Azərbaycanda ünvanlı yardımların əhatə dairəsi genişləndiriləcək. Mətbuatda gedən məlumata görə, bu, Prezident İlham Əliyevin təsdiqlədiyi “Azərbaycan 2030: sosial-iqtisadi inkişafa dair Milli Prioritetlər”də əksini tapıb.
Milli Prioritetlərdə qeyd olunub ki, ölkənin bütün təbəqələri cəmiyyətin ayrılmaz hissəsidir və dövlət onların qayğısına qalmalıdır.
Ölkədə yoxsulluq səviyyəsinin minimuma endirilməsi və aşağı işsizlik səviyyəsi, eləcə də yoxsul təbəqənin ehtiyaclarının qarşılanmasına yönələn ünvanlı yardımların əhatə dairəsinin genişləndirilməsi vətəndaşların sosial müdafiəsinə əlavə imkanlar yaradır.
“...ölkədə həm insanların məşğulluq səviyyəsi, həm də rifahı yüksələcək”
Tanınmış iqtisadçı Elşad Ömərov “Bakı-Xəbər”ə şərhində bildirdi ki, ünvanlı yardımların əhatə dairəsinin genişləndirilməsinə həqiqətən də ehtiyac var və bu da artıq Prezident İlham Əliyev tərəfindən təsdiqlənən “Azərbaycan 2030: sosial-iqtisadi inkişafa dair Milli Prioritetlər”də ehtiva olunub. “Sosial müavinətlərlə bağlı Dövlət Proqramı çox geniş sahəni əhatə edir. Bunun da həyata keçirilməsində istiqamətlər var. Bu, dövlət tərəfindən əhalinin sosial rifahının yüksəldilməsi istiqamətində atılan bir addımdır. Ünvanlı yardımların əhatə dairəsi gələcək illərdə daha da genişləndirilməlidir və bu da müvafiq sənəddə öz əksini tapıb. Bu ona görə lazımdır ki, əhalinin sosial rifahı daha da gücləndirilsin. Ünvanlı sosial yardımların əhatəsini genişləndirməzdən öncə burada ən ümdə olan məsələ işsizlik probleminin aradan qaldırılmasıdır. İşsizlik probleminin aradan qaldırılması bir sıra iş yerlərinin açılması və əhalinin iş fəaliyyətinin daha da genişlənməsinə gətirib çıxaracaq. Bu məsələyə xüsusən regionlarda böyük əhəmiyyət verilməlidir. Hazırda da bu istiqamətdə işlər gedir. Regionlarda kənd təsərrüfatının inkişafına diqqət öndə gedir. Pambıqçlıq, taxılçılıq və digər sahələrdə işlərin aparılmasına daha çox yer verilir. Sosial sahədəki proqramların, sosial müavinətlərin, ünvanlı sosial yardımların verilməsinin əhatə dairəsinin genişləndirilməsi, bütün bu işlər son nəticədə ona gətirib çıxaracaq ki, ölkədə həm insanların məşğulluq səviyyəsi, həm də rifahı yüksələcək”.
E.Ömərov qeyd etdi ki, son nəticədə bu, ölkədə iqtisadi göstəricilərin statistik baxımdan daha da yüksəlməsinə gətirib çıxaracaq.
İradə SARIYEVA
