Məlum olduğu kimi, cari ildən icbari tibbi sığortanın tətbiqi bütün ölkə ərazisində təmin olunacaq. Bununla bağlı cəmiyyətdə suallar var. İcbari tibbi sığortaya görə kimlərdən nə qədər vəsait tutulacaq, sığorta zərfində hansı xidmətlər olacaq, nə qədər tibbi xidmət təklif olunur və sair.
Məlumat üçün bildirək ki, prosesin ilk mərhələsi 2020-ci ildə baş tutub, ikinci mərhələdə isə ölkənin daha 36 şəhər və rayonu – Gəncə, Naftalan, Şirvan, Qazax, Ağstafa, Tovuz, Şəmkir, Gədəbəy, Daşkəsən, Samux, Göygöl, Goranboy, Xocalı, Beyləqan, Xocavənd, Ağcabədi, Laçın, Bərdə, Füzuli, Ağdam, Tərtər, Kəlbəcər, Astara, Lənkəran, Lerik, Yardımlı, Masallı, Cəlilabad, Neftçala, Biləsuvar, Cəbrayıl, Salyan, İmişli, Saatlı, Sabirabad və Hacıqabul icbari tibbi sığorta sisteminə qoşulacaq. Sonuncu üçüncü mərhələdə, 1 aprel 2021-ci il tarixindən etibarən isə Bakı, Sumqayıt, Abşeron, Xankəndi, Qubadlı, Zəngilan və Şuşa əhalisi icbari tibbi sığorta ilə əhatə olunacaq.
Onu da qeyd edək ki, icbari tibbi sığortaya daxil olan xidmətlər zərfinin hər il yenilənməsi üzrə işlər aparılır. Bunu İcbari Tibbi Sığorta Agentliyinin Tibbi İddialar Departamentinin rəhbəri Vüqar Qurbanov bir neçə gün öncə keçirilən mətbuat konfransında deyib. Qeyd edilib ki, ötən il ərzində İTS tərəfindən 2550-yə yaxın tibbi xidmət təyin olunub. “Bu il isə bu say 2800-dən çoxdur. Burada yalnız səhiyyə xidmətləri nəzərdə tutulur. Lakin bir sıra xəstəlikləri əlavə etdikdə, bu say 3000-dən çoxdur”.
Qeyd etdiyimiz kimi, icbari tibbi sığorta zərfinə əhalinin daha çox ehtiyac duyduğu xəstəliklərin əlavə edilməsi gözlənir. Məlumdur ki, xidmət zərfinə 2500 tibbi xidmət daxildir. Ancaq xidmət zərfinin 3000-ə artırılması nəzərdə tutulur. Hansı xəstəliklər icbari tibbi sığorta zərfinə daxil edilə bilər?
“Doğuş və təxirəsalınmaz yardım sığorta paketinə daxil olarsa, bunu başlanğıc üçün böyük uğur hesab etmək olar”
Professor, tibbi ekspert Adil Qeybulla bildirdi ki, uzun illərdir icbari tibbi sığortanın tətbiq olunması gözlənir: “Sığorta paketinə bir çox xəstəlik daxil edilib. Ancaq bununla yanaşı, elə xəstəliklər, prosedurlar var ki, onların da sığorta paketinə salınması vacibdir. İlk növbədə, doğuş və təxirəsalınmaz yardım bu xidmətə əlavə olunmalıdır. Əhali doğuş və təxirəsalınmaz yardımın pulsuz təminatına nail ola bilsə, bunu başlanğıc üçün böyük uğur hesab etmək olar”.
Həmsöhbətimiz hesab edir ki, icbari tibbi sığortanın tətbiqi ilə bağlı Türkiyə, Almaniya modelindən istifadə etmək lazımdır: “Ən yaxşı nümunə Türkiyədir. Türkiyədə sığorta xərcləri dövlətlə vətəndaş arasında bölünür”.
Günel CƏLİLOVA
