Qarabağdakı separatçılarla Fransa dövləti arasında illərdən bəri mövcud olan isti münasibətlər bu gün də davam edir. Təəssüf ki, Fransa dövləti reallıqlarla barışmaq istəmir və separatçılara aşkar dəstək verməkdə davam edir, bununla da Azərbaycanın ərazi bütövlüyünə qarşı təxribatçı addımlar atır.
Onu da qeyd edək ki, Fransanın Azərbaycandakı səfiri Zakari Qros Xarici İşlər Nazirliyinə (XİN) dəvət edilib. Azərbaycan xarici işlər nazirinin müavini Xələf Xələfov Fransa səfirinə 27 may tarixində Paris şəhərinin meri Ann İdalqonun Azərbaycan ərazisindəki qanunsuz qurumun qondarma nümayəndəsi ilə görüşməsi ilə bağlı etirazını bildirib. Fransa rəsmisi tərəfindən Azərbaycanın ərazi bütövlüyünə qarşı atılan bu addımın Fransa qanunvericiliyi və ölkənin beynəlxalq öhdəlikləri ilə açıq ziddiyyət təşkil etdiyi, eyni zamanda Fransa və Azərbaycan münasibətlərə xələl gətirdiyi səfirin diqqətinə çatdırılıb.
Paris şəhərinin merinin bu qanuna zidd və məsuliyyətsiz davranışının, həmçinin bölgədə müharibə sonrası sülh və etimad quruculuğu tədbirlərinə uyğun olmadığı vurğulanıb.
Göründüyü kimi, Fransa köhnə əməllərindən əl çəkmir. Necə etmək olar ki, bunun qarşısı alınsın, Fransa bu cür hallara birdəfəlik son qoysun?
“ Bir şeyi nəzərə almalıyıq ki, arxayınlaşmaq olmaz və mübarizə hələ qabaqdadır”
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə şərhində bildirdi ki, Fransanın və Amerika Birləşmiş Ştatlarının (ABŞ) açıq ermənipərəst mövqe tutması heç kim üçün sirr deyil: “Fransa daim belə mövqe tutub. ABŞ-da isə hakimiyyətlərin dəyişməsi bəzən münasibətlərin də dəyişməsi ilə nəticələnib. Ancaq Fransanın ermənipərəst mövqeyi dəyişməyib. Onlar erməni separatizminə daim dəstək veriblər və bu gün də verirlər. Bunların qarşısını almaq üçün Azərbaycan çox ciddi addımlar atıb. Etiraf etmək lazımdır ki, Fransanın və onun prezidenti Makronun mövqeyi kəskin şəkildə dəyişib. Əgər 44 günlük müharibə dövründə Fransa bir erməni dövləti kimi hərəkət edirdisə, Makron Azərbaycan əleyhinə fasiləsiz bəyanatlar verirdisə sonrakı dövrdə bu münasibət dəyişdi. Azərbaycan hətta Makronun prezident seçilməsini məmnunluqla qarşıladı. Bu gün bir tərəfdən Fransa, müxtəlif səviyyəli fransız rəhbərləri Qarabağ separatçılarına dəstək verirsə, biri tərəfdən prezident Makron erməniləri reallıqla barışmağa çağırır, Azərbaycanın ərazi bütövlüyünü qəbul etməyi tövsiyə edir. Elə Paşinyan da bu barədə “ bizim qərbdəki dostlarımız tələblərimizin səviyyəsini endirməyimizi məsləhət görürlər” dedi”. A.Səmədovun sözlərinə görə, təbii ki, burada ilk növbədə Fransa nəzərdə tutulur. A.Səmədov hesab edir ki, Avropa İttifaqının müəyyən qədər münasibətinin dəyişməsinin də kökündə Fransanın mövqeyinin dəyişməsi dayanır. “Ancaq bu dəyişmə Azərbaycanı qane edirmi? Təbiidir ki, etmir. Əgər dünən “Qarabağ müstəqil olmalıdır” deyirdilərsə, bu gün guya Azərbaycanın ərazi bütövlüyünü qəbul edirlər, ancaq Qarabağa ən yüksək status verilməsini tələb edirlər, buna cəhd göstərirlər. Fransa ilə münasibətlərimizdə müəyyən uğurlar göz qabağındadır. Ancaq uzun illər erməni lobbisinin fəaliyyəti var, ermənilərin orada kifayət qədər dayaqları mövcuddur. Vəziyyəti dəyişmək istəyiriksə bundan sonra fəaliyyətimizi daha fəal, daha səmərəli qurmalıyıq. Bir şeyi nəzərə almalıyıq ki, arxayınlaşmaq olmaz və mübarizə hələ qabaqdadır”- deyə A.Səmədov vurğuladı.
İradə SARIYEVA
