Vüqar Bayramov: “12 milyard avroyadək investisiya cəlb edilməsi Azərbaycanın tranzit imkanlarını artıracaq”
Avropa Komissiyasının sədri Ursula fon der Lyayen Avropa İttifaqının vəziyyəti ilə bağlı illik çıxışı zamanı bəyan edib ki, Avropa İttifaqı Cənubi Qafqaz və Mərkəzi Asiyanı Avropa bazarı ilə birbaşa əlaqələndirəcək yeni beynəlxalq nəqliyyat layihəsi həyata keçirəcək: “Bu gün qarşılıqlı bağlılığın inkişafı üzrə yeni beynəlxalq layihəni elan edə bilərəm. Bu layihə Cənubi Qafqaz və Mərkəzi Asiyanı Avropa bazarı ilə birbaşa əlaqələndirəcək. Söhbət “Orta Dəhliz” adlanan marşrutdan gedir”.
Onun sözlərinə görə, Aİ “Global Gateway” proqramı çərçivəsində layihənin inkişafına 12 milyard avroyadək dövlət və özəl investisiya cəlb etməyi planlaşdırır: “Bizim məqsədimiz marşrutları şaxələndirmək və yüklərin daşınma müddətini əhəmiyyətli dərəcədə azaltmaqdır”.
Görünən odur ki, nəhayət Avroittifaq Orta Dəhlizlə bağlı real addımların atılması ilə bağlı hərəkətə keçir.
Sözügedən məsələni baki-xeber.com-a şərh edən millət vəkili Vüqar Bayramovun fikrincə, Azərbaycan hər zaman Orta Dəhlizi dəstəkləyən ölkələrdən biri olub: “Xüsusən də həm İran, həm də Rusiyaya qarşı sanksiyalar fonunda Orta Dəhlizə Avropa İttifaqının da marağının yüksəlməsi müşahidə edilir. Xüsusilə nəzərə almaq lazımdır ki, praktik olaraq əgər əvvəllər Aİ-nin Orta Dəhlizə münasibəti Çin faktoru səbəbindən birmənalı deyildisə, artıq bu yanaşma dəyişib. Artıq layihənin Brüssel tərəfindən uğurla dəstəklənməsi müşahidə edilir. Sözsüz ki, Orta Dəhlizin Avroittifaq tərəfindən dəstəklənməsi Azərbaycanın maraqlarına uyğundur. Çünki ölkəmiz bu dəhliz vasitəsi ilə yüklərin daşınmasını təmin edir. Eyni zamanda tranzit ölkə olaraq bu daşımalardan gəlir əldə edir. Heç şübhəsiz Cənubi Qafqazda sülhün əldə edilməsi, əməkdaşlıq platforması Orta Dəhliz vasitəsi ilə daşınan yüklərin həcminə birbaşa təsir göstərəcək. Bu çərçivədə 12 milyard avroyadək dövlət və özəl investisiya cəlb edilməsi də Cənubi Qafqazın, o cümlədən Azərbaycanın tranzit imkanlarını artıracaq. Bu da ümumilikdə Azərbaycanın dövlət gəlirlərinin artırılması baxımından vacibdir. Çünki beynəlxalq yükdaşımalar qeyri-neft sektoru üzrə daxilolmalarında əsas istiqamətlərdən biridir. Orta Dəhlizə nə qədər çox sərmayə qoyulursa, bu, nəticə etibarı ilə dəhliz vasitəsi ilə daşınan yüklərin artmasına və eyni zamanda Azərbaycanın bu daşımalardan daha çox gəlirlər əldə etməsinə imkan yaradır. Azərbaycan üçün birmənalı şəkildə beynəlxalq yükdaşımaların dəstəklənməsi və təşviqi, eyni zamanda infrastrukturun inkişaf etdirilməsi prioritetdir. Ələt limanı Xəzər hövzəsinin ən böyük limanıdır. İnfrastruktur genişlənir, eyni zamanda digər tərəfdən biz elektronlaşmanın güclənməsini müşahidə edirik. Bütün bunlar Azərbaycanı regional nəqliyyat və logistika habına çevrilməsinə imkan yaradacaq”.
Vidadi ORDAHALLI
