Bizim cəmiyyətdə alim adı almaq, professor, akademik elmi titullarına yiyələnmək sanki, bir növ, dəb halını alıb, hətta bəzilərinin elmi titul və dərəcələrə bir hobbi kimi yanaşdığı da məlumdur. Yəni belələri fəlsəfə doktoru, professor, akademik diplomlarını bir göstəri kimi nümayiş etdirməkdən zövq alırlar.
Xüsusən də hazırda və keçmişdə yüksək dövlət vəzifələri tutan məmurlar bu sahədə çox diqqət çəkirlər. Azərbaycan qədər alim-professor, akademik donuna bürünən məmuru olan ölkə az tapılar, bəlkə də heç yoxdur.
Son zamanlar müxtəlif cinayət maddələri ilə həbs edilən keçmiş və indiki məmurlar arasında professor, alim adı daşıyanlar da var. Məsələn, korrupsiya cinayətlərinə görə həbs edilən keçmiş əmək və əhalinin sosial müdafiəsi naziri Səlim Müslümov və “Azərxalça” Açıq Səhmdar Cəmiyyətinin İdarə Heyətinin sabiq sədri Vidadi Muradov - hər ikisi professordur, yüksək elmi dərəcə sahibidirlər.
Elyar İslamoğlu: “Təəssüflər olsun ki, həbs olunan məmurların da bəzisi elmlə məşğul olurmuş kimi görünürdü”
ilologoya üzrə fəlsəfə doktoru Elyar İslamoğlu baki-xeber.com-a bildirdi ki, məmurların, eyni zamanda, elmlə məşğul olmağa maraqları böyükdür. “Məmurların həm vəzifə tutmasını, həm də elmlə məşğul olmasını sosial şəbəkələrdə yayılan xəbərlərdən tez-tez oxuyuruq. Təəssüflər olsun ki, bu amil hər iki sahənin yarıdılmamasına gətirib çıxarır. Xüsusilə də məhkəmə sistemində çalışan hakim və ya məhkəmə sədrlərinin və ya digər sahələrdə rəhbər vəzifə tutan şəxslərin həm də universitetdə dərs deməsi tədrisin də keyfiyyətsiz olmasına şərait yaradır. Çünki çox zaman işin çoxluğundan, təxirəsalınmaz məhkəmələr və ya digər səbəblərdən həmin şəxslər gedib dərsini deyə bilmirlər. Həmin dərs boş keçir və ya kimsə əvəz etməli olur. Ya vəzifəni, ya da elmi seçmək lazımdır.
Vəzifədə olanda müdafiə etmək asandır. Ona görə də bir çox məmur vəzifədə olanda müdafiə edir, elmi ad alır. Hansısa universitetdə özünə yer edir, kafedra müdiri, şöbə müdiri olur. Hətta həyat yoldaşları, övladları elmi ad alan xeyli sayda məmur da var. Təəssüflər olsun ki, həbs olunan məmurların da bəzisi elmlə məşğul olurmuş kimi görünürdülər. Kafedra müdiri, universitet müəllimi kimi çalışırdılar. Əgər bir məmur rüşvətə görə həbs edilibsə, onda onun tədrisindən nə fayda? O, tələbələrinə nə öyrədə bilərdi? Təhsilin, tədrisin keyfiyyətini artırmaq istəyiriksə, gələcəkdə bu məsələni də diqqətdə saxlamaq lazımdır” - deyə alim qeyd etdi.
İdris Abbasov: “Mütəşəkkil cinayətkarların alimlik libasına bürünməsi...”
Azərbaycan Milli Elmlər Akademiyasının Nəsimi adına Dilçilik İnstitutunun şöbə müdiri, filologiya elmləri doktoru, professor İdris Abbasov bildirdi ki, son zamanlar rüşvətlə və digər qanunsuz əməllərlə məşğul olan keçmiş məmurlar arasında professor elmi titulu daşıyanlar da var: “Son illər baş verən hadisələrlə bağlı vəzifələrindən uzaqlaşdırılan, elmi titullar daşıyan keçmiş məmurlarla maraqlandıq. Məlum oldu ki, Bakı Şəhər İcra Hakimiyyətinin sabiq başçısı Hacıbala Abutalıbov, keçmiş əmək və əhalinin sosial müdafiəsi naziri Səlim Müslümov professordur. Bir çox məmurun bioqrafiyası ilə tanış olanda görürsən ki, bunların çoxu elmlər doktoru, professordur, ən aşağı elmi dərəcəsi olanlar fəlsəfə doktorlarıdır. Bir sözlə, məmurların bir çoxu yüksək elmi titul alıb. Onlar haqqında məlumatlarda xeyli sayda elmi əsərin müəllifi kimi göstərilirlər. Hətta Hacıbala Abutalıbovun xeyli ixtira müəllifi olduğu qeyd edilir. Bir nəfərin bu qədər iş görməsi, eyni zamanda, bir neçə vəzifə daşıması və paralel olaraq da elmlə məşğul olması mümkün deyil. Elm zərif bir sahədir. O vaxt tələb edir, tədqiqatçının saatlarla təcrid vəziyyətdə işləməsi gərəkdir. Buna barmaqarası baxmaq olmaz. Bir xeyli məmur var ki, onlar vəzifədə olanda, nazir postu tutanda yüksək elmi dərəcələr alırlar ki, sabah vurulanda özlərini hansısa bir ali məktəbdə işlə təmin etsinlər. Yəni elmi dərəcə, elmi ad onlara ona görə lazımdır ki, öz səltənətlərini vurulandan sonra da davam etdirsinlər.
Son dövrlər vəzifədən vurulan məmurların, keçmiş deputatların çoxunun elmi dərəcəsi var. Maraqlıdır ki, vəzifədən vurulan məmurlar daha çox Milli Elmlər Akademiyasına üz tuturlar…
Vəzifədə olduqları dövrdə törətdikləri cinayətlərə, korrupsiya əməllərinə görə həbs edilənlər arasında professorların, digər elmi dərəcəli insanların da olduğu faktdır. Mütəşəkkil cinayətkarların alimlik libasına bürünməsi nəinki bir dövləti, həmçinin, bütün bəşəriyyəti təhdid edir”.
İ.Abbasov vurğuladı ki, ölkə başçısı hər zaman bütün sahələrdə ictimai nəzarətin tətbiq edilməsinin zəruri olduğunu qeyd etsə də, amma yüksək titullu alim-məmurlar, alim-deputatlar arasında hələ də ictimai nəzarətin mahiyyətini anlayıb, onun genişlənməsinə çalışanlar yoxdur.
İradə SARIYEVA
