailələr arasında 1 uşağı olan ailələrdə boşanma halları çoxalıb.

Biruşaqlı ailələrdə boşanma halları 1995-ci ildən 2010-cu ilədək artsa da, 2011 və 2012-ci illərdə belə boşanma hallarının sayı 2010-cu illə müqayisədə azalıb. Ancaq 2013-cü ildə bu rəqəm yenidən artaraq, ən yüksək həddinə çatıb.

1995-ci ildə 621 biruşaqlı ailə boşandığı halda, 2009-cu ildə 1632, 2010-cu ildə 1870, 2011-ci ildə 1738, 2012-ci ildə 1802, 2013-cü ildə 1921 biruşaqlı ailə boşanıb.

Ekspertlərin fikrincə, boşanmalara səbəb olan amillərdən biri də ailələrdən körpə səsinin gəlməməsidir.

Həkim-ginekoloq Nailə Hüseynovanın sözlərinə görə, sonsuzluq yüzlərlə səbəbdən yarana bilən və tibb elminin inkişafına baxmayaraq, müalicəsi çətin, bəzən isə mümkün olmayan xəstəliklərdən biridir: «Bu xəstəlik mütləq və nisbi ola bilər. Mütləq sonsuzluqda ailənin ömürlük uşaq sahibi olması mümkün deyil. Nisbi sonsuzluq zamanı isə yaranan problemin aradan qaldırılması, müalicə nəticəsində uşağın dünyaya gəlməsi mümkündür. Elə viruslar var ki, sonsuzluğa səbəb olur. Toksoplazmoz və ortimoz viruslarının qanda mövcudluğu sonsuzluq yaradır. Belə ki, qadınlarda hamiləlik olsa da, virusun təsirilə uşağın vaxtsız düşməsi baş verir. Təkrar olunan bu proses də sonsuzluq yaradır. Toksoplazmoz prazoyl xəstəliyidir, törədicisi isə toksoplazma qondi parazitləridir. Bu xəstəlik bütün toxumalara təsir etsə də, əsasən nevrotrop xassəyə malikdir. Bu virus insanlara bit, birə, taxtabiti, ağcaqanad və it dişləməsi vasitəsilə keçir. Onların dişləməsi zamanı sekret və ekssekret adlı viruslar orqanizmə daxil olur və toksoplazmoz xəstəliyi yaradır. Sözügedən virus hətta cinsi hüceyrələrin genlərinə də təsir edir. Əgər virus hamiləlikdən öncə aşkarlanarsa və dərhal müalicəyə başlanarsa, qadının yenidən hamilə qalması mümkündür. Ancaq virus gec aşkarlanan zaman müalicəsi çətinləşir, bəzən isə mümkünsüz olur».

Ginekoloq müxtəlif iltihabi və cinsi yolla keçən xəstəliklərin də sonradan sonsuzluğa səbəb olduğunu bildirdi: «Stress törədən faktorlar da cütlüyün övlad sahibi olmasına maneçilik törədir. Gündəlik stress qadınların sinir sisteminə mənfi təsir edir. Onun mayalanma prosesində bilavasitə iştirak edən daxili orqanlarının funksiyasını pozur. Bu da tədricən sonsuzluğa gətirib çıxarır». Həmsöhbətimizin sözlərinə görə, sonsuzluq problemilə üzləşənlər ilk öncə peşəkar həkimə müraciət etməli və bunun səbəblərini öyrənməlidir: «Bəzən olur ki, ailə qurulandan sonra ailələr uşaq olmur deyə boşanma qərarını verir. Bu düzgün qərar deyil. Sonsuzluğun bir neçə növü var. Ola bilər ki, dəqiq müalicədən sonra ailə övlad sahibi olsun».

Hüquqşünas Əli İsaoğlunun sözlərinə görə, boşanma üçün müraciət edəndə çox az adam sonsuzluğa görə ayrıldığını deyir: «Yəni bu problemi heç kim qabartmaq istəmir. Amma fərdlərlə danışdıqca başa düşmək olur ki, ailə övlad olmadığı üçün dağılır. Biz nə qədər onları barışdırmağa çalışsaq da, alınmır. Qadınlar ayrılmağa səbəb kimi maddi sıxıntıları, kişilər isə sonsuzluğu və nadir hallarda xəyanəti iddia edib ayrılırlar».

Psixoloq Bahar Qafarova isə bildirdi ki, belə cütlüklərin qarşısında seçim çox olsa da, onlar boşanmaya üstünlük verir: «Övladlığa götürmə, yaxın ailələrdən uşaq götürmə seçiminə insanlar çox az halda fikir verir. Çox az adam başqasının övladını böyütmə məsuliyyəti altına girir. Hər kəs istəyir ki, öz övladı olsun. Bəzən deyirlər sevgi varsa, ailə dağılmır. Amma düzünü deyim, sevgi olsa belə, ayrılıq olur. Uzun sürən müalicələr insanları yorur. Onlar ayrı-ayrılıqda düşünmək əvəzinə birdəfəlik son verməyə qərar verirlər».

Psixoloqun sözlərinə görə, əvvəllər ailələrdə övlad olmasa belə, ailəni saxlayır, müqəddəs hesab edirdilər: «İndi isə ailə dedikdə öncə uşaq nəzərdə tutulur. Gənclər ailə qurduqdan 5-6 ay sonra gəlindən soruşulur: nəsə varmığ Bu sual həm ailəyə zərər verir, həm də gənc ailə üzərində cəmiyyət qınağını hiss edir. Hər bir ailədə müəyyən dövrlərdə problemlər yaşanır. Ailədə arada olan «pərdə» götürülməyənə qədər birlikdə yaşamaq mümkün olur. Pərdə qaldırılanda isə insanlar bir-birini düşünməyib ağlına, ağzına nə gəldi dedikləri zaman, istər-istəməz, ayrılıq düşüncələri meydana gəlir.

Bu özünü daha çox uşaqsız ailələrdə göstərir. «Sən sonsuzsan», «Sən qısırsan», «Bir uşaq da dünyaya gətirə bilmədin» - bu kimi sözlər çox zaman uşağı olmayan ailələrdə işlədilir. Və təəssüflər olsun ki, bu sözləri çox zaman qadınlar eşidir. Əgər ailədə övlad dünyaya gəlmirsə, buna hər zaman səbəb kimi qadın görülür. Kişilər isə problemin onlarda olduqları barədə düşünmür, düşünmək belə istəmir.

Evdə, ailədə qayınananın, baldızın, digər qohumların tənələri ailənin dağılmasına səbəb olur. Bəzən sonsuzluqda gəlinini günahlandıran qayınanalar gəlini həkimə aparsalar da, öz övladlarının - oğullarının həkimə müraciət etməsini normal qarşılamır. «Kişinin övladı olar, yoxdursa, problem qadındadır» deyib müalicəni də çox zaman təktərəfli apardıqları üçün müalicələr nəticə vermir, ailələr dağılır».

Androloq Kamil Baxşəliyevin sözlərinə görə, kişilər sonsuzluq problemi, cinsi xəstəliklər, ümumiyyətlə, cinsi problemləri barədə həkimlə məsləhətləşməyi özlərinə sığışdırmır: «Kimsə görər, kimsə bilər düşüncəsi təəssüf ki, hələ də davam edir. Çox nadir hallarda kişilər bizə müraciət edir. O da ən əlacsız vəziyyətə düşəndə. Oğlan uşaqları körpə yaşlarından həkimə göstərilməlidir, onların cinsi inkişafı ilə yaxından maraqlanmaq lazımdır. Çünki oğlan uşaqlarında olan cinsi problemlər elə uşaq ikən daha tez və rahat həll olunur. Yaşa dolandan sonra isə onlar androloqa gəlməyi özlərinə sığışdırmır. Uşaq iki yaşından sonra ildə iki dəfə müayinə edilməlidir. Uşaqların aldığı zədələr, qəbul etdikləri dərmanlar onların sonsuzluğuna gətirib çıxara bilər. Sonsuzluq, cinsi problem isə birbaşa insanın psixikasına təsir edir. Belə adamlar əsəbi, aqressiv, acıdil, qısqanc və paxıl olur. Onlar bu problemi həll etmək üçün həkimə müraciət etmək yerinə mənəvi hisslərini işə salır, ətrafında olan insanları əzib keçməyə çalışır. İndiki cavanlar gec evləndikləri üçün sonsuzluq problemi yaşanır. Valideynlər övladlarının təhsilini, işini düşünüb ailə qurması barədə gec düşündükləri üçün evlənmə yaşı 30-35-ə qalxır. Bu dövrə qədər gənclər öz cinsi tələbatlarını başqa yerlərdə ödədikləri üçün ailə qurandan sonra övlad dünyaya gəlməsi böyük problemə çevrilir. Düşünürəm ki, valideynlər övladlarını 30-35 deyil, 23-28 yaşına qədər evləndirməlidir».

DİGƏR XƏBƏRLƏR

Tarix: 12.07.2026 / 12:03

Hacıqabulda avtobus aşdı, 30-dan çox sərnişin yaralandı...

Tarix: 11.07.2026 / 19:45

"Soyqırım və deportasiya qurbanlarına dəstək" adlı layihənin icrası davam edir

Tarix: 11.07.2026 / 19:03

Yazıçı-publisist Aydın Tağıyevin kitabının təqdimatı olub - FOTO

Tarix: 11.07.2026 / 09:44

Vətənə və xalqa xidmət edən ömür Doğum gününüz mübarək, hörmətli Rasim Məmmədov!

Tarix: 10.07.2026 / 19:55

Ermənilərin məhkəməsi çıxışlarla davam etdirilib FOTO

Tarix: 10.07.2026 / 18:40

Xaricdə təhsil şirkətləri ilə bağlı vətəndaşlara xəbərdarlıq edildi... - "özünü "təhsil ekspertləri" kimi təqdim edənlər..."

Tarix: 10.07.2026 / 17:35

Nazir Vilayət Eyvazovun göstərdiyi rəqəmlərlə bağlı müzakirə başladı - necə və hansı üsullarla?...

Tarix: 10.07.2026 / 17:19

Professor Məhərrəm Zülfüqarlının “ Atillanın yeni sərgüzəştləri” kitabı nəşr olundu - FOTO

Tarix: 10.07.2026 / 15:58

“XXI Əsrin Qadınları” İctimai Birliyinin layihəsinin yekun tədbiri Ağsuda keçirilib

Tarix: 10.07.2026 / 15:41

Marketlər yerli istehsalçılardan 100 min manat istəyir? – Deputatdan iddia...

Tarix: 10.07.2026 / 15:27

Ölkədə qulaqdibi xəstəliyinin artması iddiaları ilə bağlı rəsmi açıqlama...

Tarix: 10.07.2026 / 14:34

Kəlbəcərdə mina partladı...

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 09.07.2026 / 21:52

İrandan Trampa “İrəvan mesajı” - sülh olmasa, TRIPP marşrutuna dözmərik...

Tarix: 09.07.2026 / 19:38

Vətəndaşın məmurlarla birbaşa ünsiyyətində sıfır hədd - rəqəmsallaşma dövrünün hədəfi...

Tarix: 09.07.2026 / 18:51

Çin və ABŞ-ın mübarizə apardığı Gürcüstan limanında Azərbaycan həlledici söz sahibinə çevrilir...

Diasporumuza Rusiyada problemlər yaradılandan sonra Avropa, Amerika istiqamətində fəallıq başladı...