44 günlük haqq savaşımızda Vətən sevgisinə tapınıb odlardan, alovlardan keçərək torpağın sinəsinə tökdüyü qanla tarix yazan qəhrəmanlardan biri də 2001-ci ilin iyulun 12-də Biləsuvarın Çaylı kəndində dünyaya göz açan Elnur Allahverdiyev olub. O, ömrünün ən gənc, parlaq cağında - 19 yaşında hünər göstərib xalqımıza şanlı qələbə yaşatmaqla əbədiyyət qazanıb. İndi qəhrəmanlığı ilə ölümsüzlüyə qovuşan Elnur Allahverdiyev bütün Azərbaycan xalqı üçün iftixar mənbəyi, qürur yeridir. Ad dillərdən, nuru qəlblərdən düşmür.
Uşaqlıqdan Vətənə ürəkdən bağlanan Elnur Allahverdiyev orta məktəbi bitirərək hərbi xidmətə gedib. Vətən torpaqlarını yağıdan qorumaq üçün cəbhə bölgəsində xidmətə başlayıb, həm də bununla qürur duyub. Yaşının az olmasına baxmayaraq, ilk gündən özünü yetkin əsgərlər kimi aparıb, mərdliyi, qorxmazlığı ilə seçilib, düşmənlə üzbəüz mövqelərdə möhkəm dayanıb. Yağı tapdağında olan Qarabağa sahib çıxmağı, lazım gələndə isə uğrunda canından keçməyi özünə müqəddəs borc hesab edib. Eləcə də Qarabağın son qarış torpağının azad olunacağı günədək səngəri özünə həyat yolu seçib.
Elnur xidmət zamanı öz üzərində ciddi çalışıb, çətin təlimlərdən uğurla keçib, yüksək nəticələr qazanıb. Davranışı, intizamı, yaşına uyuşmayan təmkini, ən başlıcası, doğma Azərbaycana sonsuz sevgisi onu zabitlərin, əsgərlərin sevimlisi edib. Namus, qeyrət, torpaq uğrunda fədakarlıq göstərmək həyat kredosu olan Elnur qana susamış erməni dığalardan qisas almağı hər an gözləyib.
2020-ci ilin İkinci Qarabağ müharibəsi başlayanda Elnur qəhrəman oğullarla bərabər odlu-alovlu səngərdə yerini alıb. Vətən, torpaq naminə min əzab-əziyyətli, ölümlü sınaqlara mərdliklə sinə gərib. Hər addımda Azərbaycan xalqına məxsus ulu torpaqların azadlığına doğru böyük inamla irəliləyib. Qarşıdakı illərlə Qarabağı işğalda saxlayan düşmənə qan qusdurub. Belə məqamda heç bir çətinlik Elnurun iradəsini sındıra bilməyib, ölüm-dirim döyüşlərdə mərdliklə vuruşub, neçə-neçə erməni əsgərini məhv edib, hərbi texnikasını sıradan çıxardıb. Atəşin içindən keçərək, azad olunan torpaqların bağrına zəfər bayrağımızı sancıb.
Elnur Allahverdiyevin odlu-alovlu döyüş yolu Füzulidən Cəbrayıla, Qubadlıya, oradan Şuşaya qədər uzanıb. Harada olubsa, düşmənə od qoyub. Həmçinin onlarla yaralı əsgəri, zabiti döyüş bölgəsindən çıxarıb. İgid əsgər qələbəyə çox inanıb. Elə bu inamla da düşməndən Vətənə və millətə yaşatdiqlarının hesabını sarsıdıcı zərbələrlə sorub. 2020-ci il noyabrın 8-də Şuşa şəhəri ətrafında, Daşaltı kəndində gedən döyüşlərdə düşmən tərəfindən atılan artilleriya atəşi Elnurun böyük arzularına son qoyub. Vətən sevgisi ilə çırpınan ürəyi həmişəlik dayanıb. Bu şərəfli ölüm onun adını Azərbaycanla qoşalaşdırıb, ürəklərdə ona əzəmətli abidə ucaldıb. Şəhid Elnur torpağa gömülməyib, onun yaddaşına dönüb. Dövlət tərəfindən Elnur Allahverdiyev ölümündən sonra “Vətən uğrunda”, “İgidliyə görə”, Füzulinin, Şuşanın azadlığı uğrunda medallarla təltif edilib.
Zəfər ORUCOĞLU
Azərbaycan Jurnalistlər Birliyinin üzvü
