Azərbaycanda koronavirus pandemiyası ilə bağlı tətbiq olunan karantin rejimində təxirə düşən əsas tədbirlərdən biri də toy mərasimləridir. Bu dövrdə gizli toy mərasimlərinin keçirilməsi və yaxud, sadəcə, nikah bağlamaqla yeni ailələr qurulmasını müşahidə edirik. Bəzi şəxslər, xüsusən də restoran və şadlıq evləri koronavirus infeksiyasının nə dərəcədə təhlükəli olmasının fərqinə varmadan, öz məkanlarında toy keçirilməsinə şərait yaradırlar.
Bu günlərdə Bakıda polis əməkdaşları şadlıq evində toy məclisi keçirənləri saxlayıb. Daxili İşlər Nazirliyinin yaydığı məlumatda qeyd edilir ki, Yasamal rayonunda yerləşən “Atlantis” restoranının “Eyforiya” zalında gizli şəkildə toy mərasiminin keçirildiyi haqda polisə məlumat daxil olub. Yasamal polisinin əməliyyatı zamanı fakt təsdiqlənib və toyda iştirak edənlər barəsində qanunvericiliyin tələbinə uyğun olaraq tədbir görülüb.
Onu da qeyd edək ki, sözügedən restoran sabiq hərbi komissar və deputat Əliağa Hüseynova aiddir.
Maraqlıdır, sadə adamlar bir yana, hətta millət vəkilləri də karantin qaydalarını pozurlar. Onlar cəmiyyət üçün nümunə olacaqları halda, karantin qaydalarını pozaraq, toyun keçirilməsinə icazə verirlər. Belə şəxslərdən biri də Əliağa Hüseynovdur.
“...bu şəxslər ictimai rəyə qarşı hörmətsizlik etməkdə davam edirlər”
Sosial sahə üzrə ekspert İlqar Hüseynli bildirdi ki, sadə vətəndaşlarla müqayisədə sabiq və hazırkı məmurlar karantin qaydalarının pozulmasında sanki maraqlıdırlar: “Sabiq və ya hazırda məmur postunda əyləşənlər sərbəst şəkildə toy, ad günü məclisləri keçirirlər.Bu şəxslər ictimai rəyə qarşı hörmətsizlik etməkdə davam edirlər. Həmin şəxslərə sərt cəzanın tətbiq edilməməsi, həmçinin, onların özündə arxayınlıq yaradıb. Bu tip şəxslərə qarşı ictimai qınaq tətbiq edilməlidir”.
Həmsöhbətimiz onu da əlavə etdi ki, karantin qaydalarını pozan vəzifəli şəxslər sərt şəkildə cəzalandırılmalıdırlar ki, bu, sadə vətəndaşlara da dərs olsun
Günel CƏLİLOVA
