Mübahisələr zamanı ədalətin qələbə çalmasında vəkillərin rolu xüsusi olaraq vurğulanmalıdır. Belə bir deyim var: “yaxşı vəkil hüququn, mükəmməl vəkil isə ədalətin carçısıdır”.
Vətəndaşlar da pozulan hüquqlarının bərpa olunması üçün daim mükəmməl vəkil axtarışında olurlar. Mükəmməl vəkili tapmaq isə vətəndaşlara elə də asan başa gəlmir.
Hazırda ölkədə 2000-ə yaxın vəkil fəaliyyət göstərir. Son illər vəkillər və vəkillik fəaliyyəti haqqında qanunda bir sıra əlavələr və dəyişikliklər oldu. Edilən dəyişikliklər vəkillərin fəaliyyətinə müsbət təsir etsə də, bəzi qaydalar vəkillərin narazılığına səbəb olur. Belə ki, vəkillik fəaliyyəti ilə məşğul olanlar gəlir vergisi ödəməlidirlər. Ancaq onların ödədikləri gəlir vergisi yüksək olduğu üçün, bu, vəkillərin narazılığına səbəb olur. Məlumat üçün bildirək ki, vəkillik fəaliyyəti ilə məşğul olanlar gəlirindən 14 faiz vergi ödəyirlər.
Onu da qeyd edək ki, Vergi Məcəlləsinin 99.3.11-ci maddəsinə əsasən, vəkillik fəaliyyəti ilə məşğul olan şəxslərin göstərdikləri xidmətə görə alınan ödənişlər qeyri-sahibkarlıq fəaliyyətindən əldə edilən gəlirlər qrupuna aiddir. Məcəllənin 101.2-ci maddəsinə görə isə qeyri-sahibkarlıq fəaliyyəti üzrə illik gəlirdən 14 faiz dərəcə ilə vergi tutulur.
“Nəzərə almaq lazımdır ki, vergi yükü onsuz da, əvvəl-axır, vətəndaşların çiyinlərinə düşür”
Vəkillər Kollegiyasının üzvü, hüquqşünas Əkrəm Həsənov bildirdi ki, vəkillik fəaliyyəti haqqında qanun hazırda günün tələbinə cavab verir: “Nəzərə almaq lazımdır ki, son illər bu sahədə bir sıra dəyişikliklər olub. Buna baxmayaraq, vəkillərin ödədiyi vergi hələ də yüksəkdir. Vəkillərin ödədiyi vergi ilə bağlı bir neçə dəyişikliyə ehtiyac var. Bu gün vəkillərin ödədiyi vergi fərdi sahibkarın ödədiyindən çoxdur. Ölkə vətəndaşları gəlir vergisindən 7 il ərzində azaddırlar. Beləcə, onlardan 14 faiz vergi tutulmur. Fərdi sahibkarların bir qismi sadələşdirilmiş vergi ödəyir – 2 faiz. Əgər fərdi sahibkar hüquqi şəxslərlə işləyirsə, o da mikrosahibkarlıq subyekti kimi 5 faiz ödəyir. Biz vəkillər isə 14 faiz vergi ödəyirik. Dövlət Sosial Müdafiə Fonduna sosial sığorta haqqı ötən il vəkillər üçün 10 faizə endirildi. Fərdi sahibkarlarda isə daha əvvəldən elə bu məbləğ təxmini 30 manat civarında idi. Maraqlıdır, vəkillərin fəaliyyəti fərdi sahibkarlıq sahəsi kimi qəbul edilmir. Belə baxanda heç bir qurum bizə maaş ödəmir. Bu sahədə dəyişiklik edilməsinə ehtiyac var. Onu da nəzərə almaq lazımdır ki, vergi yükü onsuz da, əvvəl-axır, vətəndaşların çiyinlərinə düşür. Vəkil o məbləği ödəmək üçün gərək vətəndaşdan çox pul alsın”.
Günel CƏLİLOVA
