Xarici turistlərin ölkəmizə axın etməsi müsbət haldır. Paytaxt Bakı da daxil olmaqla, ölkəmizin əksər bölgələri turizm üçün hərtərəfli imkanlara malikdir.
Lakin ölkəmizə turist kimi gələn əcnəbilərin bir qismi getdikdən sonra heç də özləri barədə xoş təəssürat buraxa bilmirlər. Etiraf edək ki, bəzi ölkələrdən gələn turistlər heç də burada özlərini normal şəkildə apara bilmir. Xüsusilə, bir çox hallarda ərəb turistləri ilə bağlı müyyən qalmaqallar yaşanıb. Dəfələrlə bildirilib ki, bəzi ərəb ölkələrindən gələn turistlər qoruqlarda qanunsuz ovla məşğul olublar, eyni zamanda da müəyyən qanunazidd hərkətlərə yol veriblər. Sirr deyil ki, əvvəlki dövrlərdə onlar məsuliyyətə cəlb edilməyiblər. Cəzasızlıq isə növbəti xoşagəlməz hallara yol açmaqla yanaşı, həm də insanda bir növ arxayınçılıq yaradır.
Bu dəfə də ərəb turistləri qanunsuzluq edib, amma cəzalandırılıblar da. Ekologiya və Təbii Sərvətlər Nazirliyinin yaydığı məlumata görə, aparılan monitorinqlər zamanı ərəb ölkələrindən gəlmiş turistlərin Qax rayonun Acınohur ərazisində mülkiyyətçinin razılığı əsasında istirahət məqsədilə çadır qurduqları və özlərinə məxsus şahin quşlarına təlim keçdikləri qeydə alınıb.
Nazirliyin Ekoloji Təhlükəsizlik Xidmətinin rəisi Hikmət Əlizadə bildirib ki, təlimdə ev quşları olan göyərçinlərlə rəhmsiz rəftar olunması aşkar edildiyindən həmin şəxslərə qarşı İnzibati Xətalar Məcəlləsinin müvafiq maddəsi ilə cərimə tətbiq olunub.
Hətta iddialara görə, ərəb turistlər göyərçinləri drona bağlayıb havaya buraxıblar.
Ümumiyyətlə, turistin məsuliyyəti deyilən bir anlayış olmalıdır ki, onlar bu ölkəyə gəldikdə elədikləri hərəkətlərə görə məsuliyyət daşıdıqlarını anlasınlar.
“Bir tərəfdən, ərəb turistləri hansısa şəkildə, bilərəkdən, yaxud bilməyərəkdən əndazəni aşıblar, digər tərəfdən, biz özümüzə tənqidi yanaşmalıyıq ki, onların belə davranmaması üçün biz nə etmişik?”
Siyasi şərhçi Azər Həsrət baki-xeber.com-a açıqlamasında bildirir ki, təkcə turistlər deyil, istənilən xarici vətəndaş ölkəmizə gələrkən bizim qanunlara tabe olmaq məcburiyyətindədir: “Yəni biz özümüz də xarici ölkələrə çox gedirik və o ölkələrin sərhədindən içəriyə ayağımızı qoyduğumuz zaman həmin ölkənin qanunları çərçivəsində davranırıq və davranmağa da borcluyuq. Birincisi, bu etik, ədəb-tərbiyə məsələsidir. Yəni getdiyin evin içində həmin evin qanunlarına uyğun davranmalısan. İkincisi də, bu hüquqi məsələdir, bir zonaya daxil olduğunuz zaman o zonanın daxilində qüvvədə olan mövcud qanunlar çərçivəsində davranmalısınız. Ona görə də, bəzi ərəb turistlərin Azərbaycana gələrkən ölkəmizin qanunlarından kənar davranması əlbəttə ki, ciddi suallar doğurmaya bilməz. Onlar bura gələrkən maarifləndirilməlidirlər. Əgər konkret ov məqsədilə gəlirlərsə bizim ölkəmizin ovçuluqla bağlı mövcud qaydalarını öyrənməli, mənimsəməli və ona uyğun davranmalıdırlar. Bilirsiz ki, Azərbaycanda turistlərin gəlib ov etməsi üçün turizm səfəri təşkil olunur. Digər tərəfdən, əgər onlar hardasa qanunları pozurlarsa burada bizim də günahımız az deyil. Çünki istər-istəməz onların gəlib yerləşdikləri yerdə göstərilən uyğun xidmətin içində maarifləndirmə işləri də olmalıdır”.
A.Həsrət hesab edir ki, turistlər gəlib yerləşdikləri yerdə mülkiyyət sahiblərinə bura hansı məqsədlə gəldiklərini deyirlər. “Konkret Acınohur ərazisini götürək, yəqin onlar bura gələrkən mülkiyyətçiyə deyiblər ki, şahinlərim var, burada onlara təlim keçəcəyik və sair. Əlbəttə, ərəblərin orada şahinlərinə təlim keçmək istəməsi barədə əvvəlcədən müvafiq dövlət qurumları məlumatlandırılmalı, xəbərdar edilməli idilər. Bu zaman da onlar turistlərə Azərbaycanın aidiyyatı qanunvericiliyi ilə bağlı məlumat verməli idilər. Ola bilər ki, bu işi gəlib ya bir şəxs görsün, ya turistlər maarifləndirici ədəbiyyatla, məlumat xarakterli açıqca ilə təmin edilsin. Yəni bunu etmək çətin deyil. Deyək ki, bir tərəfdən, ərəb turistləri hanısa şəkildə, bilərəkdən, yaxud bilməyərəkdən əndazəni aşıblar, digər tərəfdən, biz özümüzə tənqidi yanaşmalıyıq ki, onların belə davranmaması üçün biz nə etmişik? Yəni biz oturub gözləmişik ki, onlar belə davransınlar, biz də onları cərimə edək. Bu çıxış yolu deyil. Mənə elə gəlir ki, önləyici tədbirlərə üstünlük verilməlidir, maarifləndirmə işi aparılmalıdır” - deyə A.Həsrət vurğuladı.
İradə SARIYEVA
